Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> گرو دی لاش فریزر وچ: عدالت وی ہتھ چک دتے۔ماملہ پورے12ارب دا

گرو دی لاش فریزر وچ: عدالت وی ہتھ چک دتے۔ماملہ پورے12ارب دا

وچار ڈیسک
July 6th, 2017

لڑائی کسے دی ہوندی ہے تے پھس عدالتاں جاندیاں نیں کہ ایہہ اینگلو سیکسن قنون دا وڈا مسئلہ جے۔مسئلہ گرو پاروں چوڑ نہیں ہویا سگوں بارہ ارب دی ملکیتاں پاروں لما ہو گیا ہے۔ہندواں وچ اک نواں مالدار فرقہ اج کل اگے جا رہیا ہے اتے اوس دے گرو’’ اشوتوش مہاراج‘‘ ہوری جنوری 2014 وچ پورے ہوگئے سن۔ پر انہاں دے مریداں دا آکھنا سی کہ گرو ہوری روحانی نیندر وچ نیں اتے اج یا کل مر اٹھ جان گے۔ ایس پاروں ڈھائی سالاں تو گرو دی لاش اک فریزر وچ رکھی ہوئی ہے۔ ایس نویں ہندو فرقے دا ناں ہے ’’دیوا جوتی جاگرتی سنتھان‘‘ جس دا مطلب ہی روحانی روشنی نوں جگاون دا مشن ہے۔ پنجاب دے ہندواں دا ایہہ گرو اک سو ایکٹر دے آشرم دے اک کمرے وچ پئے فریزر وچ پیاہے۔ پچھلے ڈھائی سال توں ایس خلاف پنجاب چندی گڑھ کورٹ وچ اوس دے پتر ہون دے دعویدار دلیپ کمار جھا ہوراں پٹیشن کیتی ہوئی سی۔ پر ہن ایس پٹیشن دا فیصلہ جھاہوراں خلاف آگیا ہے۔
اے ایف پی نے ایہہ خیر پورے ریجھ نال چھاپی ہے۔ جھاہوری کتھے باز آون والے نیں کہ اوہ اپنے پیونوں ہندو رسماں راہیں ٹورنا چاہندے نیں۔ انہاں آکھیا پئی میں ہن سپریم کورٹ اپڑاں گا۔ مسئلہ پیو توں ودھ اوس دولت دا ہے جیہڑی گرو ہوری چھڈ گئے نیں۔ ایس دولت دے دو حصے نیں کہ اک تے مریداں دا ہڑھ ہے جیہڑا براعظماں تے پھیلیا ہویا ہے۔پر ایس دا دوجا حصہ اک لمیری جداد ہے۔ایہہ دسیا جاندا ہے پئی ہندواں وچ ایہہ نواں فرقہ 1983وچ بنایا گیا سی۔ جھاہوراں دا آکھنا ہے کہ گرو ہوری بہاری نیں اتے انہاں 1970 دے دہا کے وچ اپنا پنڈ چھڈ دتا سی جیہڑا مشرقی بہار وچ ہے۔ گرو ہوراں دا اصلی ناں مہیش کمار جھا ہیگا۔ جداں اوہ مرے تے انہاں دی عمر 70دے پیٹے وچ سی۔ گرو ہوری ’’خودی تے عالمی امن‘‘ دے داعی دسے جاندے نیں اتے انہاں دے منن والے دنیا دے ہر ملک وچ پائے جاندے نیں۔ انہاں دی جداد دی مالیتاں 120ملین ڈالر (12ارب روپے) ہے جہیڑی امریکہ، جنوبی امریکہ، آسٹریلیا، مڈل ایسٹ تے یورپ وچ
کھلری جے۔ خبراں وچ دسیا گیا ہے پئی ایہہ اکلے امیر گرو نہیں سگوں پچھلے 30 سالاں وچ اجہے بہوں سارے گرو بھارت وچ پیدا ہوئے نیں۔ویسے تے اپنے مولویاں وی پچھلے30سالاں وچ گھٹ مال نہیں کمایا اتے ایس دی وڈی وجہ ایہہ ہے کہ ایس دھرمی کاروبار تیکوئی ٹیکس نہیں ہوندا تے منافع اپنے آپ ڈبل، ٹرپل ہوندا جاندا ہے اتے ثواب وادھو۔گرو ہوراں دی لاش اوس دیہاڑ تیک فریزر وچ رہنی ہے جداں تیک گھٹ و گھٹ بارہ ارب بارے فیصلے نہیں ہو جاندے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels