Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> رن کھسم اک دوجے دی گل گھٹ سمجھدے نیں: نویں کھوج

رن کھسم اک دوجے دی گل گھٹ سمجھدے نیں: نویں کھوج

وچار ڈیسک
January 25th, 2011

رن کھسم دے ساک نوں سارے جگ وچ سب توں نیڑلا ساک سمجھیا جاندا ہے تے ایہہ کہیا جاندا ہے پئی اوہ اک دوجے دی گل کسے ہور نالوں کِتے ودھ چنگے انداز وچ سمجھ لیندے نیں۔

پر اک نویں سائنسی کھوج ایہہ کہندی ہے پئی دو اجنبی بندے اک دوجے دی گل سمجھ سکدے نیں پر تیویں مرد یاں زندگی دے ساتھی دے طور تے اک دوجے نال رہن والے جوڑے نہیں۔کئی جوڑیاں دی ایہو شکایت ہوندی ہے پئی بیگم اوہناں دی گل تے دھیان نہیں دیندی یاں تیویں کہندی ہے پئی اوہدا کھسم اوہدی گل نہیں سن دا۔ ایہناں دوہواں فاصلیاں وچکار جیہڑی شے ہوندی ہے اوہدے بارے نفسیاتی ماہراں دا کہنا ہے پئی اوہ ہے اک دوجے دے بارے نہ جاننا۔

ہر مرد تے ہر تیویں ایہہ دعویٰ کردی ہے پئی اوہ اپنے حیاتی دے ساتھی بارے سب توں بہتا جاندی ہے۔ جدوں کہ ماہراں دا کہنا ہے پئی کئی حالاں وچ ایس دعوے دی حقیقت اک بھلیکھے توں بہتی نہیں ہوندی تے کئی واری تے اجنبی اوہناں نوں اک دوجے نالوں بہتا چنگا جاندے نیں۔

دوجے لفظاں وچ تسیں کِتے کوئی انج دا جوڑا ویکھو جیہڑا اک دوجے دی گل نہ سمجھ رہیا ہووے تے یقین کر لوو پئی اوہ کوئی ہور نہیں سگوں تیویں مرد نیں۔

اک انگریزی اکھان ہے پئی ویاہ آپو دے بھلیکھیاں دا ناں ہے۔

نفسیاتی ماہراں دا کہنا ہے جو ایس اکھان نوں اک لطیفہ سمجھ کے کن پچھے نہیں سٹنا چاہی دا کیوں جو کئی تیویں مرد ایہہ سمجھدے نیں جو اوہناں دے ساتھی اوہناں بارے بہت کجھ جان دے نیں۔ ایس لئی اوہناں نوں کجھ دسدیاں ہوئیاں بہتی تفصیل وچ جان دی لوڑ نہیں ہوندی۔ ماہراں دا کہنا ہے پئی خرابی دا اصل مڈھ ایہو ہے پئی اسیں اجنبی بندیاں نوں تے سارا کجھ کھول کے دسنے تے سمجھاؤنے آں، پر اپنے ساتھی بارے ایہہ اپنے طور تے ہی طے کر لینے نیں جو بہتی تفصیل وچ جان دی لوڑ نہیں کیوں جو اوہ تے مینوں جاندا ہے۔

امریکی یونیورسٹی شکاگو دے ماہراں دی اک ٹیم نوں کہنا ہے پئی میاں بیوی دا اک دوجے بارے ایہہ فرض کر لینا پئی اوہ اک دوجے نوں بہت چنگی طرحاں جاندے نیں، بھلیکھیاں نوں جنم دیندا ہے جیہدا سٹہ کئی واری فاصلے تے جھیڑیاں دی شکل وچ نکلدا ہے۔

ماہراں نوں پتہ لگیا جو تجربے وچ رلتی بندیاں نے اپنے ساتھی بارے خوش فہمی والے گویڑ لائے۔ تے اوہناں دے ساتھی، اوہ سنیہا نہ سمجھ سکے تے جیہڑے اوہ ایہناں گلاں راہیں دینا چاہ رہے سن۔

ریسرچ ٹیم دے اک ہور رکن پروفیسر کینتھ سوٹسکی دا کہنا ہے جو کھوج وچ رلتی کجھ جوڑے اک دوجے دیاں گلاں دا مطلب سمجھن وچ کامیاب رہے پر ایس حد تیکر نہیں جنا کہ اوہناں دے دوجے ساتھی دا خیال سی۔

پروفیسر سوٹسکی دا کہنا ہے جو ایس کھوج نال ایہہ ساہمنے آیا ہے پئی چاہے تسیں اک دوجے دے کنے ہی نیڑے کیوں نہ ہوو، ایہہ گل ذہن وچ رکھو پئی ہر گل اوہنوں کھول کے دسن دی لوڑ رہندی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels