Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> پاکستان وچ کھاڻ پیڻ دیاں وستاں دنیا جہان نالوں سستیاں نیں

پاکستان وچ کھاڻ پیڻ دیاں وستاں دنیا جہان نالوں سستیاں نیں

وچار ڈیسک
February 7th, 2011

رب جاڻے پاکستان دے لوکاں دی مت ماری گئی ہے۔ جدھر ویکھو ایہو روڻا پیا رہندا ہے پئی ملک وچ مہنگائی بہت ہو گئی ہے۔ ٹیلی وژن دے ٹاک شوز اتے اخباراں دن رات ایہو رولا پاؤندیاں نیں پئی حکومت مہنگائی دا جن ٹھلہڻ وچ ناکام ہو گئی ہے۔ خورے کیہڑے یبھل نیں جیہڑے روز دیہاڑے مہنگائی دے سر چڑھ کے خود کشیاں کر لیندے نیں۔ ذرا ہیٹھاں دتے ہوئے کھاڻ پیڻ دیاں شیواں دے مُل ویکھو تے دسو پئی ایس توں سستی جہان دی کیہڑی تھاں ہوڻی ہے:

چاہ دا کپ: 1 روپیہ
یخڻی دا پیالہ: 5.50 روپیئے
دال: 1.50 روپیئے
روٹی: 1 روپیہ
مرغی دا سالڻ: 24.50 روپیئے
دوسہ: 4 روپیئے
سبزی والی بریانی: 8 روپیئے
مچھی: 13 روپیئے

لو ہڻ ایہہ مُل ویکھو تے دسو پئی اینے گھٹ پیسیاں وچ ایہہ شیواں دنیا وچ کتھے لبھدیاں نیں؟
کیہ آکھیا؟ پاکستان وچ نہیں لبھدیاں؟
سرکار کدے پاکستان دے کسے غریب علاقے وچ گئے ہوو تے پتہ لگے ناں!
کیہڑا غریب علاقہ؟ چلو اسیں دس دینے آں۔ لو سڻو!
اینیاں سستیاں شیواں تہانوں پاکستان دی قومی اسمبلی دی کینٹین وچوں ملدیاں نیں۔ ایہناں شیواں دا اینا مُل اوہناں وچارے غریباں دے غریب نمائندیاں لئی رکھیا گیا ہے تاں جے اوہ وی دوجے عام پاکستانیاں وانگوں ڈھڈ بھر کے کھا سکڻ۔ اک ممبر دی مہینے دی اک لکھ اسی ہزار تنخواہ کوئی بہتی تے نہیں اے ناں، تے فیر نال ہور بونس بھتے تے خورے کیہڑے کیہڑے الاؤنس۔ ایس لئی لوکائی دے خون پسینے دے کمائی تے بھرے ہوئے ٹیکس نال ایہناں غریباں نوں وی سستا کھاڻ نوں لبھ جاوے تے کیہ برا ہے؟
ہیں جی!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels