Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> مجھ گاں پریشان، بندیاں نے بندیاں دے ددھ تے گزارا کر لیا تے اوہناں دا کیہ فائدہ

مجھ گاں پریشان، بندیاں نے بندیاں دے ددھ تے گزارا کر لیا تے اوہناں دا کیہ فائدہ

April 2nd, 2011

اک اڻوکھی خبر ویکھی ہے جیہنوں پڑھ کے نظر آپوں نظراں چراؤندی پھر رہی ہے، پر ویلے دی منگ ہے جو نظراں وچ نظراں سگوں اکھاں وچ اکھاں پا کے گل کیتی جاوے تے ممتا دی عظمت نوں انگریز دی نویں شرارت توں بچایا جاوے۔ خبر ایہہ ہے جو لندن دے کوونٹ گارڈن دی اک آئس کریم کمپنی نے زنانیاں دے ددھ نال بڻائی گئی آئس کریم ساہمڻے لیاندی ہے جیہدا ناں '' بے بی گاگا '' رکھیا گیا ہے۔ ناں تے انج دا ہے جیہنوں سر سنگیت دا اٹھواں سُر دریافت کر لیا گیا ہووے۔ ایس ممتا ماری آئس کریم نوں ویسٹ منسٹر کونسل نے صحت تے تندرستی دے اصولاں دے عین مطابق متھ دتا ہے سگوں طاقت تے غذائیت نال بھریا وی دسیا ہے۔ لہندی آزادی دیاں علمبردار کجھ زنانیاں نے پہلوں آپڻیاں رضا کارانہ خدمتاں پیش کیتیاں نیں۔ کمپنی نے ایہناں زنانیاں دے تعاون دا شکریہ ادا کردیاں ہوئیاں اوہناں نوں پارٹ ٹائم نوکری دی آفر وی کر دتی ہے پئی تھوڑا جہیا ویلا کڈھ کے آؤ تے آپڻے حصے دی "گڑوی" بھر جاؤ۔

کنڈی نہ کھڑکا سوہنیئے سدھی اندر آ
تے گڑوی ددھ والی آکے آپے ای بھر جا

دنیا وچ پہلے ہی ماواں بالاں نوں آپڻا گھٹ تے ڈبیاں دا ددھ بہتا پلاؤندیاں نیں۔ ایس آئس کریم والیاں دا کاروبار چل پیا تے ماواں کمرشلائزڈ ہو جاڻ گیاں تے بال دے کول صرف ابا تے ڈبہ ہی رہ جاوے گا۔ اک تے اخلاقی طور تے ایہہ "لیڈی ملک آئس کریم" کھاڻی اوکھا ہووے گی تے جے فیشن دے طور تے قبول کر وی لئی گئی تے میاں بیوی دا ساک اک "اسکوپ" دی مار ہووے گا۔ دیدہ دانستہ یاں غیر دانستہ جے کسے محفل وچ پروہڻچار نے پروہڻیاں نوں کھلا دتی تے سارے جوڑے آپو وچ شریک ددھ بھیڻ بھرا ہو جاڻ گے۔ میاں بیوی آئس کریم شریک، اماں ابا آئس کریم شریک، ماسی ماسڑ، چاچا چاچی، ماما مامی، تایا تائی یعنی ہر پاسے شرکت تے شریکا کھلر جاوے گا۔ سارے کزن بے وزن ہو جاڻ گے۔کِتوں کوئی ساک آوے گا تے سب توں پہلوں منڈے تے کڑی وچ ایہہ چیک کیتا جاوے گا جو کِتے دوہاں دا دوروں نیڑیوں کوئی آئس کریمی ساک تے نہیں۔

عین اودوں جدوں "قبول ہے" "قبول ہے" ہو رہیا ہوندا ہے کسے نے آئس کریم شریک ہوڻ دا نعرہ مار دتا تے سارا کھیڈ وگڑ سکدا ہے۔ دوہاں دا ڈی این اے ٹیسٹ سگوں "بے بی گاگا" ٹیسٹ کراؤڻا پے جاوے گا۔ گاؤڻ والیاں دے کاروبار تے وی مندا اثر پے سکدا ہے۔ ایدھر بے بی دی اماں نے بے بی نوں کہیا "بے بی گا۔ گا" تے اودھر تماش بین نس کھلوتے پئی کِتے ڈاکخانہ نہ مل جاوے۔

گاواں مجھاں بکریاں وکھ پریشان ہو جاڻ گیاں پئی جے بندیاں نے بندیاں دا ددھ ہی پیڻا ہے تے فیر اوہناں دے جیون دا مقصد۔ "میڈکاؤ" تے پہلوں ہی پاگل پڻے وچ منی وانگوں بدنام ہے۔ بھینس دے اگے پہلوں ہی بین بیکار سی، ہڻ تماش بین دے اگے وی بیکار ہو جاوے گی۔ بکری نوں پہلوں ہی بزدلی دا سمبل بڻا کے پیش کیتا جاندا ہے ہڻ اُکا ہی بے دلی دا شکار ہو جاوے گی۔ ہو سکدا ہے ایہہ سارے ددھ دیڻ والے جانور روس وکھالا کردیاں ہوئیاں آپڻا ددھ آپوں ہی پیڻا شروع کر دیڻ۔ جے بندہ آپڻے ددھ دے چسکارے لے سکدا ہے تے ایہہ کیوں نہیں لے سکدے۔

جے انسان انسانی ددھ دی آئس کریم کھا سکدا ہے تے ایہہ جانور چاء دی پتی دا ڈبہ کھا کے ددھ پتی کیوں نہیں پی سکدے۔ دو چار پیٹیاں امباں دیاں کھا کے مینگو ملک شیک تے ڈیڈھ دو درجن کیلے کھا کے بنانا ملک شیک وی پی سکدے نیں۔ بس ذرا بھنگڑا پاؤڻا پوے گا۔ شیک بناؤڻ لئی ایس لئی اوہ ابرارالحق یاں دلیر مہدی دی سی ڈی تے وی پایا جاسکدا ہے بہتی چھیتی شیک بناؤڻا ہووے تے نصیبو لال دے گرما گرم گیتاں تے وی ایہہ کم کیتا جا سکدا ہے۔

نصیبو لال دے گیت ہٹ ہوڻ نہ ہوڻ ہاٹ ضرور ہوندے نیں۔ کجھ تے اینے ہاٹ ہوندے نیں جو 70 سال دا بابا وی سڻ لوے تے 25 سالاں دی جوانی پھڑکڻ لگدی ہے۔ نصیبو لال دا گیت سڻ کے چنگیاں چنگیاں دا چہرہ لال ہو جاندا ہے۔ کدی گیت سڻ کے تے کدی گیت تے عمل کر کے۔ اوہدے گیتاں وچ اوہ اوہ منظر کشی تے مے کشی ہوندی ہے پئی وڈا وڈا للورام وی کجھ ہور سمجھڻ لگدا ہے تے کسے نہ کسے رستم نال وج جاندا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels