Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> بال اپنی ماں بولی وچ روندے نیں

بال اپنی ماں بولی وچ روندے نیں

December 28th, 2009

اک اخباری خبر موجب فرانسیی تے جرمن بولی سیانیاں نے دس پائی اے پئی بال اپنی ماں بولی وچ روندے نیں۔ فرانس تے جرمنی دی نرول کھوج وچ دسیا گیا اے پئی بال اصلوں اپنی ماں بولی دے اُچارن ڈھنگ وچ روندے نیں۔ کھوج موجب اپنے جمن دے پوند دناں وچ ای فرانسیسی بال جرمن بالاں توں وکھ ڈھنگ نال روندے نیں کیوں جے ایہناں دی واج دے سُر ہیٹھاں تُوں اُتانہہ ول جاندے نیں جد کہ جرمن بالاں دے سُر اُتانہہ توں ہیٹھاں ول آؤندے نیں۔ کھوجیاں موجب ایس رون دے فرق دا کارن دوہاں بولیاں دے اُچارن ڈھنگ یاں بولن لگیاں واجاں دے ہیٹھاں اُتانہہ کرن دا نکھیڑواں فرق اے۔

ایس توں پہلاں اسیں ایہہ وی کھوج کرئی بیٹھے آں پئی بال اجے کُکھ وچ ای ہوندا اے جد اوہ اپنی ماں بولی دیاں واجاں توں جانُوں ہو جاندا اے۔ اساں ایہہ وی ویکھیا اے پئی اک جی اپنی بولی کجھ ورھیاں توں چھڈی بیٹھا اے یاں اوہدے ماپیاں اوس نال اوہدی بولی نہیں بولی پر اوہ جد اپنی بولی ول پرتدا اے تاں چھیتی ای فر فر اپنی بولی بولن لگ پوندا اے۔اِنج لگدا اے پئی اوس اپنی بولی تاں کدی وساری ای نہیں سی تے ایہہ سدا تُوں ایس دے نال اے کیہ اے جنیٹک میموری
(Genetic memory)
دا کمال اے یاں کیہ گل اے۔ اِنج لگدا اے پئی اوس اندر ایہہ ربوں اُساری جا چُکی سی۔ جیویں کوئی کمپیوٹر دی پروگرامی ہو گئی ہووے۔ جد بندہ اپنی بولی ول پرتدا اے تاں جھبدے ای اک دم ساری لفظالی چیتوں اُگھڑ اُگھڑ پیندی اے تے بندے نُوں جاپدا اے پئی اوہ تاں اپنی بولی توں کدی دور نہیں رہیا تے ایہہ تاں سدا اوہدے اندر سی پر اوہ ای بُھلی بیٹھا سی تے ہن اک دم حاضر ہو گئی اے۔

اک ہور سوہنی گل جگ دے مشہور بولی تے سیاست سیانے نوم چوسکی نے کیتی سی۔ عام خیال اے پئی بال پوند وچ بولی نقل راہیں سکھدا اے جد ماں وار وار اوس نُوں شیواں دے ناں سکھاندی اے تے جیویں اوہ وڈیاں نُوں بولدا سُندا اے تے مُڑ ایس نُوں نقل راہیں سکھدا اے۔ پر نوم چوسکی نے وادھا کیتا پئی ایہہ صحیح اے پئی بال نقل راہیں بولی سکھدا اے پر اوہ ایس سکھن آہر وچ اپنی کرت وی پاؤندا اے اوہ بولی نُوں بناؤندا تے گھڑدا وی اے تے ایس وچ اپنی بولی دی نویں اُساری وی کردا اے کیوں جے اپنی بولی دی گرائمر اوس وچ ربوں پادتی گئی اے اوہ اپنی بولی دی گرائمر نہیں سکھدا ایہہ ایس وچ پہلوں ای حاضر ہوندی اے۔

ایہہ ساریاں گلاں صیح نیں تے اوہناں دیساں دیاں نیں جتھے ماں بولیاں پردھان نیں تے جتھے بالاں نُوں پرجوھی بولیاں نہیں سکھنیاں پیندیاں تے اِنج اوہناں دا رون تے ہسن سچا اے قدرت ڈھنگ موجب اے۔ پر ساڈے بال جو اوبھڑ بولیاں دی مار وچ نیں اوہناں دا ہسن رون کیہ اے۔ کیہڑی بولی وچ اوہ ہسدے روندے نیں۔ جے بندہ اپنی بولی چھڈ دیوے تاں کیہ اوہدا ہسن رون وی بدل جاندا اے؟ کیہ پنجابی تے بلوچی تے سندھی تے پختون تے بروہی وی وکھ وکھ ڈھنگ نال روندے نیں۔ ایہناں دیاں آوازاں دا کیہ فرق اے؟

اسیں تاں ایویں من پرچاون لئی ایہہ گلاں کردے پئے ساں جتھے نہ بولی نُوں منیا جاندا ہووے اوتھے ساڈا ہسن رون وی کس نے مننا اے۔ لگدا اے سانوں اک سُر وچ رون ہسن دی سکھیا دین دا آہر ہویا اے پر ایس آہر وچ جیہڑے اک سُر ہوئے اوہناں اپنا ہاسا وی گوایا تے رون وی۔

پر بولی نوں نہ منن اِنج ای اے جیویں رُکھ کٹن، پہاڑ کٹن، دریاواں دا سُک جاون، پکھیرواں دا مر جاون، گلیشئر دا پگھرن، جنگلاں دا مُکن، روندے بال نُوں چنڈ مار کے چُپ کراون، سوانی نال مونہہ کالا کرن، قدرت دے ورودھ لڑن۔

اسیں لوکاں نُوں اوہناں دی بولی دا حق نہ دے کے اوہناں دا رون تے ہسن وی تاں کِتے نہیں کھوہندے پئے؟ جد بندہ اپنی بولی وچ ہسن رون جوگ ای نہیں تے تاں اوہ کیہ اے۔ بولی سیانے تاں ایہہ تیک کہندے نیں پئی چُپ وی اپنی بولی وچ ای ہوندی اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels