Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> ہر بیماری دا علاج چپیڑاں نال

ہر بیماری دا علاج چپیڑاں نال

وچار ڈیسک
April 15th, 2011

تائیوان وچ میڈیکل قانوناں دی خلاف ورزی کرن اتے آپڻے آپ نوں عوامی طریقہ علاج دا ماہر آکھڻ والے اک انج دے امریکی 'ڈاکٹر' نوں ملک چھڈڻ دا حکم دے دتا گیا ہے جیہڑا مریضاں دا "پھینٹی تھیراپی" نال علاج کردا ہے۔

تائی پے توں ملیاں رپورٹاں وچ دسیا گیا ہے جو ایس بندے دا ناں ژیاؤ ہونگ چی ہے، جیہڑا اک امریکی شہری ہے تے اک سیاحتی ویزے تے تائیوان رہ رہیا سی۔

نال ہی 'لوک تھیراپی' کرن والے ایس ڈاکٹر نوں جیہڑا اک لکھاری وی ہے 50 ہزار تائیوانی ڈالر یاں سولاں سو امریکی ڈالر دے برابر جرمانے دی سزا سڻائی گئی ہے کیوں جو اوہ تائی پے وچ پربندھیاں دی اجازت دے بنا اک معالج دے طور تے کم کر رہیا سی۔

ژیاؤ ہونگ چی دا کہڻا ہے جو پراڻے عوامی طریقہ علاج دے مطابق کسے وی بندے نوں لگن والیاں بماریاں اُچیچا پراڻیاں بماریاں دا علاج مریض نوں پھینٹی لا کے کیتا جا سکدا ہے۔

ایہہ امریکی شہری ایس طریقہ علاج نوں Slapping Therapy دا ناں دیندا ہے تے حالیں اوہنے تائی پے وچ آپڻی 'شفا دیڻ والیاں خوبیاں' بارے اک مشہوری کرن والے پروگرام وچ لوکاں دی اک وڈی گڻتی ساہمڻے اک مریضہ دی بانہہ چپیڑاں مار مار کے لال کر دتی۔

ہونگ چی دا دعویٰ ہے پئی پھینٹی لا کے کسے وی مریض دے جسم وچ کسے اُچیچے تھاں تے موجود زہر نوں انج کڈھ دتا جاندا ہے پئی انج توانائی دا جسمانی بہاء تیز ہو جاندا ہے تے مریض نوں اوہدے مرض توں چھٹکارا مل جاندا ہے۔

تائیوان وچ اک مقامی ٹیلی ویژن تے ہونگ چی دے مشہوری دے پروگرام دا جیہڑا حصہ نشر کیتا گیا، اوہدے وچ ایس معالج نے ایہہ دعویٰ وی کیتا سی پئی اوہ بہتے بلڈ پریشر تے دل دیاں کئی بیماریاں توں اڈ کجھ ہی دناں وچ چپیڑاں مار مار کے شوگر ورگی بماری دا وی سو فیصد علاج کر سکدا ہے۔

ایہہ چینی نژاد امریکی شہری علاج وچ آپڻے مریضاں دی پھینٹی دے نال نال اوہناں دے پٹھے وی کھچ دا ہے کیوں جو 'پٹھے کھچڻ نال اوہناں وچ زہر دا ارتکاز' مک جاندا ہے۔ژیاؤ ہونگ چی تے جادو راہیں علاج نوں رواج دیڻ دیاں کوششاں دا الزام وی ہے تے اوہنوں تائیوان چھڈڻ لئی ست دناں دی مہلت دتی گئی ہے۔


سوادی گل ایہہ ہے جو folk therapist دی پھینٹی راہیں علاج دے موضوع تے تائیوان وچ ہی اک کتاب وی چھپی ہے جیہدیاں ہڻ تیکر پنج لکھ توں بہتیاں کاپیاں وک چکیاں نیں۔

تائی پے وچ محکمہ صحت تے پردیسیاں بارے ملکی ادارے دے پربندھیاں موجب ہونگ چی ہڻ تیکر چین، تائیوان، تے امریکہ وچ "چپیڑاں راہیں علاج" دے آپڻے طریقیاں بارے کئی تشہیری پروگرام کر چکی ہے جیہدے وچ ہر واری وڈی گڻتی وچ لوک آئے سڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels