Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھٹیاں مٹھیاں >> ویاہ دے اکٹھ: کئی ریتاں تے اوہناں دا پچھوکڑ

ویاہ دے اکٹھ: کئی ریتاں تے اوہناں دا پچھوکڑ

وچار ڈیسک
January 24th, 2011

چاول تے پھل سٹنا، اکٹھے کیک کٹنا تے ووہٹی نوں چک کے بروہاں لنگھاؤنا، کئی جوڑے اپنے ویاہ دے ویلے اوہناں پرانیاں ریتاں تے عمل کردے نیں تے اوہناں نوں بہت اُچیچا وی سمجھدے نیں۔

پر سوال ایہہ ہے جو ایہہ ریتاں شروع کیویں ہوئیاں؟ ویاہ بارے کئی ریتاں دا مڈھ صدیاں پہلوں رکھیا گیا۔ مثال دے طور تے کسے ویاہ دے اکٹھ وچ رلت جیہڑی کڑی ووہٹی دے سٹے ہوئے گلدستے نوں ہوا ہی وچ پھڑ لیندی ہے، اوہدے بارے کہیا جاندا ہے جو اگلا ویاہ اوہدا ہی ہووے گا۔

جرمن دارالحکومت برلن وچ ویاہ دے اکٹھ دی پیشے وار منصوبہ بندی کرن والی اک زنانی الیکساندر ڈئیونیسیو کہندیاں نیں جو اج ایس گل دا کیہنوں پتہ ہووے گا پئی کلیسا وچ ویاہ دے ویلے پادری دے ساہمنے کھلوتے ہوئے ووہٹی ہمیش لاڑے دے نال پر اک اُچیچی تھاں تے ہی کیوں کھلوتی ہوندی ہے ؟

الیکساندرا ڈئیونیسیو کہندیاں نیں جو ایہدا کارن ایہہ ہے پئی پچھوکڑ وچ جدوں مرد اپنے کول ہمیش اک تلوار وی رکھدے سن تے ووہٹی ویاہ دے ویلے اک اُچیچی تھاں تے ایس لئی کھلوتی ہوندی سی پئی علامتی طور تے ایہہ وی ظاہر ہووے پئی لاڑا اپنی تلوار نال اپنی ووہٹی دا ہر ویلے دفاع کر سکدا ہے۔

الیکساندرا کہندیاں نیں پئی اج دے لاڑے جنگ باز تے نہیں ہوندے تے اوہ اپنے نال تلواراں وی نہیں لیاں ہوندیاں پر فیر وی کلیسائی ویاہ دے ویلے ووہٹی دے لاڑے دے بروبر کھلون دی تھاں وچ صدیاں توں کوئی بدلی نہیں آئی۔

برلن دی میرج پلانر الیکساندرا ڈئیونیسیو کہندیاں نیں پئی کئی ملکاں وچ ایہہ وی اک بڑی پرانی عوامی اکھان ہے پئی لاڑا اک ویاہ توں پہلوں ووہٹی نوں ویاہ دے لباس وچ ویکھ لوے تے ویاہ دے اکٹھ توں پہلوں ہی اوہنوں کسے نہ کسے بدنصیبی یاں بھیڑی واپری دا ساہمنا کرنا پے سکدا ہے۔

اک ہور سوادی گل ایہہ ہے جو کلیساواں وچ ویاہ دے ویلے ووہٹی نوں اوتھے لیاؤن والا کئی واری اوہدا پیو ہوندا ہے۔ اوہنوں انج کہیا جاندا ہے جو صدیاں پہلوں کڑی نوں خاندان دی مالکی سمجھیا جاندا سی تے ایس لئی ویاہ دے ویلے ایہہ مالکی کڑی دے خاندان نال لاڑے نوں مل جاندی سی۔ اج پر ایہہ ریت ایس گل دی نشانی ہے پئی ووہٹی دے اپنے گھر والیاں دے نال جذباتی تے خاندانی ساک کنے مضبوط نیں۔

ویاہ دے اکٹھ وچ جدوں ووہٹی یاں پروہنیاں ولوں ہوا وچ چاول سٹے جاندے نیں یاں پھل پتیاں سٹیاں جاندیاں نیں، تے ایس ریت دا مطلب ایہہ دعا تے سدھر ہوندی ہے پئی ایس نویں ویاہے جوڑے نوں بہتی اولاد نصیب ہووے تے اوہ اک خاندان دے طور تے مسلسل ودھدا پھلدا رہوے۔

ویاہ دے موضوع تے اک کتاب دی لکھاری برگٹ ایڈم کہندیاں نیں جو ویاہ دے موقعے تے پھلاں نوں خوش نصیبی تے بھلک وچ اولاد دے جمن دی دعا دی نوکری سمجھیا جاندا ہے۔ ایہدے توں اڈ ویاہ دے ویلے جدوں تیویں تے خاوند رل کے کیک کٹ دے نیں تے ایس حوالے نال بین الاقوامی پدھر تے پایا جان والا اک عام خیال ایہہ وی ہے پئی رل کے چھری پھڑدیاں ہوئیاں لاڑے تے ووہٹی وچوں جیہدا ہتھ اُتے ہووے گا، اوہی بھلک دے سانجھے ساک وچ بہتا فیصلہ کن تے قائدانہ کردار والا ہووے گا۔

کجھ لہندے دے ملکاں وچ ایہہ سوادی ریت وی ہے پئی ووہٹی اپنی سجی جٹ وچ اک پینس یاں سینٹ دا سکہ ایس لئی رکھ لیندی ہے پئی ویاہ دے مگروں ساری عمر ایس جوڑے نوں خوشی تے خوشحالی ملے۔ ویاہ دے موضوع تے کتاب دی لکھاری برگٹ ایڈم کہندیاں نیں جو کئی ویاہواں دے موقعیاں تے رسماں ریتاں دی بہت اُچیچتا دتی جاندی ہے پر اوہناں نوں لوڑ توں ودھ اہمیت نہیں دتی جانی چاہی دی۔ برگٹ ایڈم موجب '' ویاہ بہرحال ویاہ ہوندا ہے تے کوئی انج دی دوپہر یاں شام نہیں جتھے سارے لوک رل کے درجناں کھیڈ کھیڈ دے رہن ''۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels