Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> گاندھی جی دی عینک گواچ گئی

گاندھی جی دی عینک گواچ گئی

وچار ڈیسک
June 14th, 2011
4 / 5 (1 Votes)

ہندوستان وچ مہاتما گاندھی دیاں شیواں قومی ورثے دا حصہ نیں تے اوہناں نوں قوم دی امانت کہیا جاندا ہے۔ ہندوستانی ریاست مہارا شٹر دے اک آشرم چوں گاندھی جی دی عینک گواچ گئی ہے۔ مہاتما گاندھی نے اپنی حیاتی وچ ہی اپنیاں ورتوں دیاں شیواں کئی بندیاں نوں تحفے وچ دے دتیاں سی۔ اوہناں دے قتل دے مگروں ایہناں شیواں نوں قومی اثاثہ متھیا گیا ۔ فیر ویلے دے نال اوہناں دی عینک، لاٹھی، چاء والی پیالی تے گھڑی سڻے ہور شیواں دنیا دے کئی ملکاں دے عجائب گھراں وچ رکھیاں گئیاں۔

انج ہی گاندھی جی دی گول شیشے والی عینک، قلم تے اک برش ہندوستانی شہر وردا دے اک آشرم دے میوزیم وچ رکھیا ہویا ہے۔ ایہہ علاقہ ہندوستانی ریاست مہارا شٹر دے شہر ناگپور توں 75 کلو میٹر دور ہے۔ سیوا گرم ناں دے ایس آشرم دے پربندھیاں نے دسیا جو باپو دی عینک عجائب گھر چوں گواچ گئی ہے۔ ایہہ عینک ہور سامان دے نال اک الماری وچ رکھی ہوئی سی جیہنوں باہروں جندرا وجیا ہویا سی۔

آشرم دے مینیجر آکاش لوکھنڈے نے دسیا پئی ایس سال آشرم دی سالگرہ دے موقعے تے پربندھیاں نے منصوبہ بڻایا ہے جو گاندھی جی دیاں ایہہ شیواں عام بندیاں نوں وکھائیاں جاڻ گئیاں۔ ایس سلسلے وچ جدوں الماری کھولی گئی تے اوہدے وچ عینک نہیں سی۔ اوہناں ہور دسیا پئی ایہہ نہیں پتہ جو عینک کدوں گواچی۔ لوکھنڈے موجب پولیس نوں ایس بارے خبردار کر دتا گیا ہے پر باقاعدہ طور تے ایف آئی آر حالی تیکر نہیں درج کرائی گئی ہے۔

اک گویڑ موجب ہر سال تریہہ لکھ بندے سیوا گرم آشرم وچ آؤندے نیں۔ پربندھیاں موجب مہاتما گاندھی پہلی واری 1930 وچ ایس آشرم وچ آئے سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels