Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> سپاں والا گھر

سپاں والا گھر

June 25th, 2011

امریکی ریاست آئیڈاہو دا اک گھر جگ دے سپیریاں تے سپاں دا شوق رکھڻ والیاں نوں اُڈیک دا ہے۔

دو ایکڑ وچ بڻے ہوئے ایس گھر وچ پنج بیڈروم نیں جیہدے وچ ہڻ کوئی ہور نہیں اکلے سپ رہندے نیں۔ ایس گھر دا چھیکڑلا مالک بن سیشنز کجھ چر پہلوں ایہنوں چھڈ گیا سی۔ بن دا کہڻا سی پئی اوہ، اوہناں دی گھر دی امبر تے بالاں تے سپاں دی اینی دہشت بیٹھ گئی سی جو اوہناں نوں علاج لئی نفسیاتی ڈاکٹر کول جاڻا پیا۔

بن تے اوہناں دی گھر والی نے جدوں پراپرٹی ڈیلر دے نال پہلی واری ایس مکان نوں ویکھیا تے اوہناں نوں لگیا پئی ایہو اوہناں دے سفنیاں دا گھر ہے۔ سوہڻا لان، پنج بیڈ روم، لیونگ ایریا، کچن، لانڈری ، باتھ روم۔۔۔ سارا کجھ ہی تے سوہڻا سی۔ مکان کجھ اُچی تھاں تے سی۔ اوتھوں اوہناں نوں آلے دوالے دامنظر بڑا سوہڻا لگا تے اوہناں اوہنوں خریدڻ دا فیصلہ کر لیا۔۔ تے سب توں ودھ کے ایہہ مکان دی قیمت بہت گھٹ سی یعنی صرف اک لکھ اسی ہزار ڈالر۔ کوڈھیاں دے بھا وک رہیا سی۔

بن توں پہلوں ایس مکان وچ نیل تے ڈینسی رہ رہے سی۔ کجھ چر توں مگروں اوہناں نے مالک مکان تے پراپرٹی ڈیلر دے خلاف سپاں دا گھر ویچڻ دا مقدمہ بڻا دتا۔ جیہنوں اک سال توں مگروں خارج کر دتا۔

بن دا خیال سی جو آئیڈہو ورگے پہاڑی علاقے وچ سپ ہوڻا اک عام جئی گل ہے تے اوہ اوہناں نال نبڑ سکدا ہے۔ ایس لئی اوہ اپڻی تیویں تے دوہواں بالاں دے نال اپڻے گھر آگیا۔

پہلوں اوہناں نوں بہتا مسئلہ نہیں ہویا۔ کدی کدی اکا دکا سپ نظر آجاندے سی جیہنوں اوہ جھبدے ہی مار دیندے سی۔ فیر بن نے اپنا ایہہ کم بڻا لیا پئی اوہ اپڻی تیویں تے بالاں دے اٹھڻ توں پہلوں بسترے چوں نکلدا تے سارے گھر دا چکر لاؤندا۔ جے سپ نظر آؤندا تے اوہنوں یاں تے مار دیندا، یاں نسا دیندا۔

پر جیویں ہی سیال آؤڻا شروع ہوئے تے گھر وچ سپاں دی گڻتی ودھڻ لگی۔ تے فیر اک دن ایہو جیا وی آیا پئی بن نے پنتالی سپ مارے پر اوہ مکے نہیں کمریاں وچ ایدھر اودھر پھردے نظر آئے۔

ایسوسی ایٹڈ پریس وچ چھپڻ والی اک رپورٹ موجب بن دا کہڻا ہے جو ٹھنڈ ودھڻ دے نال ہی گھر وچ ہر پاسے سپاں دیاں شوکراں سڻڻ لگیاں۔ بیڈ روم، لیونگ روم، کچن، لانڈری، باتھ روم کوئی تھاں انج دی نہیں سی جتھے سپ نہیں سی۔ سارا گھر سپاں دی اک عجیب جئی بو نال بھر گیا ساہ لیڻا اوکھا لگڻ لگا۔

بن کہندے نیں پئی فیر اسیں گھر وچ کھانا پکاؤڻا بند کر دتا۔ پکاؤندے وی کیویں، کھاڻ پیڻ دیاں شیواں وچ ، درازاں وچ، چلھے دے آلے دوالے سپ نظر آؤندے سی۔ اسیں باہر جا کے روٹی کھاڻ لگ پئے۔ تے فیر اوہ دن وی آگیا سانوں گھر دا پاڻی ورتڻا چھڈڻا پیا کیوں جو پاڻی دی ٹینکی وچ وی سپ نظر آؤڻے شروع ہو گئے۔

سپاں نے بن دے خاندان دیاں راتاں دیاں نیندراں کھو لئیاں۔ کیوں جو رات دے ویلے چھت توں سپاں دیاں آوازاں آؤڻ لگیاں۔اک دن بن ہمت کر کے چھت دے اُتے ایٹک وچ گیا تے اوہ سپاں نال بھریا ہویا سی۔

بن دا کہڻا ہے جو اک دن میں اک کندھ دی نکرے اک لکڑی کھسکی ہوئی ویکھی۔ جدوں اوہنوں ہٹایا گیا تے پتہ لگیا پئی کندھ دا وچلا حصہ سپاں نال بھریا ہویا سی۔ اندر دے ماحول توں گھابر کے بن لان وچ گیا تے جیویں اوہدیاں رگاں وچ خون جم گیا۔ پودیاں دے تھلے تے گھاہ دے وچ ہر پاسے سپ سی۔

ریاست آئیڈاہو دے ماہی گیری تے شکاریات نال جڑے جنگلی حیات دے اک ماہر راب کیولارو دا کہڻا ہے جو سپ تے کئی دوجے رینگڻ والے جاندار سیالاں وچ کجھ خاص تھاواں تے سوندے نیں تے بہار دا موسم شروع ہوندیاں ہی اوہ خوراک لبھڻ لئی دوجے علاقیاں ول نکل جاندے نیں۔ اوہناں دا خیال ہے پئی ریکس برگ دا گھر اک انج دی تھاں بڻایا گیا جتھے سپاں دی ربی سرمائی وسوں ہے تے آلے دوالے دے سپ اوتھے اپڻے سیال لنگھاؤندے نیں۔

کیولارو دا کہڻا ہے پئی جدوں تیکر ایس علاقے دا چھیکڑلا سپ وی جیوندا ہے اوہ اپڻے سیالاں دی نیندر تے نسل ودھاؤڻ لئی اوتھے ہی جاوے گا۔

سپاں دے اک ہور ماہر ڈیوس دا کہڻا ہے پئی سپڻی دے جسم چوں اک خاص بو نکلدی ہے جیہڑی دو میل دے دائرے وچ موجود سپاں نوں اپڻے ول کھچ لیندی ہے۔

بن دے جاڻ توں مگروں بینک نے مکان اک واری فیرویچن دی کوشش کیتی تے اوتھے جنوری تیکر بورڈ لگیا رہیا بینک نے ایہدی قیمت وی اک لکھ نو ہزار تیکر گھٹا دتی پر کوئی خریدار نہیں آیا۔

مکان دی اک معائنہ رپورٹ وچ دسیا گیا ہے جو ہڻ اوتھے سپاں دی گڻتی کئی ہزار ہو گئی ہے ۔ اینے سپاں دے نال تے خورے کوئی سپیرا وی نہ رہ سکے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels