Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> جوگی دا کمال: 40 دناں بعدوں زندہ نکل آیا

جوگی دا کمال: 40 دناں بعدوں زندہ نکل آیا

وچار ڈیسک
January 5th, 2017

ہردوار دا اک جوگی 1837 وچ رنجیت سنگھ دے دربار آیا۔ ایس دعویٰ کیتا کہ اوہ صندوق وچ بند ہوکے بغیر کھادے پیتے زمین دے اندر زندہ رہ سکدا ہے۔ مہاراجہ رنجیت سنگھ نے اس دا امتحان لینے لئی دن مقرر کیتا۔مہاراجہ تے دربار دے وڈے سرداراں دی موجودگی وچ جوگی نوں اک وڈے تھیلے وچ بند کرکے اس تے مہاراجہ دی خاص مُہر لائی گئی۔ فیر اس نوں لکڑ دے تابوت توں وڈے صندوق وچ رکھ کے اس نوں وی مہراں لادتیاں گیاں۔ اس بکسے نوں اک تہہ خانے وچ رکھیا گیاتے مٹی پادکے تہہ خانے دا رستہ بند کر دتا۔ پھیرکمرے دا دروازہ بند کرکے اس دے آگے اٹاں چُن دتیاں گیاں تے مکان دے باہر سپاہیاں دا پہرا لوادتا گیا۔
چالی دن تے رات نہایت سخت نگرانیاں بعدوں فروری 1837 دی کسی تریخ نوں مہاراجہ آپدے پوتے کنور نونہال سنگھ، سرداراں، جنرل ونتورہ، کپتان ویڈ تے ڈاکٹر میکر یگر دے نال جوگی نوں گڈھن آئے۔ بہوں سارے لوک وی ایہہ تماشہ ویکھن لئی جمع ہوئے۔مکان دا تالا کھولیا گیا اتے اٹاں تے مٹی ہٹائی گئی۔ تہہ خانے توں صندوق کڈھ کے باہر کُھلی ہوا وچ لیا کر کھولیا گیا تے تھیلے وچ لپٹیا جوگی بیٹھا ہویا دس رہیا سی۔جداں تھیلا ہٹایا تے جوگی آکڑیا ہویا بیٹھا سی، پر زندہ سی یا نہیں ہلے ایس بارے کوئی پک نہیں۔ہن جوگی دے چیلے دی واری سی کیونجے تھیلے وچ وڑن توں پہلاں جوگی نے اوس نوں ہوش وچ لیاون دا طریقہ سب دے سامنے دسیا سی۔ اس دے مطابق سب توں پہلاں اس دے سر تے گرم پانی پاوناسی، بعدوچ آٹے دی گرم روٹی اس دے سر دی چوٹی تے رکھنی سی۔پھیر موم دی اک گولی اس دے نتھنے وچ پانی سی۔ فیر اس دا منہ کھول کے تالو نال لگ چکی زبان نوں اصلی تھاں تے لیانا سی۔ایہہ سب کرن تو بعدوں گھیو نال اس دی مالش کیتی گئی تے ہونٹاں تے وی گھیو لایا گیا۔ لتا دی خوب مالش کیتی گئی فیر اکھاں تے وی گھیو سٹیا گیا۔ معلوم ہوندا سی کہ اوہ مر گیا ہے پر اچانک اس دی نبض چلن لگی۔ اس نے اک دو دفعہ بولنے دی وی کوشش کیتی پر کمزوریاں پاروں آواز نہ نکل سکی۔ اخیرکجھ لفظ ایس دے منہ چوں نکلے پر آواز ایڈی کمزور سی کہ کجھ سمجھ نہ آیا۔ہولے ہولے اس دی آواز قائم ہوگئی تے اوس نے نیڑے کھلوتے لوکاں نوں وی سیان لیا تے مہاراجہ نال گل بات کیتی۔ اس ویلے جوگی دی کامیابی نوں مشہتر کرن لئی توپاں دی سلامی دتی گئی۔ مہاراجہ نے اک نویں نکور طلائی زنجیر اس دے گل وچ پائی تے ہتھاں وچ سونے دے کڑے پوائے تے شال دوشالے اتے ہور قیمتی شئے واں دا انعام دتا۔(واقعات لہور)


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels