Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> کیہ اردو نوں دفتری بولی بنا دینا چاہیدا اے؟

کیہ اردو نوں دفتری بولی بنا دینا چاہیدا اے؟

March 19th, 2010
4 / 5 (1 Votes)

وچار وٹاندرے دا سرنانواں سی "کیا اُردو کو دفتری زبان بنا دینا چاہیے؟" تے ایس وچ گل بات کرن آلے سن ایم کیو ایم دیاں خوش بخت شجاعت، پیپلز پارٹی دے نواب یوسف تالپور، عوامی نیشنل پارٹی دے افراسیاب خٹک، تے بی این پی دے سینٹر میر حاصل بزنجو۔

گل بات دا مُدا ایہہ سی کیوں جے 1973دے دستور موجب اُردو نوں پاکستان دی دفتری بولی بنا دینا چاہیدا سی تے ایس لئی مدت 15 سال سی تے کیوں جے ایہہ مدت 1988وچ پوری ہو جاندی اے ایس لئی کیہ ایس نال آئین دی اُلنگھنا نہیں ہوئی۔آکھن نوں تاں بندہ پُچھ سکدا اے پئی بھلیو کیہڑا آئین تے کیہڑا دستور جس دے ہر داہ ورھیاں مگروں فوجی سرکار چھوڈے لا دیندی اے۔ مُڑ ساریاں آئینی شقاں نری اُردو اُتے عمل کران لئی بچدیاں نیں کیہ رہندے آئین اُتے پورا عمل ہو گیا اے۔ پر سوال ایہہ وے پئی 1988 نوں لنگھے وی 22 ورھے ہو گئے نیں ہن چیتے آیا اے پئی اُردو دفتری بولی ہونی چاہیدی اے۔

اصلوں ایہہ ساری گل بات جھوٹوں جھوٹ بتالی اے۔ ہویا ایہہ اے پئی گیلانی سرکار دے گھٹو گھٹ پنج وزیراں تے گھٹو گھٹ چالی قومی اسمبلی دے پیپلز پارٹی دے ممبراں نے قومی اسمبلی دی آئینی بدلیاں دی کمیٹی اگے اک صلاح دتی اے پئی سندھی تے ہور ست بولیاں نوں جیہڑیاں ملک اندر بولیاں جاندیاں ہن اُردو دے ساہواں قومی بولیاں دا رُتبہ دے دتا جاوے۔ تے ایس گل دی سُوہ لگن نال ای اُردو والیاں نوں اپنی دفتری بولی دا نہ لاگو ہون چیتے آگیا اے۔ جد وی قومی بولیاں نوں اوہناں دی بندی تھاں دین دی گل ہوندی اے اُردو نوں غشی دی دورے پینے چھوہ پیندے نیں پئی اُردو دا کیہ بنے گا۔ اِنج ای اک واری جنگ فورم وچ گل بات دا ٹاکرا ہوندا پیا سی جد کسے پُچھیا پئی پنجابی دے آؤن نال اُردو دی کیہ تھاں ہووے گی تے ایس دے جواب وچ افضل احسن رندھاوا ہوراں آکھیا پئی اسیں اُردو دا کیہ کیتا اے؟ کیہ اساں اوس دی جُتی لاہ لئی اے یاں چدر کھوہ لئی اے؟

ہن وی اصلوں گل دا سرناواں ایہہ ہونا چاہیدا سی پئی پاکستان دیاں ساریاں بولیاں نوں قومی بولیاں قرار دے دتا جاوے کہ نانہہ؟

اُردو نوں دفتری بولی بناؤن دی گل وی کر لئیے۔ ہن اُردو نوں دفتری بولی بناؤن دا ویلا ٹپ گیا ہویا اے۔ اُردو نے جناں آنا سی آ گئی ہور ایس نے نہیں آنا کیوں جے ایس اندر ایناں ست ای نہیں اے۔ 62 ورھیاں توں اردو نوں کھیڈن دی کُھل دتی گئی پر ایہہ کجھ وی نہ کرسکی جیہناں آنا سی آ گئی۔ ایس اندر دفتری بولی بنن دا ست ای نہیں اے۔ ارباں رُپیہ لوکاں دا سرکاری اداریاں نوں دتا گیا پئی اُردو دی لفظالی بنائی جاوے پراوہ اینی اوکھی سی پئی کسے دے پلے نہ پئی نہ اوہ چلی۔ اردو دا اپنا کوئی بولی ورثہ ہے نہیں آ جا کے عربی فارسی توں مانگویں لئی دفتری لفظالی سِر اُتوں لنگھ جاندی اے۔ سگوں حساب ہونا چاہیدا اے جیہناں ایس قومی دولت نوں اجائیں کیتا اے۔

وچار وٹاندرے وچ کسے وی اُردو نوں دفتری بولی بناؤن دی گل نہ کیتی سوائے خوش بخت شجاعت دے کیوں پئی اوہناں دی ماں بولی اُردو اے۔

ساریاں نیں ایہہ گل کیتی پئی بنگلہ دیش بنن دا وڈا کارن بولی دا سوال سی جد بنگالیاں نوں اوہناں دی بولی دا حق دین توں نہ کر دتی گئی۔ تے ایس لئی 21 فروری نوں پورے جگ وچ بولی دیہاڑ من لیا گیا۔جد بنگالیاں نوں اپنی بولی دے حق وچ وکھالا کرن اُتے گولی مارد تی گئی۔

خوش بخت شجاعت وی اُردو دی وکالت کیتی تے ایس نوں ساریاں دی بولی دسیا ،کیویں پتہ نہیں۔ ایس نوں لشکری بولی دسیا جیہڑی لشکر بنن مگروں پنجاب دی میداناں وچ اُسری تے ودھدی۔

افراسیاب خٹک نے گل ٹوری پئی اُردو ساڈی بولی نہیں اے۔سانوں سکھنی پیندی اے۔ساڈیاں بولیاں نال مندا ورتارا کیتا گیا۔اوہناں نوں دبایا گیا۔صوبیاں نوں اختیار پئی اوہ اپنی بولی نوں ترقی دے سکدے نیں پر اوہناں وی نہیں کیتی۔آئینی کمیٹی کم کردی پئی اے ساڈی وی ایہہ صلاح اے پئی پاکستان دیاں ساریاں بولیاں نوں قومی کردتا جاوے۔ بھارت وچ ہندی قومی بولی اے پر ایس نال 22 دوجیاں بولیاں نوں وی قومی بولیاں دا رُتبہ ملیا ہویا اے۔ اوہناں دسیا پئی نیشنل سٹیٹ تے نیشن سٹیٹ لئی وی بولیاں نوں اوہناں دا حق ملنا چاہیدا اے۔

سنیٹر میر حاصل بزنجو نے کہیا جد پاکستان بنیا تے صوبیاں وچکار جھیڑا شروع ہو گیا تے اُردو وی ایس جھیڑے وچ رل گئی کیوں جے ایہہ پاکستان نال نتھی ہو گئی۔ پاکستان مسلمان ملک بن گیا تے ایہہ مسلماناں دی بولی بن گئی پاکستانیت دی نشانی اُردو بن گئی جد دوجیاں صوبیاں دا مرکز نال ٹکرا ہویا ایہہ مرکز نال کھلو گئی۔ بنگال وچ بولی دا جھیڑا ہو گیا تے ایہہ پاکستان دی علامت بن گئی۔

حامد میر ہوراں اُردو دے لشکری بولی ہون تے اعتراض کیتا تے آکھیا اُردو نوں کوئی ہور ناں دینا چاہیدا اے۔ یوسف تالپور ہوراں آکھیا ساڈی بولی سندھی 5000 ورھے پرانی اے ایس وچ عدالتی تے ریونیو دا ریکارڈ وی ملدا اے۔ اوہناں آکھیا اسیں چاہندے آں ساریاں بولیاں نوں قومی قرار دے دتا جاوے۔

آخری گل ایہہ وے پئی میں ایہہ ساری گل بات اکھیں ڈٹھی تے کنیں سُنیں تے جد اج اخبار کھولیا تے اوس وچ ایس پروگرام بارے ایہہ سُرخی لگی ہوئی سی۔ اُردو کو دفتری زبان بنانے کے لئے مزید وقت دیا جائے: افراسیاب ۔ ایہہ ساری گل جھوٹی اے اُردو پریس تے اُردو میڈیا آپے جو کردا اے اوس نوں وی کُھل نال پیش کرن دی سکت نہیں رکھدا۔ افراسیاب دی ساری گل نوں ولا کے اپنی گل لئی ورت لینا اُردو دا ای کمال اے۔ پر سچ ایہہ اے پئی اُردو کدی وی دفتری بولی نہیں بن سکدی ایس دا ویلا ہن لنگھ گیا اے۔ ہن تاں نرا ساریاں لوک بولیاں نے آؤنا اے تے ساریاں نے قومی بولیاں ہونا اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels