Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> اچے ٹبے شیراں مل لئے ہیٹھ ملے مرغائیاں

اچے ٹبے شیراں مل لئے ہیٹھ ملے مرغائیاں

March 14th, 2011

 

میں کہیا، "مریں تینوں کیہہ ہویا ، کوئی ہلکایا کتا پچھے پیا ہویا ای؟"

کہن لگا، یار، ہلکایا کتا وڈھ لوے تے ڈھڈھ وچ ٹیکے لا کے کم سر جاندا پر ایہہ جو  رقعہ آیا ہے نا ایہہ ہلکایے کتے دا وی پیو ہے جیہدا اجے ٹیکہ وی کوئی نہیں بنیا۔

میں کہیا ہویا کیہہ؟

یار کسے مولوی ولوں رقعہ آیا ہے جو مہینے دے پنج سو روپئے تحریک نوں دیا کر نہیں تے تیرا کم صاف۔ لکھیا اے  توں انج وی داڑھیاں من کے غیر شرعی کم کرنا ایں تے ایہہ گھٹ توں گھٹ تیری سزا ہے۔ ساڈا بندہ تیری گلی وچ پہلاں وی اگراہی کرن آوندا اوہو تیرے کولوں لے لیا کرے گا۔

میرے وی طوطے اڈ گئے، گل بڑی خطرے والی سی۔ میں کہیا پھیر شیدیا کیہہ کرئیے؟ پیسے تے دینے پین گے۔

شیدا کہندا یا تے میں پنڈ نس جاواں تے یا پنج سو تحریک نوں بھتہ دیواں ۔۔۔ سوچنے آ۔ پر بونگیا ایس رقعے نے تیری گل دا جواب دے دتا ای۔ توں اگلے دیہاڑ پچھ رہیا سیں ناں جو ایہہ ملاں ملانے ایڈیاں وڈیاں وڈیاں کاراں وچ کیویں نسے پھردے نیں؟ پتہ لگ گیا ای۔ ہن مینوں ایہہ وی پتہ لگ گیا جو سامنے شیخ ہوراں دے گھر ہر  مہینے اک داڑھا آوندا اے  وڈی ساری کار تے۔ دساں منٹاں وچ پھٹ جاندا اے۔ ظاہر گل ہے اوہ کوئی قرآن پڑھاون یا ختم دین تے نہیں آوندا نا۔ اوہو داڑھا میرے کول وی آوے گا!

میں کہیا شیدیا ایہہ تیری پارٹی دی حکومت آ ایہہ کجھ نہیں کر سکدی ؟

شیدا کہندا، بونگیا توں رہیں گا بونگے دا بونگا۔ اوہ اپنے گورنر تے وزیر دا جنازہ نہیں پڑھا سکدی اوہناں دے ختم قلاں تے نہیں آ سکدی تے میرے لئی کیہہ کر سکدی اے؟

پھیر دس ایہہ کر کیہہ سکدی ہے؟

ایہہ اپنی کرسی بچاون لئی سندھ وچ ججاں دے خلاف ہڑتال کروا سکدی ہے، پر صرف اپنی کرسی لئی۔ بندہ پچھے تہاڈے دو وڈھے بندے مارے گئے تسیں کوئی احتجاج نہ کیتا کتے اپناآپ نہ وکھایا تے ہن جج دے اک فیصلے دے خلاف ہڑتال تے مارا ماری کرن لئی بندے وی آ گئے تے کلاشنکوفاں والے وی؟ ایہہ کلاشنکوفاں والے مُلیاں دا کیوں نہیں کجھ کردے؟ مینوں تے لگدا وچوں سب رلے ہوئے نیں ! تے ساڈا حال مئیں محمد دے شعر والا ہے!

اچے ٹبے شیراں مل لئے ہیٹھ ملے مرغائیاں

چارے گٹھاں موت نے ملیاں فضل کریں رب سائیاں


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels