Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> دفاع کونسل پاکستان (دکپ) یا دفع کرو پاکستان ؟

دفاع کونسل پاکستان (دکپ) یا دفع کرو پاکستان ؟

February 18th, 2012

اج شیدے میسنا بڑی کڈھ کے لیایا سی تے میری اتاولی اڈیک کر رہیا سی۔ میں اوس دے ہیر سیلون وچ وڑھیا ہی تے کہن لگا۔
"تینوں پتہ ایہہ دفاع کونسل پاکستان "  کیہہ ہے؟
میں انجان بن کے پچھیا"کیہڑی کونسل پاکستان؟"
کہندا اوہ یار اوہو جیس  وچ ہر طرحاں دا دہشت گرد مولوی، شیخ رشید تے حمید گل ورگے فوج دے گولے وڑے ہوئے نیں ۔ اوہو جنہاں  نے  پہلاں لاہور وچ مینار پاکستان تے پھیر  کراچی وچ قائد اعظم دے مزار تے جلسہ کیتا ۔ ایہہ اپنے آپ نوں دفاع کونسل پاکستان کہندے نیں ۔ پر تینوں پتہ ہے ہے  ایس دا اصل مطلب کیہہ ہے؟ دفع کرو پاکستان۔
میں پچھیا اوہ کیویں ، توں وی پتہ نہیں کتھوں کتھوں کڈھ کے لیاونا ایہو جیہاں گھنڈیاں۔
کہن لگا  میں ٹھیک کہناں۔ اچھا توں دس جے کسے فقُرے تے بڑھک باز جھیینٹے نوں مروانا ہووے تے کیہہ سوکھا طریقہ ہے؟
میں کہیا مینوں کیہہ پتہ ۔۔توں دس!
کہن لگا اوس دا سب توں سوکھا طریقہ ایہہ ہے جو اوس نوں چُک چُکا کے  آلے دوالے دے تگڑیاں بندیاں دے گل پوا دیو تے اوہ آپ ہی شہید ہو جاوے گا، تہانوں کجھ کرن دی لوڑ نہیں ۔
میں کہیا پر ایہہ گل ایتھے کیویں لاگو ہوندی ہے؟
کہندا۔۔توں بونگے دا بونگا ہی رہویں گا، تینوں کدی سمجھ نہیں آونی۔ پاکستان اک فقرا ملک ہے تے ایہہ دہشت گرد ملانے اوس نوں امریکہ، ولایت ہندوستان تے  ہور سب  نال لڑن لئی مجبور کردے ہین۔ اوہ حافظ سعید کشمیر دے جہاد دا ماما بنیا ہویا  ہے تے ہندوستان تے فتح دے خواب وکھاوندا ہے تے ہور داڑھیاں والے تے داڑھی منے مولوی  طالبان نال رل کے امریکہ نال لڑنا چاہندے ہین۔ دس ایہہ پاکستان نوں مروان والی گل ہے یا نہیں؟ ایہہ اک نکے جیہے فُقرے نوں وڈیاں بدمعاشاں نال لڑاون والی گل ہے یا نہیں؟ ایسے لئی میں کہنا ایہہ دفاع کونسل پاکستان نہیں دفع کرو پاکستان تحریک ہے۔
میں تے سنیا ایہہ فوج دے کہن تے جلسے ہورے ہین؟ میں وی اپنی جانکاری دا رعب شیدے تے پایا۔
شیدا کہندا۔۔ہو سکدا انج  ہی ہووے تے ایہہ وی ہو سکدا ایہہ فوج تے دبا پاون لئی کیتا جا رہیا ہووے۔ اُنج تے میرا اک سیانا گاہک ایہہ وی کہندا سی جو ایہہ فوج دا اخیری مورچہ نیں۔ باقی مولوی جیویں فضل الرحمن ہے اوہ تے فوج دے کہن تے زرداری نوں نہ چھڈ کے فوج دے چمچیاں دی لسٹ وچوں نکل گئے ہین۔۔تے ہُن فوج کول اپنی پاکستانی مکاؤ تحریک لئی ایہو دہشت گرد مولوی تے اوہناں دے حمایتی بچے ہین۔ ایس لئی اہناں نوں ہی پاکستان دفع کرو پاکستان دے کم تے لایا گیا ہے۔ اُنج وی مولویاں دی تاریخ ہے جو پاکستان بنن توں پہلاں دے ایس دے ویری ہین۔
اچھا شیدیا ایہہ دس۔۔ایہہ مولوی جلسے کرکے الیکشن جت سکدے ہین؟
شیدا ہسن لگ پیا۔ اوئے بونگیا ایہہ تے کونسل ممبر دا الیکشن نہیں جت سکدے ایسے لئی تے کلاشنکوفاں نال پاکستان نوں بدلنا چاہندے ہین!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels