Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> مسکینیاں شسکینیاں : جندڑی ، دُکھ تے ہاسے

مسکینیاں شسکینیاں : جندڑی ، دُکھ تے ہاسے

سودا مسکین
March 20th, 2011
5 / 5 (9 Votes)

اوکھے ویلے، ورھدیاں گولیاں، ڈگدیاں لوتھاں، جنازے تے اسلام دے اُچے کلمے تے نعرے۔ ایہو جہے حالات دے شکنجے وچ پھس کے جندڑی وچ ہاسے دا ماسہ وی باقی نہیں رہ جاندا ۔ بندہ وچارا اوکھیائی دے ویلڻے وچ انج ویلیا جاندا اے جو رہے ناں رب دا۔ سب کجھ نُچڑ جاندا اے تے سکھڻا پنجر چھُڑیاں ہانہواں تے ہاڑے ای چُرکدا اے۔

پر سُودے مسکین دا گیانی گُرو کہندا اے جو اوکھا ویلا کپڑے دھوڻ دی بجلی والی مشین ورگا ہوندا اے، ایس مشین وچ پئے کے بندہ تُنبیا جاندا اے، ویلیا جاندا اے تے کتیا جاندا اے ۔ ترنجڻ دے ترکلے تے کتّے مہین دھاگے ہار ہو جاندا اے۔ فیر اوس وچ اوہ گُڻ آ جاندا اے جو اوہ عشق دے سوئی دے نکّے ورگے چھیک وچوں دی لنگھ جاندا اے۔

ویلے دی مشین بندے نوں تھبوکے ماردی اے، جھنبدی اے ، جھُوڻ دی اے، کُٹدی تے نپیڑدی اے، تے جدوں بندہ بشر باہر آؤندا اے تاں کھُم چڑھیا ہویا ہوندا اے، چٹا کھمور۔ کسے بانکی نار دے لونگ ہار لشکارے ماردا اے۔

میریاں وطنیاں نوں وطنے دے سیاسی حالات، بد امنی تے مذہبی مورکھتا اوکھیاں کیتا ہویا اے۔ مذہبی مورکھاں دا ہنیر ایڈا کُو سنگھڻا اے جو ہر بندے نوں دوجا بندہ، بندہ نہیں آدمخور نظر آؤندا اے تے کراچی توں لے کے وزیرستان تائیں آدم بو ہی آدم بو دا بُلارا کنّی پیندا اے۔

ایہو جہے دُکھ دے دوزخ وچ کوڻ ہس سکدا اے۔ پر لگدا اے بندے دا ہاسا اوہدے اندر کِتے نہ کِتے ڈکیا ہوندا اے، تے کسے ویلے وی نکل سکدا اے۔
بھاٹی دروازے دے اندر ہک سکول دی جماعت وچ پشلے ہفتے جو واپری اوہ ایس گل دا نتارا کر چھڈے گی:۔

ماسٹر : ۔ کاکا بلّی، ایہہ دس، جیس بندے دے کن خراب ہوڻ تے اوہ سُڻ نہ سکدا ہووے اوس نوں کلّے ہک شبد وچ کیہ کہندے نیں؟
پڑھنہار : اوہنوں پاکستانی کہندے نیں۔
ماسٹر :۔ اوہ کیویں؟
پڑھنہار : لؤ دسو، تہانوں پتہ نہیں جو پاکستانی نہ رب دی گل سُڻ دے نیں، نہ اوہدے رسول دی۔ نہ قنون دی نہ آئین دی ۔ تے ایہناں دے کن خراب نہیں تے ہور کیہ اے؟

ماسٹر حیران ہو کے مُنڈے دے منہ ول تکیا تے آکھیا، میں تاں سُڻیا سی اوہنوں ڈورا کہندے نیں۔ ایہہ سُڻ کے پوری جماعت دیاں مُنڈیاں تاڑیاں ماریاں ، اوئے اوئے کیتی تے آکھیا ، " پاٹا پُراڻا ماسٹر ،گھل دیو لنکاسٹر، چُک کے مارو باہر" ۔ تے ایہہ سُڻ کے ماسٹر آپو کلاس چھڈ کے تیر ہو گیا ۔

۔۔۔
ہک ٹی وی چینل دا رپورٹر ہک کروڑ پتی سیاستدان دا انٹرویو کرن آیا۔ اوس سیاستدان کولوں پچھیا، "سر، تُسیں سیاست وچ کروڑ پتی کیویں بڻے ساؤ"۔
سیاستدان : اپڻی گھر والی دی وجہ توں۔
رپورٹر : اس دا مطلب اے جو جسراں ہر کامیاب بندے دی کامیابی پچھے ہک سُگھڑ بی بی دا ہتھ ہوندا اے ، تہانوں وی کروڑ پتی بناؤڻ وچ تہاڈی بیوی دا ہتھ اے۔
سیاستدان : صرف ہتھ ای نہیں پوری بانہہ۔ ویاہ توں پہلاں میں کھرب پتی ہوندا ساں تے ویاہ توں مگروں میں چھُڑا کروڑ پتی رہ گیاں۔
ایہہ کیمرے ہٹا، میں دو ہنجو کیر لواں۔
رپورٹر ٫ تُسیں قوم نوں کوئی نویکلا تے اُچیچا سنیہا دیڻا چاہوندے ہو؟۔
سیاستدان: بالکل، میں اُچیچ نال ایہہ کہڻا اے جو جے اپڻی پوری کمائی اپڻی رن نوں دے کے دس فیصد سُکھ لبھدا ہووے تاں اوہ رستہ لبھو جیہدے وچ کسے ہور نوں اپڻی دس فیصد کمائی دے کے سو فیصد سُکھ لبھ سکیا جاوے۔

لو جی مہربانی کر کے ہسڻا نہیں، ملک دے حالات بڑے خراب چل رہے آ ۔
۔۔۔

ہک پیاری جہی، ملوکڑی جہی بی بی ہک ڈاکٹر کول گئی تے آکھڻ لگی، "ویکھو نا ڈا کٹر صاحب، میں ہر ویلے اپڻے گھر والے ہتھوں تنگ رہنی آں تے میری صحت خراب ہو رہی اے۔"
ڈاکٹر: تسیں دن وچ تن میل لے رہے او؟
مریض لیڈی : ہائے اللہ ، کیہ آکھیا جے تن میل کتھوں، میرے کھیڑے تو کلّے اوہی پئے رہندے نیں۔
ڈاکٹر: جی میں میل کہہ رہیا ہاں یعنی کھاڻا، بریک فاسٹ ، لنچ تے ڈنر ۔
لیڈی : ہا ہائے ، میں مر گئی ، لو میں تے تن میل یعنی جڻے سمجھی ساں۔ ویسے تہاڈے منہ وچ گھیو شکر، جے تن جڻیاں والے میلز ہوندے تاں میں کدے بیمار ہو سکدی ساں۔
لو بھئی ، گل ولیت دی اے، ایس لئی ایہنوں دیسی نہ سمجھڻا پر ہسڻ تے کوئی ڈکا نہیں جے۔
۔۔۔

ہک جوڑا ہک ہوٹل وچ ٹھہریا ہویا سی۔
ہک دن مرد دوڑیا تے گھبرایا ہویا منیجر کول آیا تے آکھڻ لگا ، " منیجر صاحب، چھیتی چلو، میری گھر والی باری تھاڻی چھال مار کے خود کُشی کرنا چاہوندی اے ۔
منیجر: جناب میں کیہ کر سکنا؟
مرد: اوئے کمینیا، کمرے دی باری نہیں پئی کھُلدی ۔۔۔۔۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels