Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> دیس بولیاں نُوں وی نویں قنون دی لوڑ

دیس بولیاں نُوں وی نویں قنون دی لوڑ

April 7th, 2010

کیہ ساڈے دیس دیاں بولیاں لئی وی نویں قنون دی لوڑ اے۔ جس طرحاں دستور وچ نویاں بدلیاں کرکے ایس نوں اجوکے ویلے دیاں لوڑاں موجب بنایا گیا اے اِنج ای ساڈے دیس دیاں ساریاں بولیاں نوں وی اوہناں دا جمہوری ، انسانی، تعلیمی تے وجودی حق دیون دی لوڑ اے۔اُردو پچھلے باٹھ ورھیاں وچ ساڈی قومی تے تعلیمی تے علم تے ٹیکنالوجی دی بولی نہیں بن سکی ایس لئی 1973دے دستور وچ بدلی کرکے وفاق دیاں ساریاں بولیاں نوں قومی بولی دا درجہ دے دتا جاوے تے ایہناں نوں تعلیم، دفتر تے عدالت دی بولی بنا دتا جاوے۔ بارہویں تیک ساری پڑھائی دا وسیلہ ماں بولی نوں متھ لیا جاوے تاں جے چھیتی توں چھیتی سو فیصد پڑھتا دا نشانہ حاصل کیتا جاوے۔ ایس ورھے توں بالاں نوں تعلیم دا وسیلہ انگریزی کیتا جا رہیا اے ایس لئی بالاں ایس ورھے توں انگریزی دے نال ماں بولی وی پہلی جماعت توں لا دتی جاوے۔

آکھن نُوں تاں اسیں ساریاں گلاں کری جاندے آں جیویں ایہہ ساریاں منیاں جانیاں نیں۔ پر میں تاں نرا مخول کردا پیا آں حقیقت کیہ اے آؤ ایہہ وی ویکھ لئیے۔

پچھے جیہے سندھ توں قومی اسمبلی دے ممبر یوسف تالپور دستوری کمیٹی نُوں ایہہ صلاح وی دین نوں پھردے سن پئی پاکستان دیاں ساریاں بولیاں نوں قومی بولیاں قرار دے دتا جاوے۔ ایس صلاح اُتے چالی ممبراں نے دستخط وی کر دتے سن پر ایس دا کیہ حشر ہویا ایہہ ساڈے اک اخبارچی تے کالم کار راہیں پڑھن دا آہر کردے آں۔

رؤف کلاسرا اک جوان لکھن آلے اخبارچی نیں خورے ایس لئی سچ لکھن دا حوصلہ وی اے کیوں جے ہن تاں ایہہ حال اے پئی بوہتے اخبارچیاں دے کالماں وچ اوہناں دے گل نوں تے اسٹیبلشمنٹ دی گل وچ نکھیڑا کرنا اوکھا اے۔ اُردو دے بوہتے لکھاری سجے بنے دے نیں تے اوہناں لئی ماں بولی دی گل اُنج ای موت اے کیوں اوہناں دی ساری مشہوری تے رزق اُردو نال جڑیا ہویا اے۔ انگریزی اخبار بولی بارے گھٹ سوڑے نیں کیوں جے اوہناں نوں خیال اے پئی انگریزی تاں مُک نہیں سکدی نالے انگریزی دی پڑھائی اکھ نوں اک موکھلی تے کُھلی تکنی دیندی اے۔ جہان نوں تکن دا تے شیواں نوں سمجھن دا۔ رؤف جی دویں بولیاں وچ لکھدے نیں اُردو تے انگریزی وچ پر اصلوں اوہ انگریزی دے اخبارچی نیں۔ اپنے ہفتے وار کالم وچ جیہڑا روزوار جنگ وچ چھپدا اے اوہ لکھدے نیں۔

''جد توں ایہہ گل میرے علم وچ آئی اے پئی سینیٹ تے قومی اسمبلی دے ممبراں نے اردو، پنجابی، سرائیکی، سندھی، بلوچی، پشتو، ہندکو، پوٹھوہاری، بلتی تے دوجیاں بولیاں نُوں قومی بولیاں قرار دین دے بل نوں ایم این اے یوسف تالپور دے مونہہ تے مار دتا اے ایس مگروں مینوں ایہناں سیاستداناں توں کوئی آس نہیں رہی۔40 ایم این ایز نے ایس اُپر دستخط کیتے سن۔جیہڑی اپنی ماں بولی نوں ای منن نوں ای تیار نہیں ایہناں توں تُسیں کیہ آس رکھ سکدے اوہ۔ جیہناں لئی اپنی ماں بولی بل وچ شامل کرنا اک فضول کم اے اوہ سانوں اک نویں انقلاب دی خوشخبری سُنا رہے نیں۔بنگالی بولی نوں وی اِنج ای ورودھ دی اکھ نال ویکھیا گیا سی جیویں اج ساڈیاں بولیاں نوں ویکھیا جاندا پیا اے۔ ایہہ تاں سیاستدان ہون دی نقل وی نہیں کرسکدے۔''

رؤف کلاسرے دیاں ایہہ گلاں سچیاں نیں کیوں جو دل چوں نکلیاں نیں کیہ سانوں اپنی بولی دی گل منوان لئی اک ہور بنگلہ دیش اُڈیکنا پئے گا یاں ساڈے جمہوری آگواں لئی جمہوریت دا مطلب اوہناں دی اپنی تبدیلی اے لوکاں دی نہیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels