Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> مسکینیاں شسکینیاں : آئین دی تشریح

مسکینیاں شسکینیاں : آئین دی تشریح

سودا مسکین
May 7th, 2011
5 / 5 (33 Votes)

راتیں سُودے مسکین دی عبادت گاہ وچ سارے مومناں مسلماناں دا کٹھ سی۔ حکیم بقل بطورا، ماسٹر گام تے افضل مکوڑا طُرے کڈھ کے، پگاں دے لمے لمے لڑ چھڈ کے آئے ہوئے سڻ، جمعے دی رات نوں انج دی کُٹ پئی ہوندی اے جیویں عبادت گاہ نہ ہووے کوئی دیسی شراب دا ٹھیکہ ہووے۔

مینوں اج سویرے سویرے پتہ لگا جو راتیں ایہہ سیاڻے ویاڻے پاکستان دے آئین دی تشریح وچ رُجھے ہوئے سڻ۔

ایڈی کیہ لوڑ پئے گئی سی؟ میں پچھیا۔

حکیم ہوراں آکھیا جو پاکستان دی وڈی عدالت دا جج ہے تاں سیاڻا پر کئی گلاں وچوں تھُڑکا جاندا اے تے ایہہ مسکین سیاڻا اے۔ اخباری اشتہاری رہیا اے ناں۔ ایہدے کولوں گل پچھ لئی دی اے تے وچ وچ مکوڑا تے ماسٹر گام رولا شولا گھتدے رہندے نیں۔

ہلا، تے کیہ کاڈھ کڈھی جے راتیں؟ میں پچھیا۔

گل انج مُکی اے جو مسکین دی مسیکنی مطابق جے کوئی سیاستدان ہک واری کسے دیس دا حاکم بڻے تے اوہ آپڻی حاکمی دیاں پنجاں ورھیاں وچ ملک دے وسیب نوں سدھے تے پدھرے راہ تے نہ ٹور سکے ، رب دی مخلوق دا بھلا نہ کرسکے، تے لوکاں لئی امن، دیوے بتی تے پاڻی دا پربندھ نہ کر سکے تاں اوہدی مت ماری جاندی اے۔ اوہ پاگل ہو جاندا اے۔

جے اوہ پاگل داء دپّا لا کے دوجی واری حاکمی دی کُرسی تے چڑھ بیٹھے تے دوجی واری وی دیس دی سیوا نہ کرسکے، لوکاں دا رانجھا راضی نہ کرسکے تاں اوہ مر جاندا اے۔ اوہدے اندر اوس دی روح فوت ہو جاندی اے تے فیر ہڈیاں دا پنجرا رہ جاندا اے۔ کوئی ہڈوں ودھ بے شرم پنجرا۔

سائیں منیر نیازی علیہ رحمت فرماؤندے ہوندے سی جو کئی لوکی چاہلی سال دی عمر وچ چلاڻا کر جاندے نیں پر سٹھ سال دی عمر وچ دفنائے جاندے نیں۔ تے قبر ایہو جیہاں ماٹھیاں نوں مساں مساں ہی قبول کردی ہوندی اے۔ ویہہ سال لاش گلیاں بزاراں وچ رُلدی رہندی اے تے خوار ہوندی اے۔

تے ایہہ موئے ہوئے سیاستدان کردے کیہ نیں؟؟؟۔

ایہہ سیاستدان باقی دی حیاتی گرجھاں ہار قوم دا مردہ ڈِگن دی اُڈیک وچ کڈھ چھڈدے نیں۔ آپڻیاں چنجھاں تیز کردے رہندے نیں۔ کرپشن دے نقشے بڻاؤندے نیں تے غریب عوام نوں لُٹڻ دے بہانے لبھدے تے متے پکاؤندے رہندے نیں۔

ملک وچ چکلے قیم کردے تے بیبیاں شیبیاں تے شمیماں آنٹیاں وچ بد اخلاقی دے پھُلے بھُنا کے ونڈدے نیں۔ آپڻے ڈھڈاں نو مرے ہوئے پکھواں تے بھیڈواں دا گستان بڻاؤندے نیں تے تاکھراں ہار کھاندے نیں۔

کرپشن دے مال تے قرضے دے پیسے بنا اوہناں دے ہتھ پلّے ہور ہوندا کجھ نہیں۔ تے حرام کھا کھا کے تیجی واری کرسی تے بیہڻ دے لیق نہیں رہ جاندے۔ ایسے لئی آئین وچ لکھیا ہوئیا اے جو بندہ تیجی واری ملک دا وزر اعظم نہیں بڻ سکدا بھانویں بدمعاشی دا بر اعظم بڻ جاوے۔

دوجی وار مگروں اوہ فقیراں دیاں درگاہواں تے ولیاں دے مزاراں دی مٹی چھانڻ جوگا ہی رہ گیا ہوندا اے۔ پر ایہہ گل آئین وچ نہیں لخی ہوئی۔

سچ پچھو تاں پاکستان دے آئین وچ ترمیم دی بڑی لوڑ اے۔

ایس آئین وچ کرپشن، لُٹ مار تے مارشل لاواں لاؤڻ دے داء نہیں دسے گئے۔ ایہہ داء دپے آئین وچ لکھے ہوڻے چاہیدے نیں تاں جے عدالتاں وی سوکھیاں رہڻ تے جرنیل جگے وی اوکھے نہ ہوڻ۔ نالے لوڈ شیڈنگ نوں قومی سپورٹ دا رُتبہ ملنا چاہیدا اے تے ہر بندے نوں بجلی چوری کرن دا آئینی حق ہوڻا چاہیدا اے۔

ضیاء الحق مرد حق جیہناں نوں ویکھ کے چودھری فق، ہک واری فرمایا سی جو رشوت تاں سرکاری کامے دا حق اے۔ ایس نوں حق خدمت آکھ کے فقہ وچ حلال لکھڻا چاہیدا اے تے ایس بارے آئین وچ اُچیچی اجازت دتی جاڻی چاہیدی اے۔

آئین بارے چھیکڑلے شبد انج ہوڻے چاہیدے نیں:۔
"ایہہ آئین کیہ اے؟ دو چار ورقے۔ دتھی کاغذاں دی۔ایس نوں جدوں چاہو پاڑو تے چار نویں ورقے لکھ لؤ۔ تے نالے سول سیاستداناں نوں ہنومان مارکہ پوچھلاں لوا دتیاں جاڻ، تاں جے جدوں آئین پاڑیا یاں لکھیا جاوے تے ایہہ پوچھلاں مار مار کے یس سر، یس سر کہندے رہڻ۔

آئین شائین زندہ باد۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels