Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> چینی تے کچھّو کما

چینی تے کچھّو کما

امریک سرحدی
February 21st, 2012

کچھو کمے نوں فٹ بال بنا کے کھیڈیا جا سکدا ہے، اوس نوں ٹھڈے مارے جا سکدے ہین یا اوس نوں دھون اندر باہر کرن دی لکن میٹی دی کھیڈ کھیڈیاں ویکھیا جا سکدا ہے پر ایہہ خیال نہیں سی آیا جو کچھو کمے دا گوشت وی کھاہدا جا سکدا ہے۔سانوں تے ایہہ وی پتہ نہیں جو کچھو کمے دا گوشت ہوندا کتھے اے! اُنج تے کیاں ہور پکھو پکھیرواں تے جانوراں  دا گوشت کھان دا وی نہیں سوچیا جا سکدا پر سانوں پتہ ہے جو اوہناں نوں کھان والا کوئی نہ کوئی ہے۔ سپ توں لے کے باندراں تیکر کھاہدے جاندے ہین۔ پر کچھو کما کیویں تے کون کھاندا ہے؟
ایس گل ول ساڈا دھیان بی بی سی دی اک خبر راہیں پیا۔ خبر وچ کہیا گیا سی جو زمباوے دی حکومت نے چار چینیاں نوں خاص تے مکدی نسل دے کچھو کمے کھان تے  پھڑیا  ہے۔اہلکاراں نے اک پنڈ بکیتا تے چھاپہ مار کے چالیہہ کچھو کمیاں دے ڈھانچے، تیراں جیوندے کچھو کمے تے اوہناں دا گوشت وی پھڑیا۔ پنڈ والیاں حکومت نوں شکائت لائی سی جو چینی جیوندے کچھو کمیاں نوں ابل رہے پانی وچ سُٹ دیندے ہین۔
چینی ہر جانور دا ماس کھان لئی مشہور ہین پر کچھو کمیاں والی گل خاص ہے کیوں جو چینی آپ پورے افریقہ وچ کچھو کمے وانگ سری لکا کے ہولی ہولی اگے ودھ رہے ہین تے ہُن تیکر اوہ براعظم افریقہ دے سب توں وڈے سرمایہ کار بن چکے ہین۔ پرانے زمانے وچ ایس طرحاں دی باہرلی سرمایہ کاری نوں سامراج کہیا جاندا سی پر ہُن اوس لئی "بیرونی سرمایہ کاری" جہیا من بھاونا لفظ آگیا ہے۔
اُنج چینیاں دے افریقہ آپریشن نوں کچھو کمے نال رلاونا نمانے جانور دی نندیا ہے۔ وچارہ کچھو کما تے بندے نوں کجھ نہیں کہندا: اجے تیکر ایہہ نہیں سنیا جو فلانے بندے تے کچھو کمے نے حملہ کر دتّا۔پر چینی تے افریقہ وچ ہر تھاں تے مل مار کے بندیاں دے جیون تے حملہ کری جا جا رہے ہین۔  مقامی ایلیٹ نوں مال کھواندے ہین تے ارباں دی زمین، کھاناں تے ہور قیمتی وسیلیاں نوں ٹکیاں وچ خرید دے  ہین۔ اوہناں وچ انگریز بستی وادیاں والی گل وی نہیں جیہڑے اپنے فائدے لئی ہندوستان وچ ریلوے لائن وچھاوندے سن تے اوس دا عام لوکیں وی لابھ لے لیندے سن۔ پاکستان وچ چینیاں دی "سرمایہ کاری" دا اجے تیکر کسے پاکستانی نوں کوئی فائدہ نہیں ہویا۔ اُنج اوہناں دی پاکستان نال  یاری دے قصے جہادیاں تے مولویاں کولوں وی سنے جا سکدے ہین۔
چینیاں دا  افریقہ دے نمانے معصوم کچھو کمے کھانا  آون والے ویلے دی اک سینت ہے ۔ چینی دنیا دے کچھو کمیاں دے شکار لئی ساری دنیا وچ پھیلر رہے ہین تے سب کجھ چٹ کرن لئی تیار بیٹھے ہین۔ زمباوے دی سرکار اک پنڈ دے کجھ کچھو کمیاں نوں تے بچا سکدی ہے پر افریقہ دے اوہناں کچھو کمیاں دا کیہہ بنے گا جنہاں دا وجود تے شکل انساناں والی ہے؟ 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels