Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> وساکھی: خوشی تے بھرا بندی

وساکھی: خوشی تے بھرا بندی

ندیم مشتاق رامے
April 14th, 2011

وساکھی دا دیہاڑا اُنج تے بہار دے مکڻ تے عیسائیاں دے ایسٹر تے یہودیاں دے پاسور دے نیڑے آؤندا ہے۔ ایہہ دیہاڑا چوداں اپریل نوں منایا جاندا ہے تے سارے جگ وچ رہڻ والے سکھاں لئی بہت مقدس سمجھیا جاندا ہے۔ پنجاب دے کساناں لئی ایس دیہاڑے نوں خوشی دا سنیہا سمجھیا جاندا ہے۔

ایہنوں مناؤڻ دا مقصد آپو چ بھرا بندی نوں ودھاؤڻا ہوندا ہے سگوں ایہدے نال ہی کسان کڻک وڈھڻی وی شروع کر دیندے نیں جیہڑا اوہناں لئی بڑی خوشی دا کارڻ ہوندا ہے۔ وساکھی دا دیہاڑا سکھاں لئی مذہبی حساب نال بڑی اُچیچتا رکھدا ہے۔ ایس دیہاڑے اوہناں دے دسویں ۔ گرو۔ گرو گوبند سنگھ نے پنج ، پیاریاں دا امتحان لے کے سکھ مذہب وچ ذات دا خیال مکایا سی۔ اوہناں نے سکھاں دی پچھاڻ لئی کاف توں شروع ہوڻ والیاں پنج شیواں نوں لازمی آکھیا یعنی کیس، کچھا، کڑا، کنگھا تے کرپان۔

وساکھی دے دن نوں خالصہ دا مڈھ وی آکھیا جاندا ہے۔ کیوں جو ایسے دن دسویں گرو، گرو گوبند سنگھ نے پنجابی دے پہلے مہینے وساکھ دی پہلی تاریخ یعنی انتی مارچ سولاں سو نڑینوے نوں آنند پور وچ ہوڻ والے سکھاں دے اکٹھ وچ خالصہ دا مڈھ رکھیا۔

سکھ مذہب دے لوک وساکھی دے دیہاڑے گردواریاں وچ اکٹھے ہو کے مذہبی عبادت کردے نیں۔ ایس دن پہلے رنگ دی بڑی اُچیچتا ہوندی ہے۔ وساکھی دا ناں سنسکرت تے سنسکرانتی توں لیا گیا ہے۔پنجاب دے کسان وساکھی نوں دیہاڑے دے طور تے مناؤندے نیں کیوں جو اودوں بہار اپنے عروج توں چھیکڑ ول ودھدی ہے، پھُل اپنی خشبو کھلار رہے ہوندے نیں تے آمب دے رُکھاں تے بُور تے کلیاں بہت ہوندیاں نیں ایس لئی کہیا جاندا ہے:

پک پیاں ککاُں لکھت رسیا
بورپیا امباں نوں تے گلاب ہسیا
باغاں اُتے رنگ پھیریا بہار نے
بیریاں لفیاں تے ٹہایاں دے بھار نے
پنگڑیاں والڻ ویلاں رکھی چڑھیاں
پھلاں ہیٹھوں پھلڻ پوریاں لڑیاں

وساکھی دے دیہاڑے توں مگروں کسان کڻک دی گہائی دے مگروں گھراں وچ لیاؤڻ دیاں تیاریاں کردے نیں تے گھراں دے ویہڑے تے بھڑولیاں نوں اُچیچا تیار کیتا جاندا ہے تے ایہدے مگروں ہر پاسے خوشیاں دا دور ہوندا ہے۔ جٹیاں اپنی خوشی دا وکھالا گیت گاؤندیاں ہوئیاں کجھ انج کردیاں نیں:

کنکاں دی مُک گئی راکھی
او جٹا آی بیساکھی
کنکاں دیاں فصلاں پکیاں نے
جٹ کھیت وچ گجدا اے
پکوان پکوندیاں جٹیاں نے

وساکھی دے موقعے تے سونے ورگی ککا دی فصل نوں ویکھ کے کسان خوشی نال نچ دے تے گاؤندے نیں کیوں جو اوہ اوہناں دی چھماہی توں بہتے چر دی محنت دا پھل ہوندا ہے۔ ایہدے نال اوہناں دی سماجی تے معاشی حالت چنگی ہوندی ہے تے ایس موقعے تے اوہ اک دوجے دیاں خوشیاں وچ رل کے آپو وچ محبت تے سانجھ بھیالی دا وکھالا کردے نیں۔ پنجابی جوان ایس موقعے تے بھنگڑے پاؤندے نیں تے گیت گاؤندے نیں تے اک دوجے دے موڈھے نال موڈھا جوڑ کے کہندے نیں:

کٹھے ہو کے آیا ہولاں سارے جگ دا
بھیڑ وچ موڈھے نال موڈھا وجدا
ہٹیں ہٹیں شوکیاں دی بھیڑ کھالیے
آپریمی بیساکھی چلیئے

وساکھی دے دیہاڑے دے حوالے نال سارے پنجاب دے شہراں وچ میلے منائے جاندے نیں۔ سکھ ایس دیہاڑے دے حوالے نال مذہبی رسماں ادا کرن لئی ہر سال ہندوستان تے سارے جگ چوں پاکستان آؤندے نیں تے ایس سال وی سکھ مذہب دیاں تن چار سویں خالصہ جنم دیہاڑے (وساکھی) دے اکٹھ وچ رلت لئی گوردوارہ پنجہ صاحب حسن ابدال آؤڻ گے تے تیراں توں چوداں اپریل دی رات تیکر وساکھی منا کے مُڑ جاڻ گے۔

سائیں دی نگاہ جگ نے سوالی اے
چل نی پریمی بیساکھی چلیئے


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels