Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> پاکستانی پنجاب وچ ہن تیکر دی سب توں وڈی پنجابی ڈکشنری

پاکستانی پنجاب وچ ہن تیکر دی سب توں وڈی پنجابی ڈکشنری

وچار ڈیسک
February 22nd, 2010

ہندوستانی پنجاب وچ پنجابی بولی گرمکھی طریقے نال لکھی جاندی ہے تے اوتھے پنجابی بولی دیاں بڑیاں ڈکشنریاں نیں پر پاکستانی پنجاب وچ پنجابی بولی نوں اردو وانگوں لکھدے نیں جیہنوں شاہ مکھی کہیا جاندا ہے تے ایہدے وچ ڈکشنریاں بہت گھٹ نیں۔ پنجابی بولی دے سکالر شفقت تنویر مرزا دسدے نے پئی پنجابی ادبی بورڈ نے حالیں جیہڑی پنجابی اردو ڈکشنری چھاپی ہے اوہ ہن تیکر چھپن والیاں ساریاں ڈکشنریاں توں ایس لئی چنگی ہے کیوں جو اوہدے وچ کل لفظ تے اکھان وی بہتے نیں تے پنجاب دی ہور علاقائی بولیاں دے لفظ تے اکھاناں دی گنتری وی دوجیاں ڈکشنریاں نالوں ودھ ہے۔

ہندوستان دی ونڈھ توں پہلوں سردار محمد خان ناں دے اک سرکاری نوکر نے اپنے چاء نال پنجابی اردو ڈکشنری لکھنا شروع کیتی سی جیہڑی ستر دے دھاکے دے چھیکڑلے حصے وچ آکے پوری ہوئی۔اللہ بخشے سردار خان دا سانگا جالندھر نال سی پر تقسیم ہند دے مگروں اوہ پاکستان آگئے سن۔شفقت تنویر مرزا نے دسیا پئی سردار خان دے ایس جتن توں پہلوں پنجابی دے سکالر محمد آصف خان نے جیہناں دا سانگا پنجابی ادبی بورڈ نال سی سلاہیا تے ایس ڈکشنری دی چھپوائی دیاں کوششاں کیتیاں پر اوہناں موجب آصف خان دیاں کوششاں کامیاب نہ ہوئیاں تے ایہہ ڈکشنری فیر سچل سٹوڈیوز دے مشتاق صوفی تے عزت مجید دیاں کوششاں نال اخیر لکھن توں تریہہ سال مگروں چھپ سکی۔

اک سوال دے جواب وچ شفقت تنویر مرزا نے کہیا دنیا دیاں سب توں چنگیاں ڈکشنریاں نال ایس ڈکشنری دے مقابلے دا کوئی سوال ہی پیدا نہیں ہوندا۔ اوہناں نے کہیا ویبسٹر یاں آکسفورڈ دیاں ڈکشنریاں چکو تے ویکھو پئی کیویں ہر ہر مضمون دے ماہراں دے ناں ایہناں ڈکشنریاں دے لکھن والیاں وچ رلتی نیں۔ اوہناں دا کہنا سی پئی ایہہ پنجابی اردو ڈکشنری اُکا اک بندے دا جتن ہی اکھوا سکدا ہے تے اوہناں موجب پنجابی دی بین الاقوامی معیار دی ڈکشنری لکھن لئی ماہراں دی بہت وڈی ٹیم چاہی دی ہووے گی۔

شفقت تنویر مرزا نے کہیا سی پئی پنجاب وچ برطانوی دور توں پہلوں کسے پنجابی ڈکشنری دی کوئی سوں نہیں لگدی تے انگریزاں نے اپنے وارہے وچ کیوں جو مقامی بولی سکھن تے اُچیچی توجہ کیتی سی ایس لئی اوہناں لدھیانہ وچ پنجابی بولی وچ ترجمیاں دا اک اڈہ بنایا سی۔ اوہناں کہیا ایس اڈے وچ ہوون والے کم دے کارن ہندوستانی پنجاب وچ سکھ سکالرز نوں بڑی مدد ملی تے گرکھی دیاں واہواں ڈکشنریاں لکھیاں گئیاں۔اوہناں کہیا پاکستانی پنجاب وچ پنجابی بولی دی ترقی تے ڈکشنریاں لکھن دا کم کجھ گھٹ ہویا ہے پر ایتھے چنگے معیار دا پنجابی ادب لکھیا جاندا رہیا ہے تے اوہناں موجب جے سرکاری ادارے مالی وسیلے دیون تے پنجابی دی وڈی ڈکشنریاں وی لکھیاں جاسکدیاں نیں۔

اک سوال دے جواب وچ شفقت تنویر مرزا نے کہیا ہندوستان دی ونڈھ توں پہلوں پنجابی وچ ترجمے سانوں بہتے اوہناں رسالیاں دی شکل وچ ملدے نیں جیہڑے بولی سکھن وچ مدد گار ثابت ہوندے سن کیوں جو ایہو انگریزاں دی لوڑ سی۔ تقسیم ہند توں مگروں ڈکشنریاں ول توجہ ہوئی پر پاکستانی پنجاب وچ ایہہ توجہ ناں دی ہی رہی اوہناں موجب پنجاب یونیورسٹی دے پنجابی ڈیپارٹمنٹ نے جیہڑی ڈکشنری لکھی اوہ سردار خان دی ایس ڈکشنری دے دسویں حصے دے بروبر ہے تے اردو سائنس بورڈ نے ایہدے توں دو نکیاں نکیاں پنجابی ڈکشنریاں لکھیاں جیہناں دے مگروں اقبال صلاح الدین دی لکھی اک وڈی ڈکشنری چھپی جیہڑی سردار خان دی لکھی ایس ڈکشنری نالوں بہرحال نکی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels