Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> نواں چینی سال، بے وفائیاں دی پیش گوئی

نواں چینی سال، بے وفائیاں دی پیش گوئی

وچار ڈیسک
February 3rd, 2011

چینی کیلنڈر موجب ملک وچ نواں سال کل توں شروع ہو رہیا ہے۔ نجومیاں نے پیش گوئیاں کیتیاں نیں جو ایس سال محبت وچ بے وفائیاں دیاں واپریاں بہتیاں ویکھڻ وچ آسکدیاں نیں۔

چینی عقیدے موجب خرگوش نال جڑے ایس سال نوں خوش نصیبی دا سال منیا جا رہیا ہے۔ ایس موقعے تے وڈی گڻتی وچ چینی عوام نجومیاں نال رابطہ کردے نیں تاں جو نویں سال وچ لکے آپڻے بھلک بارے کجھ جاڻ سکڻ۔ چینی وسیب وچ وڈی گڻتی انج دے لوکاں دی ہے جیہڑے ایہناں پیش گوئیاں نوں بہت سنجیدگی نال لیندے نیں تے سگوں آپڻی حیاتی وی اوہناں موجب ترتیب دیندے نیں۔ انج دے لوکاں لئی چینی نجومیاں نے ایس سال لئی کئی سوادی پیش گوئیاں کیتیاں نیں۔

خبراں دی ایجنسی نال گل کردیاں ہوئیاں ہانگ نال سانگا رکھڻ والے انتھونی چھینگ ناں دے اک نجومی نے پیش گوئی کیتی ہے پئی ایس سال کئی وڈے رومانوی سانگے ویکھڻ وچ آؤڻ گے ویاہے جوڑیاں نوں خبردار کردے ہوئے اوہ دسدے نیں جو ایس سال کئی بندے ویاہ دے مگروں وی نویں رومانوی سانگے چھوہڻ گے جدوں کہ انج دے وی کئی نویں جوڑے بڻن گے جیہناں دیاں عمراں وچ بہت فرق ہووے گا۔ نواں سال ایہناں لوکاں لئی خوش نصیب ثابت ہووے گا جیہڑے ایس سال ویاہ کرنا چاہندے نیں اوہناں دی ہور پیش گوئی ہے پئی جیہڑے بندے ہڻ تیکر کسے ساتھی نوں لبھ رہے سڻ اوہ ایس سال کامیاب ہوڻ گے جدوں کہ ویاہے ورے کئی جوڑے بال جمڻ گے۔

ایس سال صرف دل دے معاملیاں دے حوالے نال ہی نہیں سگوں آس موجب ربی ماراں تے عجیب قسم دے موسم دیاں وی پیش گوئیاں کیتیاں گئیاں نیں۔

الیون یو ناں دے اک ہور نجومی موجب ایس سال امریکا، کینیڈا تے تائیوان ربی ماراں دا شکار ہو سکدے نیں۔ موسماں وچ وی شدت ویکھڻ وچ آوے گی یعنی موسم یاں تے بہت ہی ٹھنڈا رہوے گا یاں بہت گرم۔

اک ہور مشہور چینی نجومی تے ٹی وی دے مشہور پروہڻچار پیٹر سو موجب اُتری تے دکھڻی کوریا وچکار سانگے وگڑے رہڻ گے پر ایہناں دوہاں ملکاں نوں پُھٹڻ والی کسے وبا دے بارے بہتی فکر کرنی چاہیدی ہے۔

انتھونی چھینگ دیاں کجھ ہور پیش گوئیاں موجب ایس سال پاکستان، ہندوستان، کوریا تے افریقہ وچ ٹریناں دیاں واپریاں، اگ لگڻا، عمارتاں یاں پلاں دے ڈھیڻ جدوں کہ روس تے چین وچ پنج یاں ریکٹر اسکیل تے ایہدے توں وی وڈا بھچال آؤڻ دا ڈر ہے۔

دوجے پاسے Four Pillars of Destiny ناں دے قسمت دا حال دسڻ والے چینی سسٹم ولوں عالمی آگواں دے حوالے نال کیتی جاڻ والی پیش گوئیاں موجب چینی صدر ہوجن تاؤ لئی ایہہ سال خوش قسمت جدوں کہ امریکی صدر باراک اوباما لئی اوسط درجے دا رہوے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels