Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> جماعت اسلامی دی لسّی بونگا چشتی

جماعت اسلامی دی لسّی بونگا چشتی

March 23rd, 2011

اج شیدا مینوں پچھن لگا جو سنیاں اے  لڑائی تے لسّی جنی مرضی ودھا لوو۔ لڑائی گلاں نال تے  لسّی پانی پا کے ودھدی جاندی ہے۔ جنی دل کرے کر لو۔

میں کہیا شیدیا، توں مینوں اج اپنے پینڈو محاورے سکھاون آیا ایں؟

نہیں یار اج جماعت اسلامی دے وڈھے سید منور حسین دا بیان سن کے مینوں لگا جو جماعت اسلامی کول لسّی تھوڑی جیہی ہے تے پانی دا پورا تلاء۔ اوہ تلا چوں پانی کڈھ کڈھ کے لسّی وچ پائی جاندی ہے۔

میں پچھیا بیان کیہہ سی؟

کہن لگا جی سید صاحب ہن جمعے نوں توہین قرآن دے خلاف احتجاجی مجاہرہ کرن گے۔ کہندے نے امریکہ دے کسے پادری نے قرآن دی توہین کیتی ہے تے ایہہ اسلام دے خلاف سازش ہے۔

میں کہیا یار ایہہ گل تے بہت پرانی نہیں ہو گئی؟ کئی مہینے پہلاں سنیا سی جو اک پادری نعوذ باللہ قرآن نوں ساڑنا چاہندا اے۔ پر لوکاں لعن طعن کرکے اوس نوں نکرے لا دتّا سی۔ ایہہ اوسے دی گل کر رہے نیں جماعت والے؟

شیدا کہندا، میرا وچار تے ایہو ہے جو اوہو گل ہے، تے جے کوئی نویں ہوئی آ تے میرے ورگے جاہل نوں کتھوں پتہ لگنا۔ پر مینوں ایہہ گل سمجھ نہیں آوندی جو کسے ہور مذہب دا کوئی بندہ کسے ہور ملک وچ ایہو جیہا لعنتی کم کرے تے اسیں اوہنوں کیویں روک سکنے آں؟ پاگل بندے تے ہر تھاں ہوندے نیں اوہناں دا کیہہ علاج۔ پھیر تینوں یاد ہے اودوں پپل والے پروفیسر نے دسیا سی امریکی حکومت اپنے قنون مطابق اوس پادری نوں روک وی نہیں سکدی  صرف منت ترلا کر سکدی ہے۔

ہاں یار میں وی اک تھاں پڑھیا سی اوہ اینے نامراد نیں  نعوذ باللہ جیل وچ انجیل دے ورقعیاں نوں ٹائلٹ پیپر بنا کے ورت لیندے نیں۔ جے اوہ اپنے مذہب نال ایہہ کردے نیں تے اوہناں نوں  ساڈے مذہب  دی کیہہ عزت۔ اوہناں نوں کوئی روک نہیں سکدا تے اسیں کیویں روک سکنے آں؟ پر شیدیا ایہہ دس ایہہ جماعت نوں ہن کتھوں خیال آگیا؟

شیدا ہسیا۔ کہندا اوئے بونگیا توں رہیں گا بونگا دا بونگا ہی۔ یاد ہے میں تینوں کہیا سی  ملّیاں کول سڑک تے آون دے اک ہزار بہانے نیں اک مکے گا کوئی ہور لبھ لین گے۔اوہناں نوں ہر ہفتے جمعے دے دن توں پہلاں اک بہانہ لبھنا ہوندا تاں جو جمعے تے آئے نمازیاں نوں ورت سکن۔

میں کہیا ریمنڈ ڈیوس چلائی رکھن!

شیدا پھیر ہسیا، اوئے بونگیا ایہو تے مسئلہ ہے، ڈیوس والے کیس دے پہیّے دی پھوک نکلی۔ ریمنڈ ڈیوس دے چُھٹن تے جماعت تے اوہ جھلے عمران خاں دا خیال سی جو ہن  حکومت دا چوبارہ ڈھاون دا ویلا آگیا۔ ایہو سوچ کے اوہناں ہر تھاں جلوس کڈھن دی  کوشش کیتی۔ لوکاں گاہ ہی نہیں پائی۔ آپے ٹھنڈے ہو کے بہہ گئے ایس لئی ہُن نواں بہانہ چاہیدا ہے

چل گیا تے چل گیا نہ چلیا تے نہ سہی۔ بس توں ایہہ سمجھ جماعت اسلامی کول لسّی دا نکا جیہا کُجّا  ہے، اوسے وچ پانی پائی جاندے نیں۔ لوکیں وی ایس ٹھگی نوں سمجھدے نیں ایس لئی جماعت دی لسّی نہیں پیندے۔ پر جماعت وی کیہہ کرے لسّی تھوڑی ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels