Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> واہ اوئے پنجابیو!

واہ اوئے پنجابیو!

پریت مہندر کلسی
January 29th, 2010

آپاں آس کردے ہاں کہ ہر پنجابی نوں پنجابی بولنی ضرور آؤندی ہووے گی۔ پر کینیڈا وچ بہتے پنجابی بچیاں دا رشتہ پنجابی نال لادن اتے بُش ورگا ہے، پنجاب وچ وی انگریزی ماڈل سکولاں دی مہربانی نال بہتے بچے پنجابی نوں بائے بائے کر چُکے ہین۔ کہیا جاندا "ماں بولی جے بھل جاووگے، ککھاں وانگوں رُل جاووگے" پر پنجابیاں نے تاں آپنی ماں بولی نوں ککھاں وانگ رولن دی ٹھانی لگدی ہے۔ عورتاں آپس وچ گلاں کردیاں آپنی انگریزی بولن دی ٹوہر وکھاؤندیاں بچے بارے دسن گیاں، "نہ ایہہ اِیٹدا، نہ ڈرنکدا، بس وِیپدا ای وَیپدا۔"

پنجاب وچ سرکاری کم کار بہتا انگریزی وچ ہی ہوندا ہے۔ آگو پنجابی نوں نقصان پہنچاؤن وچ کسر نہیں چھڈدے تے لوڑ پین تے پنجابی دے حق وچ بیان داغن توں وی پچھے نہیں رہندے۔ عام بندہ بھاویں اوہ پنجاب وچ ہووے جاں دنیا دے کسے وی حصے وچ، اوس نوں تاں لون تیل (کینیڈا وچ مارگیج) دا فکر ہی لگا رہندا ہے۔ گردیال پنجابی دے شعر وچ پنجابی دے لفظ پاؤن دی گستاخی کر رہیا ہاں،

اوہ ہن تک تاں رہا دیندا جڑھاں وچ تیل پنجابی دے (ساڈے)
بڑا ہی فکر اجکل اوس نوں پنجابی دے (ساڈے) حال دا رہندا اے
کلا دے ارتھ کیہ سمجھے ادب دی سار کیہ جانے
سدا ہی فکر لگا جس نوں روٹی دال دا رہندا اے۔

پنجابی دی سیوا کرن وچ کجھ گائک وی پچھے نہیں رہے۔ گیت پنجابی دا ہوندا ہے تے تڑکا اوس نوں انگریزی دا لا دیندے ہین، گیت دے بولاں وچ گل پنجابی مٹیار دی پھلکاری تے گت نال ہو رہی ہوندی ہے اتے ویڈیو وچ ماڈل کٹے والاں نال منی سکرٹ پائی وکھائی دیندی ہے۔

پنجابی دی ترقی لئی سیمینار وچ سوجھوان اجیہے پرچے پڑھدے ہین کہ عام بندے دے اُپر دی لنگھ جاندی ہے ایہناں دی پنجابی،

دانشور وی کر جاندے نے کنی واری بونی گل
جے پچھو تاں کہہ دیندے نے تیری سمجھ نہیں آؤنی گل

شام نوں کسے ہوٹل وچ پروگرام دا تھکیواں لاہون لئی اکٹھے ہوئے سوجھوان کباب نال دو اک لنڈو جہے شراب دے پیگ لا کے انگریزی وچ شباب دیاں گلاں کرن لگدے ہین۔ شوکت ڈھنڈواڑوی دا شعر ہے،

لاہیا نقاب چہرے کئی داغدار نکلے
چوراں دے ناں پڑھے سبھ پہریدار نکلے
اسیں سوچیا سی سانوں دسن گے روگ بارے
افسوس! سبھ مسیحے خود ہی بیمار نکلے۔

پنجابی نال بہتے موہ دا وکھالا چاہندے کئی وار دوجے نوں اوکڑ وچ پا دیندے ہن۔ ایسے طرحاں دے اک سجن نوں اک بی بی ایتھے کینیڈا وچ رستہ پچھ بیٹھی۔ اوس نے دسیا، گھر والے کول جا کے مکھن دا کپ لے لئیں، کرین تے چڑھ کے بدل تے پہنچ جاویں گی۔ اوہ عورت پریشان ہو کے کہندی، بھائی صاحب، میں تہانوں رستہ پچھیا، تسیں مینوں اسمان وچ بھیجی جاندے ہو۔ اوہ سجن غصے ہو کے بولے بی بی تہانوں کنیڈا آ کے پنجابی سمجھ آؤنوں ہٹ گئی، میں تینوں انگریزی وچ دس دینا، نیئر فرام ہسبنڈ ڈرائیو ٹیک بٹرکپ سٹریٹ دین ٹیک کرین روڈ اینڈ یُو ول ریچ کلاؤڈ ایوینیو۔

پنجابی جتھے وی گئے ہن، اوہناں نے ہر کھیتر وچ ترقیاں کیتیاں ہن۔ آؤ پنجابی بنیئے، پنجابی بولی نوں پنجابی وسیب نال جذباتی طور تے جوڑیئے اتے آپنی پچھان نوں ہور مضبوط بنائیئے تاں جے ہر کوئی کہے واہ اوئے پنجابیو۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels