Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> بکل دے چور

بکل دے چور

March 15th, 2011
5 / 5 (1 Votes)

اج شیدا میرے ول آیا تے کہن لگا چل باغ ول چلنے آں۔ مینوں پتہ لگ گیا جو اج کوئی خاص ہی گل ہونی ہے کیوں جو رازداری دیاں گلاں لئی ہمیشہ توں باغ ہی لے جاندا رہیا ہے۔


جد اسیں اک بنچ تے بہہ گئے تے شیدے نے ایدھر اودھر ویکھ کے کہیا یار توں تے کل میری پارٹی دی گل کر رہیا ساں جیہڑی اپنے گورنر تے وزیر تے جنازے تے وی جان جوگی نہیں پر اج جو میں اک گل میاں برادران دی پارٹی بارے سنی ہے اوس نوں سن کے تے میرے لوں کنڈے کھڑے ہوگئے نیں۔ ایہہ پیپلیاں دے وارے وچ تے شاید پنج سو روپیہ بھتہ دے کے کاروبار چلدا رہوے  تے جے میاں برادران  آ گئے تے پتہ نہیں کیہہ ہووے گا؟ ایہہ تے بھائیا لگدا بکل دے چور نیں۔

کیوں میاں برادران استرے مہنگے کر دین گے ؟ یا استرے بنواون تے روک لا دیون گے؟ میں چھیڑیا

 

اوہ بونگیا ایہہ استرے بناون تے روک والی گل پھیر نہ کریں نہیں تے ملیاں ایہہ وی کردینا اے۔ اجے تیکر ایہہ اوہناں دی موٹی عقل وچ نہیں آئی ۔ پر گل ہور اے

 

پھیر آپ ہی گل ٹوردیاں  کہندا۔۔اج اک اوپرا جیہا باؤ وال ماون آیا سی، مینوں تے کوئی سودائی لگا پتہ نہیں پچھلے سال توں مگروں کدی حجامت وی نہیں کروائی۔ پر یار جد اوہ گلاں کرن لگا تے مینوں لگا جو بڑا گڑھیا ہویا جی اے۔ بڑی سوہنیاں گلاں دس رہیا سی۔ میں سیاست بارے پچھ لیا، تینوں تے پتہ اے نا ایہہ میرا ٹھرک اے۔

 

میں کہیا آہو، تینوں سیاست بنا روٹی نہیں پچدی۔ 

 

کہندا اوہ باؤ کہندا جو اوس بڑا چر لا کاڈھ کڈھی ہے میاں برادران دی پارٹی وچ پنج ایم پی اے اوہ نیں جیہڑے سپاہ صحابہ دے ممبر سن۔ تے ضلعے تحصیل دی پدھر تے  بہتے عہدیدار  سپاہ صحابہ دے ممبر نیں ۔ بونگیا تینوں پتہ اے نا سپاہ صحابہ کیہہ ہے تے کنی خطرناک؟

 

میں کہیا آہو پتہ ہے جہناں نے شیعاں نوں مارن توں کاروبار شروع کیتا سی تے ہن سنیا طالبان تے القاعدہ نال کے کاروائیاں کردی ہے۔

بس بس اللہ تیرا بھلا کرے۔ اانج بونگیا توں اینا وی بونگا نہیں جناں میں سمجھناں ۔

میں ہسن لگ پیا

 

کہندا ہے یار پہلاں سنی دا سی میاں برادراں دی پارٹی دے لیڈر جیویں سعد رفیقتے احسن اقبال ہین ، جماعت اسلامی توں

آئے ہوئے نیں۔ تے جے ہن سپاہ صحابہ والے وی میاں برادران دی پارٹی وچ وڑ گئے نیں  تے پھیر تے رب ہی مالک ہے۔ کیوں جو جماعت اسلامی تے سپاہ صحابہ نوں تے لوکیں بہتا منندے نہیں پر میاں برادران نوں تے منندے نیں۔ جے سپاہ صحابہ میاں برادران دے موڈھے تے رکھ کے بندوق چلاونا شروع کر دیوے تے بنے گا کیہہ؟

 

شیدیا ایہدا مطلب اے اوہ بھیڑے منہ والا رحمان ملک سچ ہی آکھدا ہے جو میٓن بردران نے جہادی پالے ہوئے نین؟

 

شیدا کہندا یار اوہدے کہن دا کیہہ ہے اوہ کہہ کے اگلے دن مکر جاندا ہے ، تے نالے جو بندہ لوکاں دی نگاہ وچ بے ایمان

تے جھوٹھا ہووے  اوسدی کوئی نہیں سنندا۔ پر بونگیا ایہہ باؤ جو مینوں کہہ کے گیا ہے مینوں اوس تے اعتبار ہے۔ میں ساری عمر بندے ہی ویکھے نیں ، تے مینوں سونہہ لگ جاندی کیہڑا سچ کیہ رہیا ہے تے کیہڑا پھاؤڑ مار رہیا۔

 

بونگیا پتہ نہیں کیہ کہواں ، میاں برادران ساڈی بکل دے چور نیں یا میاں برادران نے بکل وچ چور لکائے ہوئے نیں۔ پر ایہہ چوری ضرور رہی ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels