Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> سندھ وچ سندھی بولی لازمی کیوں نہیں؟ سندھ ہائیکورٹ نے سرکار کولوں جواب منگ لیا

سندھ وچ سندھی بولی لازمی کیوں نہیں؟ سندھ ہائیکورٹ نے سرکار کولوں جواب منگ لیا

وچار ڈیسک
April 16th, 2010

سندھ ہائی کورٹ نے صوبائی حکومت نوں پچھیا ہے پئی 38 سال لنگھن توں مگروں وی سرکاری تے پرائیویٹ تعلیمی اداریاں وچ سندھی بولی لازمی متھن دے قانون تے عمل کیوں نہیں ہو سکیا ہے۔ عدالت نے ایہہ حکم اقبال کاظمی ناں دے شہری دی درخواست تے دتا ہے۔ عرضی وچ دسیا گیا ہے پئی آئین دے آرٹیکل 251 ہیٹھ پاکستان دی قومی بولی اردو ہے تے اوہدے نال صوبے علاقائی بولی وی ورت سکدے نیں۔

عرضی دین والے موجب سنہ 1972ء وچ سندھ اسمبلی نے سندھی بولی نوں لازمی متھن دا قانون پاس کیتا سی جیہدے تے گورنر نے دستخط کیتے تے سندھی بولی ایکٹ 1972ء ٹو عمل وچ لیاندا گیا پر ایہدے تے عمل نہیں ہو سکیا ہے۔

سندھ ہائی کورٹ دے جسٹس مشیر عالم تے جسٹس طفیل ایچ ابراہیم تے بنے ڈویژن بینچ دے ساہمنے بدھ نوں ایس عرضی دی سنوائی ہوئی۔ عرضی دین والے اقبال کاظمی نے عدالت نوں دسیا پئی ایکٹ ہیٹھ سندھ وچ سندھی بولی نوں ساریاں سرکاری تے پرائیویٹ اداریاں وچ نافذ کرنا تے نوکری لئی سندھی بولی نوں سمجھنا تے لکھنا ضروری ہے پر ایہدے تے عمل نہیں کیتا جا رہیا جیہدے تے عمل کرن دا حکم جاری کیتا جاوے۔

عدالت نے ایڈیشنل ایڈووکیٹ جنرل سندھ میراں محمد شاہ توں پچھیا پئی کیہ سندھی بولی ایکٹ تے عمل کیوں نہیں ہو سکیا جیہدے تے اوہناں نے جواب دائر کرن وچ ویلا منگیا۔ عدالت نے اوہناں نوں چار ہفتیاں دا ویلا دتا تے سنوائی اگے پا دتی۔ میراں محمد شاہ نے دسیا پئی سندھ بولی ایکٹ دے شیڈول پنج موجب قاعدے قانون بناؤنے سن تے سندھی بولی نوں چوتھی جماعت توں بارہویں جماعت تیکر لازمی متھنا سی۔ اوہناں موجب اوہناں سیکرٹری تعلیم کولوں پچھنا ہے پئی ایس قانون تے عمل ہویا ہے یاں نہیں تے چیف سیکرٹری پالیسی بناؤن والے نیں اوہناں دی رائے وی لینی ہے اوہناں ویلا منگیا ہے۔

1972ء وچ ذوالفقار علی بھٹو دے دور وچ جدوں اوہناں دے کزن ممتاز بھٹو سندھ دے وزیر اعلیٰ سی تے سندھی بولی نوں صوبے دی سرکاری بولی بناؤن دا فیصلہ کیتا گیا سی۔ جیہدے تے اک اردو اخبار وچ 'اردو کا جنازہ ہے ذرا دھوم سے نکلے ' دے سرناویں نال اداریہ لکھیا گیا سی جیہدے مگروں کراچی وچ بولی تے فساد پھٹ پئے سن تے کئی لوک جان گنوا بیٹھے۔

سیاسی تجزیہ کار جی این مغل موجب ایس صورتحال توں مگروںوزیر اعظم ذوالفقار علی بھٹو نے اردو سندھی سوجھواناں نوں اسلام آباد سدیا سی۔ سندھی وفد دی اگوائی شیخ ایاز تے قاضی فیض محمد کر رہے سن جدوں کہ اردو ادیب رئیس امروہی دی اگوائی وچ آئے سن جیہناں نال مذاکرات توں مگروں سندھ اسمبلی توں ترمیمی قانون پاس کیتا گیا جیہنوں سندھی بولی ایکٹ ٹو کہیا جاندا ہے۔

جی این مغل دا کہنا ہے پئی مذاکرات وچ ایہہ طے ہویا سی پئی اردو بولی نوں نہیں چھیڑیا جاوے گا۔ اردو دے نال سرکاری تے پرائیویٹ تعلیمی اداریاں وچ سندھی بولی وی لازمی مضمون دے طور تے پڑھائی جاوے گی تے صوبے دی سرکاری بولی سندھی ہووے گی۔ پر بھٹو دی سرکار جان توں مگروں ایہدے تے عمل رک گیا۔

سندھ وچ قوم پرستاں دی ایہہ وی اک پرانی منگ رہی ہے پئی سندھی نوں سرکاری بولی دے طور تے لایا جاوے۔ ایس سال ستاراں فروری نوں سندھ اسمبلی نے وی اک قراداد وچ منگ کیتی سی پئی سرکاری تے پرائیویٹ تعلیمی اداریاں وچ سندھی نوں لازمی پڑھایا جاوے۔

ہائی کورٹ وچ سندھی بولی لازمی متھن لئی پٹیشن دائر کرن والے اقبال کاظمی باراں مئی دی واپری دے وی عرضی دے چکے نیں۔ اوہناں کولوں جدوں ایہہ پچھیا گیا پئی جیہڑے معاملے تے فساد پئے نیں ایہدے تے اوہناں عدالت وچ جانا کیوں ضروری سمجھیا تے اقبال کاظمی نے کہیا ستر دے دھاکے وچ لسانیت دا رجحان سی پر ہن قوم اک مٹھ ہے تے سانجھ دی گل کیتی جارہی ہے۔ اوہناں موجب حکومت قانون تے عمل نہیں کر رہی ایس لئی اوہ عدالت وچ گئے ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels