Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> ماں بولی دیہاڑ اُتے بُھکھ ہڑتال

ماں بولی دیہاڑ اُتے بُھکھ ہڑتال

وچار ڈیسک
February 21st, 2010
5 / 5 (1 Votes)

لہور (زبیر احمد توں) ۔21 فروری نوں جگت ماں بولی دیہاڑ اُتے پنجابی نیشنل کانفرنس دے چئیرمین چوہدری نذیر کہوٹ تے پنجابی کھوج گڑھ دے آگو اقبال قیصر ولوں سانجھے پکھوں بُھکھ ہڑتال کیتی گئی۔ایس موقعے اُتے گل بات کردیاں نذیر کہوٹ نے آکھیا کہ پنجاب دی دس کروڑ لوکائی دا دستوری، قنونی،جمہوری، اخلاقی تے قدرتی حق اسٹیبلشمنٹ تے ریاست نے پچھلے باٹھ ورھیاں توں مل ماریا ہویا اے۔ جس پاروں ماں بولی دے وجود تے دھرتی ماں دی راکھی نوں ڈاڈھے ڈر نیں۔ اوہناں آکھیا کوئی وی بولی، ادب، رہتل سرکار دے تھاپڑے بناں نہیں جیو سکدی۔ پاکستان دے بنن توں لا ہن تیک ہر جمہوری تے غیر جمہوری سرکار، اسٹیبلشمنٹ تے سیاسی جماعتاں دا عمل ڈھیر نندن جوگ رہیا اے۔

اوہناں کُل پرائیوٹ تے سرکاری سکولاں وچ پنجابی نوں لازمی مضمون پڑھاؤن دی منگ کیتی۔ اوہناں ہر تھاں اُتے پنجابی دی ورتوں کرن دی منگ کیتی۔اوہناں گھراں وچ ماں بولی بولن اُتے زور دتا۔ اوہناں آکھیا جے کوئی اپنی بولی نہ بولے تے اوس نوں ضرور پُچھیا جاوے تہانوں اپنی بولی بولن وچ کیہ تکلیف اے۔

اوہناں پنجابی نوں لازمی مُڈھلی تعلیم دا انگ بناؤن دی منگ کیتی۔ نال ای پنجاب دے سرکاری، دفتری، عدالتی بولی دا درجہ دین دی گل کیتی۔ پنجابی یونیورسٹی، پنجابی لینگوئج اتھارٹی، پنجابی ٹیکسٹ بورڈ، پنجاب یونیورسٹی وچ شعبہ پنجابیالوجی قائم کرن دی منگ کیتی۔

ماں بولی دے حق لئی ہون والی پہلی بُھکھ ہڑتال وچ ڈھیراں سُوجھواناں، بولی کامیاں، سوانیاں تے ہور لوکاں نے رلت کیتی۔ ایس موقعے اُتے پنجابی بولی دے حق وچ نعرے لائے گئے۔ ایہہ بُھکھ ہڑتال سویرے دس وجے توں شامیں چار وجے تائیں چیئرنگ کراس اُتے پنجاب اسمبلی دے ساہمنے کیتی گئی۔

جو جی سویر توں اخیر تائیں بیٹھے اوہناں چوں کجھ جیاں دے ناں اِنج نیں۔ اقبال قیصر، نذیر کہوٹ، دیپ، حمید محسن، ڈاکٹر اُلفت، آغا علی مزمل، کرامت علی مُغل، راجہ نیر، سعید آسی، بابا نجمی، جمیل احمد پال تے زبیر احمد۔

نیشنل یوتھ فورم ولوں رضوان بھٹی، یوسف پنجابی، آشراٹھوال، شیراز شرف، سید احسن گیلانی، زارا مُغل، سیف الملوک سیفی، تے ہو ر ڈھیر سجن رلتی سن۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels