Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> پاکستان بچہ پارٹی دا ہنگامی اجلاس

پاکستان بچہ پارٹی دا ہنگامی اجلاس

امر جلیل
September 13th, 2011

میں تھوڑا جیا کویلے پی بی پارٹی دے اجلاس وچ اپڑیا۔ ایہہ میری کوتاہی سی، حالانکہ کل شام پی بی پارٹی دا وفد اپڻے سیکرٹری جنرل دی پردھانگی وچ مینوں پی بی پارٹی دے ہنگامی اجلاس وچ رلت دا سدا دیڻ آیا سی۔ میں حامی بھر لئی سی۔ '' دادا توں بھلکڑ ایں ''۔ پارٹی دے سیکرٹری جنرل چھٹن چھوٹے نے جاڻ توں پہلوں کہیا سی '' توں اپڻے کمرے دی کندھ تے لکھ دے جو کل شام ٹھیک پنج وجے توں پی بی پارٹی دے ہنگامی اجلاس وچ جاڻا ہے''۔

'' توں فکر نہ کرو چھٹن چھوٹے، میں وڈے وڈے حرفاں نال کندھاں تے لکھ دیواں گا پئی کل شام ٹھیک پنج وجے مینوں پی بی پارٹی دے ہنگامی اجلاس وچ رلت کرنی ہے۔'' میں چھٹن چھوٹے نوں یقین دواؤندیاں ہوئیاں پچھیا سی '' ہنگامی اجلاس دا موضوع کیہ ہے ؟ '' موضوع ہے چھٹن چھوٹے نے کہیا '' اجوکے حالات دے کیہ اثر ساڈے تے پیڻ گے ؟''

میں آواں گا چھٹن چھوٹے '' میں کہیا '' ضرور آواں گا اتے اپڻے نال اپڻا اک طوطا وی لے آواں گا''۔

باہر جاندیاں ہوئیاں چھٹن چھوٹے نے پچھیا سی '' دادا کیہڑا طوطا لے کے آویں گا اوہ تے نہیں جیہڑا کہندا رہندا ہے، لگے رہو منا بھائی ؟'' میں آکھیا '' ایس گل دا فیصلہ میں مگروں کراں گا ''۔ چھٹن چھوٹے نے کہیا '' پر کندھ تے ضرور لکھیو پئی کل شام ٹھیک پنج وجے تہانوں پی بی پارٹی دے ہنگامی اجلاس وچ رلت کرنی ہے ''۔ چھٹن چھوٹے دے چلے جاڻ توں مگروں میں کالے رنگ دا مارکر چکیا اتے اپڻے کمرے دی کندھ تے وڈے حرفاں وچ لکھیا۔ کل میں پاکستان بچہ پارٹی دے ہنگامی اجلاس وچ جاڻا ہے ، ٹھیک شام پنج وجے۔''

کندھ تے لکھڻا ہڻ تے میرے لئی روز دا کم بڻ گیا ہے۔ عمر دے پچھترویں سال دے نیڑے اپڑ دیاں اپڑ دیاں میں بھلکڑ ہو گیاں۔ بہت کجھ بھل جاناں۔ سجڻاں اتے ویریاں دے کہڻ تے میں اک ڈائری اپڻے نال رکھی سی۔ ایہدے وچ ون سونے اندارج میں کر دتے سی مثال دے طور تے میرا ناں کیہ ہے ، میرے پیو دا ناں کیہ سی، میری ماں دا ناں کیہ سی ، میں کتھے رہناں، میں کیہ کرناں۔ میں ڈائری وچ ایہہ وی لکھیا سی جو میں ٹائی ایس لئی نہیں بنھ دا کیوں جو مینوں ٹائی دی گنڈھ بنھڻی تے آؤندی ہے پر گنڈھ کھولڻی نہیں آؤندی۔ وائے نصیب ! اک واری ڈائری کِتے رکھ کے بھل گیاں میں ڈائری کتھے رکھی سی۔ اوہ ڈائری مینوں اج تیکر نہیں ملی۔ ایس توں پہلوں میں نویں ڈائری خریددا کسے نے مینوں گھر دیاں کندھاں تے لکھڻ دی صلاح دتی۔ اوہنے کہیا سی نویں ڈائری وی کِتے رکھ کے بھل جاؤ گے پر کندھ اپڻی تھاں کھلوتی رہوے گی۔

سنگیاں نے ایہہ وچار کے میں کِتے اپڻے گھر دا پتہ بھل نہ جاواں اوہناں نے اک کارڈ تے میرے گھر دا پتہ لکھ کے اتے اوہدے تے میری تصویر لا کے پلاسٹک دے کور وچ محفوظ کر کے اک سوہڻے ربن نال میرے گل وچ پا دتا ہے۔ میرے گل وچ سوہڻا ربن نال لمکیا ہویا کارڈ ویکھ کے دوروں تسیں مینوں پی آئی اے یاں کسے بینک ٹیلی ویژن ادارے ، اخبار دا نوکر سمجھو گے۔ اک واری کجھ جواناں نے مینوں گھیر لیا سی۔ اوہناں مینوں کوڑیاں کسیلیاں سڻاؤندیاں ہوئیاں کہیا سی، تیرے ورگے بڈھے کھوسٹ ساڈے جواناں دا حق مار رہے نیں قبر وچ پیر لمکائے پھیر رہے او، پر فیر وی ایکسٹینشن تے ایکسٹینشن لئی جارہے او، تہانوں شرم نہیں آؤندی ؟ تسیں بڈھے ساڈے جواناں دی ترقی ساہمڻے کندھ بڻ کے کھلوتے ہوو گے تسیں بڈھے ساڈی راہ دا پتھر او، توں مردا کیوں نہیں۔
تسیں جدوں وی میرے ویہڑے آؤ گے اودوں تہانوں مینوں پچھڻ دی لوڑ نہیں پوے گی جو میرے گھر وچ غسلخانہ کتھے ہے، باورچی خانہ کتھے ہے ؟ ویہڑا کتھے ہے ، تہانوں سارا کجھ میرے گھر دیاں کندھاں تے لکھیا ہویا ملے گا، میری الماری کتھے ہے الماری وچ کیہ کیہ رکھیا ہویا ہے گھر دی کیہڑی نکرے میرا خزانہ دبیا ہے۔ میرے گھر دی ہر کندھ تے تہانوں سجڻی لکھیا نظر آوے گا۔ سجڻی میری گرل فرینڈ سی۔اوہنے مینوں ایس لئی چھڈ دتا سی پئی اک دن میں اوہنوں رجنی آکھ دتا سی۔ ایس توں اڈ تہانوں میرے گھر دیاں کندھاں تے ون سونیاں لکھتاں، عبارتاں تے قول پڑھن نوں ملڻ گے۔

مثال دے طور وڈا مونہہ نکی گل۔'' کھسیانہ کھمبا بلی نوچے '' شام دا بھلیا سویرے گھر نہیں پرت سکدا۔ اینا سچ بولو پئی سچ تے جھوٹ دا شک ہوڻ لگے۔ بلی دے سفنے وچ چوہا۔ کھودیا پہاڑ نکلی گیس۔ ٹیلی ویژن دے اینکر پرسن بڻو تے سارا کجھ آکھ دیو۔ ساری رات موبائل فون تے بولدے رہو تے سارا دن سوندے رہو تاں جو موبائل کمپڻیاں دے بھاگ جاگدے رہڻ۔ سیاست ڈینگی مچھر ہے، اک واری دندی وڈھ لوے تے تاپ ساری حیاتی نہیں لتھ دا۔ جے تسیں پینٹر او تے فیر تسیں ٹیکنو کریٹ دی سیٹ تے سینیٹر بن سکدے نیں۔ گولی گولی تے مرن والے دا ناں لکھیا ہوندا ہے۔ جیہنوں ہر کوئی چکھے اوہنوں رب کیوں رکھے۔ اسمگل ہو کے آئی شے تے سیلز ٹیکس نہیں لگدا۔ پاکستان وچ روزانہ اک دوجے دے ہتھوں شہید ہوڻ والیاں دی گڻتی اینی ودھ گئی ہے جو جنت وچ اوہناں نوں ملڻ والیاں حوراں دی گڻتی گھٹ گئی ہے۔ انج دیاں بے شمار عبارتاں تہانوں میرے گھر دیاں کندھاں تے پڑھن نوں ملڻ گئیاں۔ ہڻ تیکر تسیں گویڑ لا لیا ہووے گا جو میں چنگا بھلا بھلکڑ آں۔

میں وچاریا سی اج تہانوں پاکستان بچہ پارٹی دے ہنگامی اجلاس بارے تفصیل نال دساں گا۔ پاکستان بچہ پارٹی بارے کئی واری تہانوں قصے سڻا چکیاں۔ بڑی ہی مضبوط پارٹی ہے۔ ایس پارٹی وچ کوئی موٹا نہیں کوئی کھوٹا نہیں کوئی لوٹا نہیں۔ الیکشن کمیشن نے پاکستان بچہ پارٹی پی بی پی نوں چوڻاں وچ حصہ لیڻ دی اجازت ایس لئی نہیں دتی ہے جو پی بی پی دے سارے ممبراٹھاراں سال توں تھوڑی عمر دے نیں۔ پارٹی دا سیکرٹری جنرل چھٹن چھوٹا دس سال دا ہے۔ پارٹی دا صدر چھٹن وڈا باراں سالاں دا ہے۔ پارٹی دے سب توں گھٹ عمر دے ممبر دی عمر تن سال ہے۔ اوہ جدوں جمیا سی اودوں چھٹن وڈے نوں کینٹ اسٹیشن دے نیڑے کچرے دے ڈگ تے پیا ہویا ملیا سی۔ اودوں چھٹن وڈے دی اپڻی عمر اٹھ نو سال دی سی۔ چھٹن وڈے نے ایس بال دا ناں فرشتہ رکھیا تے کہیا فرشتہ اج توں میرا پتر ہے۔ ہڻ اسیں اک ہفتے دا نکا جیا بریک لینے آں۔ وقفے توں مگروں تہانوں پاکستان بچہ پارٹی دے ہنگامی اجلاس دا اکھاں ویکھیا حال سڻاواں گا۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels