Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> مسکینیاں شسکینیاں : کُت خانے وچ کُداڑ

مسکینیاں شسکینیاں : کُت خانے وچ کُداڑ

سودا مسکین
April 16th, 2011
5 / 5 (11 Votes)

رتّو آکھیا ، " ڈب کھڑبیا ، بھوں بھوں دیا ڈبیا! ایہہ دس ایہہ بندے بشر ساڈے ہار بھونکڻ کیوں لگ پئے نیں؟"

ڈبّو ، اکھیں ادھوں ودھ نُوٹ کے آکھیا، "صحبت دا اثر اے رتیا سُکڻےگھتیا! اسیں اصحاب کہف دے ویلے توں لے کے اج تائیں بندے نوں وفا کر کے وکھاؤندے آئے ہاں تاں جے ایہہ ہک دوجے نال نبھاؤڻا سکھے، پر ایس بندے بشر ساڈے کولوں چھُڑا بھوکڻا ہی سکھیا اے۔"

"چُھڑا بھوکڻا؟"، رتّے پچھیا۔
" نہیں، ہُڻ تاں وڈھڻ دی ٹریننگ وی چنگی ہوگئی سُو۔ پچھلیاں پندراں سو ورھیاں وچ اساں ایہناں نوں اینا نہیں وڈھیا ہوڻا جنّاں ایہہ پچھلیاں دو دہاکیاں وچ ہک دوجے نوں وڈھد بیٹھے نیں۔"
" پر کیوں ڈبیا۔ ایس بندے نوں بندیائی چھڈڻ تے کُت پُڻا کرن تے کیں مجبور کیتا اے؟"

" ویرا ، ایہہ امریکی ڈالر دی خرابی ہئی ساری ۔ پرایا تے حرام دا ڈالر بندے نوں حرام خور کر چھڈدا اے ۔ ایہہ ڈالر جدوں سُٹیا جاوے تاں ایہدے وچ ہڈی والا سواد آ جاندا اے تے ہڈیاں چُونڈ چُونڈ کے مونہہ نوں کُت پڻا لگ جاندا اے تے خلقت بندیائی چھڈ کے بھوکڻ دی شوقین بڻ جاندی اے ۔

تے ایہہ امریکی تفریقی آپڻا ڈالر ایہناں اگے انجے ہی سُٹدے نیں جیویں ایہہ ساڈے اگے ہڈیاں سُٹدے نیں۔ ڈالر چونڈ چونڈ کے ایہناں سارا کُت پُڻا سکھ لیا اے۔ تے جے ہُڻ ایہہ ہالووین دے میلے توں کُتا بوتھیاں لے کے لا لیڻ تاں ایہناں نوں ساڈی برادری وچوں وی کوئی پچھاڻ نہ سکے کہ ایہہ نقلی نیں کہ اسیں۔

" یارا ، اسیں تاں کسے اوپرے بندے، کُتے، چور، ڈاکو یا مشکوک نوں ویکھ کے اوہدے تے بھونکنے ہاں پر ایہہ تاں جاڻو ہو کے ہک دوجے نوں چُھٹ کے پے جاندے نیں؟"

" تے فیر؟ کیہ کرنا چاہیدا اے؟"

" میں پیا سوچناں جو جیس بندے آپڻے وچ بندیائی نہیں رہڻ دِتی اوہ ساڈے وچ کُتیائی کیویں رہڻ دیسی؟ لگدا اے جو ایہدے ہتھوں ہر ریتی رواج اُجڑنا اے، تے مینوں تاں ہُڻ ایس بندے نال رہڻ تے شرم آؤڻ لگ پئی اے ۔ خورے ایس سانوں وی آپڻےہار کُرپٹ کرن دا متا ہی نہ پکا لیا ہووے ۔ میری صلاح اے جو ایہہ شہر تے پنڈ گراں چھڈ جائیے تے بھوتاں چُڑیلاں دی نگری وچ جا رہئیے ۔ مینوں چنتا اے جو اسیں کُرپٹ ہو گئے تاں وفا دی رسم مُک جاسی تے دنیا سُنجی ہو جاسی۔"

" کہندا تاں توں ٹھیک ایں۔ مینوں وی ڈاہڈی چنتا لگ گئی اے۔"

" نالے پتہ ہئی ایس بندے آپڻے اُتے کیہڑے پلستر لا لئے ہوئے نیں۔ ایہناں وچوں ذرا کسے ہک نوں پچھ کے تاں ویکھ جو اوس لکھ لکھ روپئے دی جیہڑی گھڑی بدھی ہوئی اے، اوہ کتھوں آئی اے تے فیر ویکھ اوس دی چوں چوں تے سُڻ اوس دی ٹوں ٹوں۔ انج لگسی جیویں کتیاں دی ستونجا پیڑھیاں دے پنج ارب کُتے رل کے بھونک مچا رہے نیں ۔

یارا ، ایہہ ڈالر بوہت بولدا اے، بوہت بولدا اے، بوہت ہی بولدا اے۔ تے اوہ اوہ گاہلاں تے مندے کڈھدا اے جو رہے ناں رب دا"۔

اوہ ایہہ کیہ؟ ایہہ بھاجڑ کیوں پئے گئی اے ساڈے ڈیرے۔ ایڈا کُداڑ ایس کُت خانے وچ پہلے کدی نہیں سی ویکھیا؟ کیہ ہویا اے؟"

لگدا اے کوئی بندہ کُت خانے آ وڑیا اے ۔ بھج اوئے کتوریا بھج !!!۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels