Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> بیمی فائنل: پنجابی منڈے دوہیں پاسے تے شودائی سیاستدان بونگا چشتی

بیمی فائنل: پنجابی منڈے دوہیں پاسے تے شودائی سیاستدان بونگا چشتی

March 30th, 2011

اج شیدا میسنا مینوں سڑک تے ہی مل گیا کہندا تیرے ول آرہیا ساں اک ضروری گل پچھن لئی؟

میں کہیا پُچھ؟

کہندا پہلے تے ایہہ دس جو ایہہ سیاست داناں دا کیہہ بنے گا جیہڑے ہلکائے کتّے وانگ کرکٹ ٹیم دے پچھے نس رہے نیں۔ تے دوجے جے پاکستان سیمی فائنل جت گیا تے پھیر ایس جمعے مولویاں تے جماعتیاں دا کیہہ ہووے گا؟ میں تے بڑا سوچیا پر کُجھ سمجھ نہیں آیا۔

میں کہیا یار تینوں سیاست داناں دی کرکٹ وچ دلچسپی توں کیہہ تکلیف آ تے جماعتیاں دا کیہ مسلہ توں لبھ لیا؟

کہندا اوئے بونگیا، وزیر اعظم توں لے کے نواز شریف کیہہ  تے اوہ رحماں  (اوہ رحمان ملک نوں رحماں کہندا ہے) سب آفریدی نوں فون کرکے اوہدا ٹائم کھوٹا کررہے نیں۔ اچھا توں دس من موہن سنگھ یا اوہناں دے کسے وزیر نے دھونی نوں کال کیتا؟ نہیں ایہہ بس ساڈے تھن ٹُٹ سیاستدان شوہدیاں وانگ کرکٹ ٹیم دے پچھے  پئے نیں ۔ توں دس اہناں دا کیہہ خیال ہے جو شاہد آفریدی دے جتن نال لوکیں  ایہہ سمجھن لگ پین گے جو گیلانی تے نواز شریف جت گئے نیں یا لوکیں اک دن دے میچ دے نشے وچ آٹے تیل کھنڈ دیاں  انھیاں قیمتاں بُھل جان گے؟

میں کہیا  توں شہباز شریف نوں تے بُھل ہی گیاں جنہاں ہر جتن والے کھڈاری نوں اک مربع زمین انعام دین دا اعلان کیتا ہے۔ بئی بندہ پچھے ایہہ تیرے پیو دی زمین ہے جو توں بنا پچھے دسّے ونڈ رہیا ہیں ۔۔مینوں وی شیدے دی گل سُن کے تاء آگیا۔

شیدا کہندا تے شودا  ویکھو  پنجاب وچ میچ ویکھن لئی ادھی چھٹی تے سندھ وچ پوری چُھٹی۔ ایہہ میچ ہے  یا پاکستان ڈے؟ ہندوستان نے تے اجے تیک کوئی چھٹی نہیں دتی۔ تے جے پھیر وی پاکستان ہار گیا تے؟ پھیر ایہو چھٹی والے ٹیم دے خلاف جلوس کڈھن گے۔

میں کہیا یار  ہُن توں سیاستداناں دے غصے وچ میچ تے نہ نا ہروا۔۔ کوئہ خیر دی گل کر۔

شیدا کہندا یار میرے کہیاں کوئی ٹیم نے جتنا یا ہارنا ہے؟ ایہہ مولوی جیہڑے  مسیتاں وچ جتن دیاں  دعاواں منگوا رہے نیں ہارن تے ایہہ کہن گے ساڈا اللہ ہار گیا تے اوہناں دا بھگوان  جت گیا؟

میں کہیا یار کسے لئی کجھ کر تے سکدے نہیں ، ایہو جیہیاں بونگیاں مار کے سمجھدے نیں "ہم عوامی لوگ ہیں"

شیدا کہندا جے  عوامی  نے تے لوکاں نوں  پانی بجلی گیس دین جیہدی لوکاں نوں لوڑ ہے ، ایہہ گیاراں جتے ہوئے منڈیاں دی کرکٹ ٹیم دے سر سہرا بن کے آپ کیوں سڑبھالے بن رہے نیں۔ ہاں یاد آیا ،  دوکان وچ اک باؤ کہہ رہیا سی جو  اِہنوں پاک ہند مقابلہ ایویں ہی کہی جاندے نیں ایہہ بہتا تے پنجابی مُنڈیاں دا آپو وچ مقابلہ ہے۔

میں پُچھیا او کیویں ؟

کہندا او باؤ کہندا سی جو پاکستانی ٹیم  وچ شاہد آفریدی، یونس ، عمر گل تے اسد شفیق نوں چھڈ کے سارے پنجابی نیں۔ تن چار تے اپنے لاہور دے ہی نیں جیویں رزاق، دو کامران بھرا۔ ہندوستان دی ٹیم وچ تن تے سکھ پنجابی نیں ، دھونی، ہر بھجن سنگھ تے یوراج سنگھ، کجھ تن چار منڈے دلی دے نیں اوہناں وچ دو تن تے ہندو پنجابی منڈے ہون گے۔ سو کھیڈ تے پنجابی اک دوجے نال رہے نیں ایہہ باقیاں نوں کاہدا ایڈا وخت پیا اے۔

میں کہیا شیدیا یار مُلک تے مُلک ہوندا اے نا۔ انج تھوڑا ہی ہوندا جیویں توں کہنا۔ اچھا دس ایہہ مولویاں دا تینوں کیہہ رولا ہے؟

شیدا اُچی اُچی ہسن لگ پیا ، کہندا سچی گل ہے اجکل مولویاں نوں ویکھ کے بڑا سواد آرہیا ہے۔ سب دا دھیان کرکٹ ول ہے تے اہناں دی ریں ریں نوں کوئی سُن ہی نہیں رہیا۔ تے جے پاکستانی ٹیم سیمی جت گئی تے مولویاں نوں جمعے دا جلوس وی نہیں نکلنا جیہدی اوہناں نوں ہُن عادت پے گئی ہے۔!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels