Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> بکواسم : سودے مسکین دی سلتون

بکواسم : سودے مسکین دی سلتون

June 21st, 2011
5 / 5 (11 Votes)

سودا مسکین طالبان توں بڑا یرکدا تے ٹرکدا اے۔ اوہنوں ڈراؤڻا ہووے تے ڈرون ڈرون آکھڻ نال نہیں ڈردا۔ بس آکھو جو اوہ طالبان آئے تے ویکھو اُس دیاں بھجڻیاں۔ پشانہہ دی مُڑ کے نہیں ویکھدا۔ سدھا دارو دے ٹھیکے وچ جا وڑدا اے تے اوس ویلے تائیں گلاسوں باہر نہیں نکلدا، جدوں تائیں سو بٹا سو ٹُن نہ ہو جائے۔

راتیں سُودا آیا تے مچھاں تے رنگ تے مجھ کوئی اوپرا جیہا باڻا۔
میں پچھیا، "سودیا! ایہہ تیریاں مُچھاں غیر شرعی نہیں؟ آکھڻ لگا، "فقیر باوا ! ایہہ وچلا راہ اے اسلام دا۔ مڈل پاتھ۔ ایہہ مڈل کلاس ہار ماڈل وی ہوندا اے تے ڈل وی۔ مڈل کلاسیاں وچوں کوئی بندہ شیت ہی گُڻی گیانی نکلے۔ ایہناں وچ بوہتے جرنیل ہی نکلدے نیں، جہڑے نہ آپ حکومت چلاؤڻ جوگے ہوندے نیں، نہ چلڻ دیندے۔

یرا ! میں تیرے کولوں مُچھاں بارے پچھیا سی جو ایہہ شرعی ہیڻ کہ نہیں۔ مینوں ڈر اے جے طالبان ناروے آ گئے تاں تینوں داڑھی نال نہوا دیڻ گے۔ داڑھی رکھ کے تیرے مونہہ توں والاں دا مینہ وسڻ لگ پیڻا اے۔ تے توں سرداراں دا بو بکرا دسیڻا اے۔

میں نہیں پالنی داڑھی۔ سُودے دونویں ہتھ اُچے کر کے آکھیا۔
پر کیوں؟ یاراں پچھیا۔

سودے آکھیا، " بھراوو، گل ایہہ ہے جے میں داڑھی رکھ کے یورپ پھراں تاں مینوں ات وادی سمجھ کے گورے ہوائی اڈہ نہ ٹپڻ دیسڻ تے جے گھون مون ہو جانواں جیہنوں سکولی مُنڈے کلین شیو بولدے نی تاں طالبان مارسڻ۔ ایس لئی نہ داڑھی، نہ صفا چٹ۔ بس وچلا کھاتہ چنگا اے جو چھڑی مُچھ تے گزارہ کرو۔ مُچھ نال ہی مچھڑ ہوندا اے۔ سونہہ مینوں ضیاء الحق دی، مچھڑ جرنیل مچھ بنا ہوندا ای نہیں۔ ایوب خان، ضیا تے مشرف تریوے مچھڑ سڻ۔ وچوں ہک بے مُچھا آیا، یحییٰ خان تے بنگالی اوس کولوں نہیں ڈرے۔ ڈھاکہ کھوہ کے تیر ہوئے تے مُڑ کے اسلام آباد نہیں وڑے۔ مُچھ زندہ باد! "

نالے داڑھی بارے پرویز مہدی دی گل سُڻی ہوئی او۔
کیہڑی گل؟
داڑھی دی گل۔۔۔
اوہ کیہ گل سی سُودیا؟

پراڻیاں ویلیاں دی گل اے۔ اجے پاکستان دا ایہہ حشر نہیں سی ہویا جیہڑا اج اے۔ لہور ٹی وی تے صفدر میر دے ہک تواریخی ناٹک دی ریکارڈنگ پئی ہووے۔ خالد سلیم موٹا تریخ نویس فرشتہ بڻ کے بیھٹا ہووے۔ پھبویں داڑھی تے سر تے تاج ورگی پگ۔ کولوں دی پرویز مہدی بہشتی لنگھیا تے کھلو کے موٹے فرشتے نوں تکڻ لگ پیا۔ چنگے جھٹ پچھوں آکھڻ لگا، "باویو! اسیں بڑے نرالے تے جھلے لوک ہائیں۔"
میں پچھیا، اوہ کیویں؟"
پرویز مہدی آکھیا، "باوا جی! ایہہ مونہہ جیہڑا رب سانوں وکھاؤڻ لئی دِتا اے اوہ اسیں داڑھی دی کھیسی وچ ولیٹ کے رکھنے ہاں، تے جیہڑی تھاں لُکاؤڻ والی اے اوس نوں چنگی طرحاں رگڑ رگڑ کے مُن دے ہاں؟ ایہہ کیوں؟ میں کہیا ایہہ گل مولوی وِسکی توں پچھڻ والی اے جے اوتھے تائیں پہنچ ہئی تاں پچھ لئیں۔
مولوی وِسکی دا سُڻ کے پرویز مہدی ہوریں تیر ہو گئے۔

سُودا مسکین جدوں بیٹھک وچ بیہڻ لگا تاں میں ڈِٹھا جو کوئی اجیہی شے اوس دے لک ہے جیہڑی نہ پتلون اے تے نہ سلوار۔ گوڈیاں تے ٹاکیاں لگیاں ہوئیاں تے مگرلے بنڈواں تے وی ٹاکیاں۔

میں پچھیا، " سودیا! ایہہ کیہ پایا ہوئیا ای؟"
آکھڻ لگا، ایہہ سلتون اے۔
کیہ مطلب ؟ سلتون کیہ ہوندی اے؟
سودے آکھیا ، ایہہ شرعی پہناوا اے۔ ایہہ شلواری پتلون اے۔ ایس وچ نالا آسڻ وچ وی پوندا اے تے پوہنچیاں وچ وی۔ ایہہ ترے نالیاں والا بُگھ اے۔ ایہنوں سلتون کہندے نیں۔ ایہہ گودڑی دا کم وی دیندی اے۔ ایہہ ویکھ نہ ایس دیاں ٹاکیاں، دونہاں گوڈیاں تے، تے مگرلے پاسےدو ٹاکیاں۔ ایہہ چار ے ٹاکیاں لہندے، چڑھدے ، تے پربت دکھڻ دیاں نشانیاں نیں۔ ایہہ سلتون پا کے نماز وی ہو جاندی اے تے فقر وی نبھایا جا سکدا اے جو ایس دیاں ٹاکیاں گودڑی دا لشکارا ماردیاں نیں۔

پر کیوں؟ ایہہ تو کیوں پائی اے سلتون؟
یارا سچ پچھیں نا، تاں میں ایہہ دنیا چھڈ چھڈی اے تے ملنگ ہو گیاں۔
پر کیوں؟
یارا ! ایس دنیا سانوں کیہ دتا؟ ساڈا تاں راوی تے چنہانہہ وی ساڈے کولوں کھُس گیا۔ بولی اگے اردو دے پھاہے لگ گئی سی۔ تے مگروں نہ وزارت لبھی نہ مال پاڻی دا آسرا بڻیا۔ پیٹ دا کشکول لے کے پردیس کچھیا۔ ساڈی بھوئیں کجھ وڈیرے کھا گئے تے باقی دی لینڈ مافیا دے اڑیکے چڑھ گئی ۔ ہُڻ ایہہ ہی سوچیا اے جو شیت رب ہی لبھ جائے یاں رب ترس کھا کے سانوں ہی لبھ لے۔ باقی ایہناں حاکم میل دیاں بدروحاں تاں سانوں کوئی خیر نہیں پاؤڻی تے ساڈے مکیوں کدی خیر دی خبر نہیں آؤڻی اے۔

ایس لئی سلتون پا تے رب لبھ۔ شیت جنت وچ طالبان تے شہیداں توں بچیا کوئی پلاٹ ہی الاٹ ہو جائے۔

تے آ ایہہ رب باڻی رل کے پڑھیئے:
۔۔۔۔۔۔۔۔
شلوار وی اے پتلون وی اے
ساڈے گل پئی ہک بھوہڻ وی اے
ساڈے کھنڈ دے ڈبّے لُوڻ وی اے
ساڈے دیس دے وچ پشتون وی اے
ہر پاسے وگدا خون وی اے
اُتوں سخت مہینہ جون وی اے

مڑھکا بنھ تاراں وگدا اے
سانوں پکھا ہیٹر لگدا اے
سانوں ساڈا آگو ٹھگدا اے
ویکھو دیس کدوں تائیں تگدا اے

اسیں دنیا ہُڻ چھڈ چھڈی اے
تورا بورا لا لئی کھڈی اے
ساڈی بھوئیں تے نہ لگدی اڈی اے
سانوں کہندی اماں وڈی اے
جا پا ، سلتون تے کر موجاں
تری راکھی کرن گیاں فوجاں
اللہ ہو و و و و و و و و و


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels