Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> منجی کتھے ڈاہواں

منجی کتھے ڈاہواں

وچار ڈیسک
February 3rd, 2011

دکھڻی ایشیاء دا وسنیک بھاویں دنیا دے کسے وی نکرے رہ رہیا ہووے منجی توں ضرور جاڻوں ہوندا ہے کیوں جو منجی نال اوہناں دی ثقافت جڑی ہوئی ہے۔ پر کجھ ورہیاں توں زندگی دے نویں طریقیاں نے جتھے کئی ثقافتی ورثیاں نوں مٹا دتا ہے اوتھے منجی نوں وی بہت خطرے ہو گئے نیں۔ کراچی ورگے بہتی وسوں والے شہراں وچ جتھے ڈبے ورگے فلیٹاں وچ رہڻ والے لوکاں دی وڈی گڻتی نوں آپڻے لئی تھاں اوکھیاں ای نصیب ہوندی ہے، وچاری منجی دی تھاں کتھوں آوے؟ انج وڈے شہراں وچ ایہدا ورتاء بہت گھٹ ہو گیا ہے پر پنڈاں دی حیاتی وچ ہڻ وی منجی بڑی اُچیچی ہوندی ہے۔

وڈے شہراں وچ لکڑ دی بڻی، واڻ یاں نواڑ نال اُڻی منجی ہوٹلاں تیکر ای رہ گئی ہے ایسے لئی ایہناں نوں 'منجی ہوٹل' کہیا جاندا ہے۔ عام طور تے منجی دے بارے ایہہ خیال کیتا جاندا ہے جو اوہ نکے نکے کیڑے کیڑیاں یعنی '' کھٹملاں '' دا اڈا ہوندی ہے۔ ہڻ جے منہ زور کھٹمل وچاری منجی وچ دھگانے وڑ کے حیاتی لنگھاؤندا ہے تے ایہدے وچ منجی دا کیہ قصور !!!

کھٹملاں نوں پناہ دیڻ دے جرم وچ منجی نوں عبرت دا نشان بناؤڻ لئی کئی حربے ورتے جاندے نیں۔ مثال دے طور تے منجی نوں تپدی ہوئی دھپ وچ کجھ گھنٹیاں لئی چھڈ دتا جاندا ہے جتھے شریف قسم دے کھٹمل تے نس جاندے نیں پر قبضہ مافیا ورگے کھٹمل نسڻ دی تھاں مقابلہ کرن نوں ترجیح دیندے نیں۔ ایہناں شر پسند کھٹملاں نال نبڑڻ لئی ایہناں بالاں دی مدد لئی جاندی ہے جیہناں کولوں شیطان وی پناہ منگدا ہے۔ جیہڑے ہتھاں وچ ڈنڈے پھڑ کے اُگھڑ دے نیں تے کھٹملاں دے نال منجی دا بھیڑا حال کر دیندے نیں۔ اخیر پتہ لگدا ہے جو نہ رہے وانس نہ وجے بانسری۔

منجی بارے کئی خیال عام نیں۔ کجھ لوکاں دا خیال ہے جے منجی تے جتی سڻے بیٹھا جاوے تے ایہدے نال سپ نوں منجی تے چڑھن دی اجازت مل جاندی ہے جیہڑا ستے ہوئے بندے نوں نقصان اپڑا سکدا ہے۔ایہہ وی کہیا جاندا ہے پئی جے منجی تے لتاں لمکا کے بیٹھا جاوے تے لتاں ہلائیاں جاڻ تے نظر کمزور ہو جاندی ہے۔ ایہہ وی مشہور ہے پئی جے منجی تے دوویں ہتھ سر دے پچھے رکھ کے ستا جاوے تے ماں پیو چھیتی مر جاندے نیں۔

پنڈاں دی پرہیا پنچایت وچ وی منجی دا بڑا عمل دخل ہے۔ جرگے دے سارے رلتی منجیاں تے بیٹھ دے نیں۔ کدی کدائیں جے کسے گل تے بہتا پاڑ ہو جاوے تے مخالف پارٹی دی دھوائی وی منجی اُتے ہی کر دتی جاندی ہے تے گل اگے ودھ جاوے تے منجی نوں ہی توڑ کے ایہدے وچوں باہیاں سیرو کڈھ لئے جاندے نیں۔۔۔۔تے جے گل بات ہو ودھ جاوے تے فیر ڈنڈے کڈھن دی کھیچل نہیں کیتی جاندی تے سدھا ساہواں منجی نال ہی دھاڑا مار دتا جاندا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels