Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> ہاں میں پنجابی آں

ہاں میں پنجابی آں

زرنگار سعید
June 11th, 2010
5 / 5 (5 Votes)

بدقسمتی نال اج دوہاں پنجاباں وچ نام نہاد پڑھے لکھے پنجابی ماں باپ آپنے بالاں نال اوہناں دی ماں بولی پنجابی دی تھاں ہندی تے اردو بولدے نیں ایہناں بالاں نال کیہ کیہ ہوندا اے تے ایہناں نوں کیہڑے کیہڑے مسئلیاں دا ساہمنا کرنا پیندا اے ایس تے چانن پاؤن لئی اجیہے حالت چوں لنگھی اک کڑی دی ایہہ کہانی اے۔ (ایڈیٹر )

میرا بڑے چر توں دل کر رہیا سی کہ میں کجھ لکھاں۔ اج سوچیا کہ کُجھ لکھاں۔
''پر کیہ؟''
فیر سوچیا کہ آپنے بارے لکھاں پر کُجھ سمجھ نہیں آیا کیوں جے آپنے بارے لکھنا وی ہر بندے دے وس دی گل نہیں ہوندی کیوں جے اپنی پچھان وی کوئی کوئی بندہ کر سکدا اے۔ فیر خیال آیا کہ گھٹو گھٹ میری اک پچھان تے ہے تے اوہ ہے میری بولی پنجابی۔

''جی ہاں میں اک پنجابی آں'' ۔ مینوں میری ایہہ پچھان کیویں لبھی؟ ایہہ اک لمی کہانی ہے۔

میں لاہور شہر دی رہن والی آں تے میرے پیو دادے دا تعلق وی لاہور شہر نال ای اے ایہہ ہور گل اے کہ مینوں پینڈو وسیب نے ہمیشہ آپنے ول کھچیا اے تے کُجھ دن کسے پنڈ وچ رہن دی خواہش ہر ویلے میرے اندر جاگدی رہی اے میرا باپ راجپوت بھٹی تے ماں کشمیری اے تے دوویں پڑھے لکھے نیں تے میں او ہناں دوواں نوں ہمیشہ پنجابی بولدیاں دیکھیا اے۔

بچپن ہسدیاں کھیڈدیاں لنگھیا میں آپنیاں بھیناں وچوں وڈی آں ایس کر کے دادا دادی دا بوہتا پیار وی میرے حصے وچ آیا تے میں جی بھر کے لاڈو بنی مینوں یاد نہیں پیندا کہ میرے تے کدیں کوئی ایہو جیہی پابندی لائی گئی ہووے جیہدے نال مینوں ساہ گھُٹن دا احساس ہووے۔ مینوں آپنی زندگی دا ہر فیصلہ آپ کرن دی آزادی دتی گئی تے میں جو وی فیصلہ کیتا آپنی مرضی نال کیتا سوائے اک فیصلے دے۔ اوہ سی بولی یعنی زبان دا فیصلہ میں آپنے ماں ماں پیو نوں تے پنجابی بولدیاں دیکھیا پر ساڈے یعنی میرے تے میریاں بھیناں نال ہمیشہ اردو ای بولی گئی تے میں آپنے باقی خاندان وچ وی ایہو رواج دیکھیا۔
ساڈے نال اردو کیوں بولی گئی؟

ایہہ گل ناں تے کدے سانوں دسی گئی تے سچی گل ایہہ ہے کہ ناں ای ایہہ گل پچھن دی کدے میں وی زحمت کیتی ۔ پنجابی گھراں وچ بچیاں نال کیوں اردو بولی جاندی اے ایہدی وجہ خورے ایہہ ہووے کہ سکولاں وچ پنجابی بولن تے پابندی ہوندی اے کیوں جے سکول یاں تے اردو میڈیم نیں یاں فیر انگریزی میڈیم ۔ خورے بچے نوں اوتھے جا کے زبان دا مسئلہ نا ہووے تے اوہ سکول جا کے اپنی ماں بولی بولن دا جرم نا کر بیٹھن ایس کر کے ماں پیو ای اوہناں کولوں اوہناں دی ماں بولی کھوہ لیندے نیں۔ ایہہ میرا اپنا خیال اے۔ میں دیکھیا کہ اکثر گھراں وچ پنجابی زبان صرف کم کرن والیاں نوکراں تے نوکرانیاں نال بولی جاندی اے تے آپنے بچیاں نوں پنجابی توں دُور رکھن دی ہر ممکن کوشش کیتی جاندی اے۔ خورے ایس واسطے کہ اکثر گھراں وچ کم کرن والیاں نوکران تے نوکرانیاں نوں آپنے توں تھلے سمجھیا جاندا اے۔ کیوں جے اسیں پنجابی نوں اردو توں تھلے دا درجہ دے چکے آں ایس کر کے ایہہ زبان بس کم کرن والیاں نوکراں تے نوکرا نیاں نال گل بات کرن دے کم آؤندی اے۔

ویسے تے مینوں شرمندہ ہونا چاہیدا اے کہ میں پنجابی ہوندیاں ہویاں وی ہن آپنی زبان، پنجابی سکھ رہی آں پر میں شرمندہ نہیں ہو رہی تے ایس مارے دس رہی آں کہ میں اج کل آپنی زبان سکھن دی کوشش کر رہی آں شرمندہ ایس لئی نہیں ہو رہی کہ چلو دیر نال ای سہی پر مینوں احساس تے ہو گیا اے ۔ میرے نال میری ماں تے ہے پر ماں بولی نہیں اے۔ مینوں ایہہ احساس کس طرحاں ہویا؟ تے اوہ کیہڑی گل سی جیہدی وجہ توں میں پنجابی بولن دی کوشش کیتی؟

اک دن میں ریڈیو لایا تے اک پنجابی پروگرام سنیا۔ ایہہ میرا پہلا موقعہ سی کوئی وی پنجابی پروگرام سنن دا۔ میں خورے پورا پروگرام سنن دی وی زحمت ناں کردی جے میزبان دا گلاں کرن دا انداز اینا موہ لین والا تے سوہنا ناں ہوندا۔ ایس میزبان نے اک پنجابی نظم پڑھی جیہدے وچ اک لفظ سُلکھنا بولیا ہُن پتہ نہیں کہ ایہہ لفظ واقعی سوہنا اے جاں بولیا ایس انداز وچ گیا مینوں بوہت چنگا لگا ۔ کُجھ وی سی بس اوس دن توں بعد میں ایہہ پروگرام انج سننا شروع کیتا جیویں کوئی بندہ بوہت ضروری کم کردا اے ایہہ پروگرام سندیاں اج مینوں تِن سال ہو گئے نیں پروگرام دا ناں اے '' نال سجن دے رہئیے'' تے میزبان دا ناں اے افضل ساحر۔

افضل ساحر نے ای اک واری اک گل کیتی سی کہ جے پنجابیاں دے بچے پنجابی نہیں بولن گے تے فیر پنجابی بولن لئی لوک باہروں منگوا لئیے ایہہ گل سن کے پہلے تے مینوں ہاسہ آیا فیر میں شرمندہ ہوئی کہ واقعی جے پنجابی آپنی بولی نہیں بولن گے تے کون بولے گا۔ ایہہ گل سن کے میں پنجابی پڑھن دی کوشش شروع کیتی تے انٹرنیٹ پنجابی وچ لکھے لیکھ پڑھنے شروع کیتے تے لوکاں نال وی اردو یاں انگریزی دی تھاں پنجابی وچ لکھ کے گلاں کرن دی کوشش کیتی مینوں محسوس ہویا کہ پنجابی پڑھنا جاں لکھنا ایڈا وی اوکھا کم نہیں اے جنا ں مینوں شروع وچ لگیا سی۔ جتھوں تیک بولن دی گل اے تے میں اجے وی روانی نال پنجابی نہیں بول سکدی کیوں جے اجے زبان بوہتا ساتھ نہیں دیندی پر ہُن مینوں ایہہ پتہ لگ گیا اے کہ جے میں تھوڑی بوہتی پڑھنی لکھنی سکھ لئی اے تاں بولنی وی آجاوے گی۔ اج جے میں پنجابی زبان وچ لکھن دی کوشش کر رہی آں تے ایہدا کریڈٹ میں صرف ریڈیو پروگرام '' نال سجن دے رہئیے '' تے افضل ساحر نوں ای دیواں گی۔

میں اج محسوس کرنی آں کہ جے کوئی پنجابی دھگانے اردو بولن دی کوشش کرے تاں کیڈا عجیب سگوں بھیڑا لگدا اے مینوں غصہ آؤندا اے اوہناں لوکاں تے جو آپ آپنے بچیاں کولوں اوہناں دی بولی کھوہ کے کوئی ہور زبان اوہناں دے مونہہ وچ پاؤندے نیں پر مینوں اج ایہہ خوشی اے کہ میں اپنی زبان ول آ رہی آں تے اوس بولی وچ لکھ رہی آں جو میری ماں بولی اے۔ میں کوشش کراں گی کہ فیر جے کدے کجھ لکھیا تے اوہ ایس توں بہتر لکھاں کیوں جے اجے مینوں کجھ جھاکا اے سفر شروع کراں گی تے منزل وی مل ای جاوے گی کہ اگے ودھن لئی پہلا قدم تے چکنا ای پیندا اے تے اج میں اوہ پہلا قدم چک لیا اے۔


Share |


 

Depacco.com


 

 

Visitors Comments

Name:shafqat ali qalbani
Date:27th June

Comment: پنجابي اڪ مڻهي تي پياري زبان هي مينو پنجابي صحيح نهي آندي پر گل کرن وڇ مزا آندا هي کوئي ميرا مخول نهي ڪردا جدون مين اردو وچ گل ڪادان اردو اسپيڪنگ مزاق بڻادين
رب راکها


Visitors Comments

Name:خاور کھوکھر
Date:12th June

Comment: میں اردو وچ بلاگ لکھنا واں لیکن بولدا پنجابی ای اں
ایتھوں تک که کجھ دوست مذاق کردے نے که خاور نال انگریز فرانسیسی ،اردو یا کسی زبان وچ سوال کرو
جواب پنجابی وچ ای اوندااے
هاں میریاں جڑاں اپنی دھرتی وچ بڑیاں ڈونکیاں نے مینون اپنی بولی تے مان اے


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels