Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> ریمنڈ ڈیوس ڈیل بونگا چشتی

ریمنڈ ڈیوس ڈیل بونگا چشتی

March 17th, 2011
5 / 5 (2 Votes)

میں ریمنڈ دیوس دے چھٹن دی خبر سنی تے نسیا شیدے دی دوکان ول۔ مینوں پتہ سی اوس کول کوئی چسکیدار خبر ضرور ہووے گی۔ اوہ  ربوں سببوں ویہلا بیٹھا سی ۔ مینوں ویکھ کے ہسن لگ پیا

"توں یمنڈ ڈیوس دے چھٹن دی خبر دا چسکا لین آیا ایں نہ بونگیا۔ ایہہ کاہدی خبر ہے۔ چگلیا ہویا سچ ہے"

یار کجھ دس تے نا ہویا کیہ ، ایہہ اکو دم کیویں ہو گیا۔

شیدا پھیر ہسیا ۔۔اوئے بونگیا کوئی کم اک دم نہیں ہوندا۔ وڈھیاں بندیاں وچ ایہو جیہے ماملیاں تے کہانی وچو وچ چل رہی ہوندی اے۔ بس سانوں عام لوکاں نوں اودوں پتہ لگدا جدوں وڈھے بندے چاہندے نیں سانوں پتہ لگے۔ اچھا توں ایہہ دس، اجے تیکر کوئی تگڑا بندہ، میرا مطلب اے بہت تگڑا بندہ، کسے ماہتٹر (وچارے) نوں مار کے پھاہے لگا؟ ہن بھٹو دی مثال نہ دیویں کیوں جو اوہنے تے ماریا وی نہیں سی تے پھاہے چڑھ گیا۔ اوہنوں تے ضیاء نے پھاہے لاونا ہی لاونا سی۔ کوئی ہور مثال دس؟

میں کہیا میرے دماغ وچ کوئی نہیں آ رہیا، شاید توں ٹھیک ہی کہنا ایں۔

اوئے شاید نہیں ، پکی طرحاں کہنا۔ روز جاگیردار تے وڈھے لوک بندے مار دیندے نیں ، یا مدعا کسے بیگناہ تے پے جاندا تے یا پھیر دے دوا کے چھٹ جاندے نیں۔ ہن توں دس دنیا دا سب توں وڈھا جاگیردار تے چوہدری  امریکہ کسے پاکستان ورگے ٹچے جیہے ملک دے بندے نوں مار کے پھاہے لگ سکدا ہے؟ کدی ہو ہی نہیں سی سکدا۔

پر پھیر ایہہ ڈرامے بازی کاہدی سی، میں پچھیا

یار ماملہ سودے بازی دا ہونا۔ کجھ پاکستانی فوج نے امریکہ کولوں لینا دینا ہووے گا، کجھ ہور لوکاں امریکہ کولوں اپنے کم کڈھوانے ہوون گے ، بس مولویاں نوں اگے لا کے جلوس کڈھوا دتے، قومی انکھ دا مسلہ بن گیا۔ پر بونگیا ایہہ مولوی وی بڑے دوغلے تے منافق نیں۔ اک مارے جاون والے دی بیوی نے خود کشی کر لئی، سچ مینوں بڑا ہی دکھ ہویا، پر ایہہ مولویاں اوہدا جنازہ کیوں پڑھایا، اوس نوں ہیرو کیوں بنایا  جدوں شرع وچ ہر طرحاں خود کشی حرام ہے۔

خیر توں مولویاں نوں چھڈ ، ایہ دس ایہہ ڈیل ہوئی کیویں تے کروائی کہنے۔

بونگیا سچی دساں۔ جدوں اک وڈھا امریکی ساڈے جرنیل کیانی صاحب نوں ملیا سی نا تے پھیر کیانی صاحب گیلانی صاحب نوں جا کے ملے ، مینوں اوسے دن شک پے گیا سی۔

خیر تینوں تے ہر ویلے شک پئے ہی رہندے نیں پر تیری گل نال میری تسلی نہیں ہوئی۔

لے اچھا سن۔ اہناں وچوں جیہڑی دل لگے من لویں۔ ڈیل اک۔ ہنے ٹی وی تے پٹی چل رہی سی جو ایہہ ڈیل سعودی عرب نے کروائی ہے، مرن والیاں دے ٹبراں پہلاں عمرہ کیتا تے پھیر آ کے خون بہا دے پیسے لے کے ڈیوس نوں معاف کر دتا۔ ظاہر گل ہے مرن والیاں دیاں ٹبراں نوں عمرہ کسے کروایا ہنا  تے  سعودی عرب دے کسے شہزادے یا کسے  عالم  نے ایہہ ڈیل کروا دتی ہووے گی ۔

پر سعودی عرب نوں کیہہ تکلیف میں پچھیا۔

اوئے بونگیا توں بونگا ہی رہنا۔ اک تے سعودی انج ہی امریکہ دے چمچے نیں ۔ تے دوجے ہن جدوں اوہناں بحرین وچ اپنیاں فوجاں گھلیاں تے امریکہ دا منہ بند کروان لئی وی ایہہ ڈیل چھیتی توں چھیتی کروا دتی۔ ڈیل تے ہو ہی جانی سی پر توں ویکھیا، کل سعودی فوجاں بحرین وڑیاں تے اج ڈیل ہو گئی؟

اچھا ہور کیہہ ڈیل ہو سکدی ہے؟

ڈیل دو۔  ایہہ جو فوج نے کجھ ہور مال تے کجھ ہور اسلحہ امریکہ کولوں لے لیا ہونا ۔ ہن ایس ڈیل توں چار دن پہلاں فوجی جرنیل ایویں تے نہیں نا کہہ رہیا سی جو ڈرون حملیاں وچ دہشت گرد بہتے مردے نیں تے عام بندے گھٹ۔ ہن تیکر تے فوج مولویاں کولوں ایہو کہوائی جا رہی سی جو ڈرون حملیاں وچ عام بندے مردے نیں۔ ایہہ چار دن پہلاں الٹ بازی کھانا ایویں تے نہیں ہویا ہنا۔ بس فوج نے مال تے اسلحہ لے کے سعودیاں راہیں ڈیل کروا دتی۔

یار ایہہ بڑیاں گنجل دار گلاں تیرے نائی دماغ وچ وڑدیا ں کیویں نیں ؟ میں ہس کے پچھیا؟

او بونگیا، دماغ نہ نائی ہوندا تے نہ قصائی۔ بس اپنا اپنا ٹھرک ہے، میرا  ایس طرحاں دیاں باتاں بجھنا ٹھرک ہے۔  اچھا اک ہور دس۔ جے خون بہا دی رقم ۲۱ کروڑ ہی ہے جیہدا رولا پیا ہویا اے ، تے پھیر توں دس کیہڑا پاکستانی ٹبر ایڈی وڈی رقم تے لت مار دیوے گا؟ ٹبراں ایہہ ہی سوچیا ہووے گا، ساڈے مرم والے تے مر گئے، سانوں ڈیوس نوں پھاہے لوا کے کیہہ ملنا اے۔ چلو انج  گپھا رقم تے مل رہی اے نا۔ تے سنیا ارکہ دے چار ویزے وی ٹبراں نوں ملے نیں۔ایہہ او ڈیل دی کہانی نمبر تن۔

تے ساڈی اوس غیرت دا کیہہ بنیا جیس دا رولا پیا ہویا سی؟

او بونگیا پیسیاں اگے غیرت ویرت کوئی نہیں   ٹکدا۔ تے تیرا کیہہ خیال اے ایہہ غیرت دا رولا پاون والے مُلیاں تے دوجیاں مرن والیاں دے ٹبراں نوں روٹی کھوا دینی سی؟ کیہہ کسے نے اوہناں پچھیا جو تہاڈی کیہہ لوڑ ہے؟ پھوکی غیرت دا رولا پون والے پھوکے ہی ہوندے نیں ۔اچھا ہن توں دس بونگیا تینوں ڈیل دی کیہڑی کہانی ٹھیک لگدی ہے؟

میں کہیا یار مینوں تے اخیر والی وچ بہتی جان لگدی ہے۔ پر پہلیاں وی مزے دار نیں۔

جد میں  تے شیدا گلاں وچ لگے ساں تے سانوں پتہ وی نہیں لگا اک وکیل باؤ چپ کرکے ساڈے پچھے ساڈیاں گلاں سن رہیا سی ۔ جد اسیں اوس ول تکیا اوہ مسکرایا پھیرسا نوں کہن لگا۔

بئی تہاڈی بحث بڑی دلچسپ سی ۔ پر میں بطور وکیل دے دساں ایس وچ کوئی وڈھی گل نہیں۔ ایہہ مسئلہ ساڈی فقہ دا ہے جیس دے مطابق مقتول دا خاندان خون بہا لے کے قاتل نوں معاف کر سکدا ہے۔ پاکستان دے قانون وچ فقہ دا ایہہ اصول منیا جاندا ہے ۔ ایس لئی رولا کاہدا؟

شیدے نے وکیل باؤ کولوں پچھیا "جناب تسیں ایہہ دسو امریکہ جاں ہور ملکاں وچ وی انج ہی ہوندا؟"

وکیل باؤ کہن لگا باالکل نہیں۔ اوتھے مقتول دے خاندان والے چاہون وی تے معاف نہیں  کر سکدے۔ اوتھوں دے قانون وچ مقتول دے خاندان والے پارٹی  یا مدعی ہی نہیں منے جاندے۔ اوہ صرف گواہی دے سکدے نیں۔ قاتل دے خلاف مدعی ریاست یا سمجھو حکومت ہوندی ہے، اوہو قاتل نوں پھاہے لواندی ہے یا چھڈدی ہے۔ اوتھے ایہہ منیا جاندا ہے جو قاتل نے ملک دے اک شہری نوں ماریا تے ریاست اوسدی ذمے دار ہے۔ ساڈے ایتھے ایہہ منیا جاندا ہے جو قاتل نے کسے ٹبر دا بندہ ماریا ۔ ریاست ایس وچ فریق نہیں"

شیدے نے پچھیا "ذرا وکیل باؤ ایہہ وی دس دیو اہناں وچوں بہتر کیہڑا ہے؟

وکیل باؤ ہسیا تے کہن لگا  بئی ایہہ تسیں دوہیں بحث کرکے طے کر لینا۔ میں اگلی واری آواں تے مینوں وی دس دینا!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels