Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> مسکینیاں شسکینیاں : پرانیاں چبلاں دا نواں ویوانہہ

مسکینیاں شسکینیاں : پرانیاں چبلاں دا نواں ویوانہہ

سودا مسکین
May 23rd, 2011
5 / 5 (22 Votes)

مسکین سائیں، او مسکین باوا
ہوں ۔۔۔
مسکین تسکین جی ۔۔۔
ہاں ۔۔۔
کیہ کر رہے او ؟ ہک گل پچھ سکناں؟
نہیں ، میں سُتا ہویاں۔
تسیں اکھاں کھول کے سوندے او؟
اکھاں کھلیاں ہوئِیاں نیں یا نوٹیاں ہوئیاں۔ ایہدے نال کیہ فرق پے چلیا اے۔ سُتیاں ہوئیاں قوماں دیاں اکھاں سُتیاں وی کھلیاں ہوندیاں نیں تے مر کے وی کھلیاں۔ پر تینوں تکلیف کیہ اے؟
ہک گل پچھنی سی ۔
پچھ۔ کیہ گل پچھڻی اے؟
تہانوں قل ھواللہ آؤندی اے؟
آؤندی اے۔ توں مینوں وی پاکستان دا گھروکی معاملیاں دا وزیر سمجھیا ہویا اے۔ میں تاں پکی روٹی وی پڑھی ہوئی اے۔ مینوں چھ کلمے وی آؤندے سڻ نکیاں ہوندیاں پر ہُڻ اوہناں دی لوڑ نہیں، ایس لئی بھُل پورے چھڈ آیاں۔
ایہہ بھلپورہ کتھے اے؟
ایہہ اسلام آباد دا ہک محلہ اے جتھے مسلمان آپڻا اسلام بھل گئے سڻ۔ ہُڻ جیہڑی شے وی بھُلڻی ہووے اوتھے ہی چھڈ آئی دی اے۔ امریکی ایتھے اسامہ وی بھل گئے سڻ پر اوہ اوتھوں وی بھُلی پے گیا تے فیر ایبٹابادوں لبھا۔
تہانوں پک اے اوہ اسامہ ہی سی؟
پک دی کیہ گل اے ۔ جیہڑی شے امریکیاں مار چھڈی اوہ مری سمجھو، اوہ پنڈی نہیں ہو سکدی ۔۔ ۔نالے اوہناں پاکستان دی جڑ نہیں مار چھڈی۔ اجے کوئی ہور ثبوت چاہیدا ہئی ۔
جڑ وج گئی ہوئی اے باوا؟
جڑ وی وج گئی ہوئی اے تے تیری مت وی۔ توں جو پچھڻا اے پچھ۔
تہانوں ہفتیاں دے ستاں دناں دے ناں آؤندے نیں؟
آؤندے نیں پر ہفتے دے چھ دن ہوندے نیں پاکستان وچ۔
اوہ کیویں؟
اوہ انج جو پاکستان وچ بدھ مگروں جمعرات آؤندی اے۔ بھلا رات کسے دیہاڑے دا ناں ہو سکدا اے۔ جمعرات ہک رات اے جیہڑی صرف پاکستان وچ آؤندی اے۔ دنیا دی کسے ہور قوم آپڻے ہفتے دے کسے دیہاڑے دا ناں رات نہیں رکھیا ہویا، پراڻے پنجاب وچ ہفتے دے ست دیہاڑے ہی ہوندے سڻ۔ پر اساں ہُڻ اوہ پراڻے ناں بدل چھڈے ہیڻ۔ ہُڻ سارے ناں ماڈرن نیں ۔
دسو ، کیہ نہیں ایہہ ناں۔
پہلا دیہاڑا سنڈھے۔ ایس نوں انگریز سن ڈے کہندے نیں
دوجا دیہاڑا من ڈے ۔ ایہہ من پرچاؤڻ دا دیہاڑا اے۔
تیجا دن ٹھنڈے، ایہہ سردائی گھوٹ کے پیڻ تے اندر نوں ٹھنڈیاں رکھڻ دا دیہاڑا اے۔
چوتھا دن، گن ڈے، ایہہ سڑکاں تے گولیاں مارن تے بٹیرے پھڑکاؤڻ دا دن اے۔
پنجواں دن، ڈنڈے، ایس دن پُلس سڑکاں تے لوکاں نوں ڈنڈے ماردی اے۔
چھیواں دن، لنڈے، ایس دن اسیں وچاراں دا لنڈا بزار لاؤنے ہاں تے پاٹیاں پراڻیاں گلاں ویچنے ہاں۔
تے ستواں دن، انڈے، ایس دن لوکی مسیتاں وچ تے درگاہواں تے لوہے دے انڈے ماردے نیں جیہناں نوں دستی بمب آکھیا جاندا اے ۔

ہلا جی، پر میں ایہہ ناں پہلے کدیں نہیں سڻ سُڻے۔
جے توں نہیں سڻے تاں ایہہ میرا قصور اے۔ لوک ہمیشہ اصل گل لُکاؤندے تے آپڻے بچیاں نوں پٹھیاں پٹیاں پڑھاؤندے نیں۔
ہچھا جی، ہُڻ ایہہ وی دس دیو جو یوسف رضا گیلانی کتنے کروڑ دا قرضہ معاف کرایا اے؟
میں معاف کیتا ہی نہیں ۔
اوس تہاڈے کولوں لیا سی قرضہ؟
ہا، میرے کولوں ہی لیا ہائی۔ میرا ناں پاکستانی وسیب اے ۔ ایہناں ساریاں مینوں ہی لُٹ لُٹ کے کھاہدا اے پر توں میرا ناں نہ لویں ایہناں وچوں کسے اگے۔ میرا ناں سُڻ کے ایہناں دا موتر نکل جاند اے۔
ہُڻ تسِں کیہ سوچ رہے ہو؟
میں سوچ رہیاں ایہناں پراڻیاں چبلاں دا نواں ویوانہہ کروا چھڈاں۔
کیہدے نال؟
ایہہ نہیں دسڻا۔ ایہہ میں جاڻاں یا میرا رب جاڻے۔ تو کجھ ہور پچھڻا اے تے پچھ نہیں تاں مینوں سوڻ دے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels