Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> سرکاری حکمنامہ:سعودی زنانیاں مرداں ’’شوہدیاں‘‘ توں آزاد۔سعودی زنانیاں خش

سرکاری حکمنامہ:سعودی زنانیاں مرداں ’’شوہدیاں‘‘ توں آزاد۔سعودی زنانیاں خش

وچار ڈیسک
May 7th, 2017

پچھلے سعودی پادشاہ شاہ عبداللہ سعودی سوسائٹی نوں کھولن داجیہڑا کم 2011وچ شروع کیتا سی اوہ ہولے ہولے اگے ودھ رہیا ہے۔2012 نوں زنانیاں نوں سرکاری شوری کونسل دا ممبر بنایا گیا سی اتے اوسے سال سعودی زنانیاں نوں تریخ وچ پہلی وار اولمپکس وچ جان دی اجازتاں دتیاں گیاں سن۔ہن سعودی عرب دی زنانیاں نوں کسی کم لئی باہر جان توں پہلاں گھر دے وڈکے مرد توں اجازت لینا ضروری نہیں ہوئے گا۔ہو سکدا ہے کہ سعودی عرب تے ایران ورگے ملکاں وچ تبدیلیاں پاروں انہاں ملکاں دے پاکستانی ’’راکھیاں تے ہرکاریاں‘‘ دی سوچ وچ وی کوئی تبدیلی آئے۔چیتے رہے کہ تریخ وچ پہلی وار سعودی حکومت نے عورتاں نوں کسی مرد دی اضامندیاں بغیر جان دی اجازتان دتیاں نیں ، پر ایس دا اک تسلسل وی ہے۔مشہور زمانہ 9/11 رپورٹ وچ سعودی عرب تے سب توں زیادہ تنقیداں ایسے حوالے نال سی اتے سعودی مخالف لابی اتے اسرائیل انہاں گلاں نوں نشانہ بنادا سی۔پچھلے دناں جداں سعودی عرب نوں زنانیاں دے عالمی ادارے،سٹیٹس آف ویمن دا اقوام متحدہ وچ پردھان کونس دا ممبر بنایا گیا تاں وی اجہی گلاں ہوئیاں۔ اینج جاپدا ہے سعودی ریاست نوں ایس سب دا اندازہ ہے۔سعودی عورتاں نوں گھر توں باہر کسی کم وغیرہ لئی جان توں پہلاں محرم یا گھر دے پردھان مرد توں اجازت لینا لازم ہوندا سی۔ حالیہ حکومت نے ہن ایہہ شرط مکادتی جے۔ ’اے ایف پی‘ رائیٹرزتے عرب نیوز دسیا کہ سعودی عرب دے پادشاہ شاہ سلمان بن عبدالعزیز نے 5 مئی نوں اک حکم نامہ جاری کیتا، جس وچ عورتاں نوں کسی محرم یا گھر دے سربراہ مرد دی اجازت توں آزاد قرار دتا گیا ہے۔ شاہ سلمان بن عبدالعزیز ولوں جاری کیتے گئے حکم نامے وچ آکھیا گیا کہ ہن عورتاں نوں پیشہ وارانہ ذمہ واریاں نبھان دی غرض توں باہر جان لئی مرد توں اجازت لین دی لوڑ نہیں۔ حکمنامے وچ آکھیا گیا ہے کہ اسلام زنانیاں دے خلاف نہیں ہے۔ ایہہ خیال رکھیا جائے کہ عورتاں دے باہر جان لئی شرعی جواز موجود ہون۔ خبری ادارے دے مطابق مقامی میڈیا وچ شائع ہون والی خبراں وچ دسیا گیا کہ ایہہ حکمنامہ جاری کرن لئی حکومتی ایجنسیز نے مشورہ دتا سی۔ہورے امریکی صدر ٹرمپ تے دنیا نوں سعودی عرب دا ’’سافٹ بوتھا‘‘وکھان دی سمجھ دا اجہے حکمنامیاں وچ ویژن وادھو ہے۔ سعودی حکومت نے ایس حکمنامے دے ذریعے عورتاں نوں کجھ رلیف فراہم کیتا ہے پر سماجی کارکناں دا آکھناہے کہ ایہہ کافی نہیں ہے۔ سعودی عرب دا شمار دنیا دے انہاں ملکاں وچ ہوندا ہے جہناں نے عورتاں دے حوالے نال قدرے بہوں اوکھے قنون اپنائے ہوئے نیں۔پچھلے سال تیک سعدوی عرب دا ورلڈ جینڈر انڈکس وچ بہوں تھلڑواں نمبر سی۔پاکستان، ترکی، ملائیشیا ایس حوالے نال مسلم ملکاں وچ زیادی چنگی پوزیشن رکھدے نیں ۔ سعودی زنانیاں نوں تعلیم حاصل کرن کسی دوجے ملک یا شہر سفر کرن سمیت دوجے کماں لئی گھر دے وڈکے مرد توں اجازت لینا ہوندی سی۔ سعودی عرب دے شہر جدہ دی وسنیک تے سماجی کارکن سحر حسن نجیف نے حکومت دے تازے فیصلے تے جی آیاں نوں آکھیا ہے پر ایہہ وی سوال کیتا ہے کہ حکمنامے توں ایہہ پتہ نہیں چلداکہ ایس تے عمل کدوں ہوئے گا؟۔ سحر حسن نجیف نے خبری ادارے نوں دسیا کہ عورتاں مرداں دی اجازت لین دے عمل دا مکمل خاتمہ چاہندی نیں۔ قطیف دی وسنیک زنانی نسیمہ السادہ نے خبری ادارے نوں آکھیا کہ انہاں نوں نہیں لگدا کہ حکومت مرداں توں اجازت لین دی شرط نوں پوری طور تے مکائے گی البتہ حکومت انہاں قنوناں وچ نرمی کرسکدی ہے۔ چیتے رہے کہ پچھلے سال سعودی عرب دے ہزاراں افراد نے اک پٹیشن تے دستخط کیتے سن جس وچ مرد اں دی سرپرستیاں مکاون دا مطالبہ کیتا گیا سی۔ ایس پٹیشن دے بعد رواں سال جنوری وچ اقوام متحدہ (یو این) دے خصوصی مندوب فلپ ایلسٹن نے سعودی عرب دے دورے دے دوران آکھیا کہ سرپرستی دے نظام وچ بہتریاں لیان دا وقت آچکیا ہے۔ حکومت ولوں جاری کیتے گئے حکمنامے دے بعد عرب وچ سماجی کارکنان ولوں ملے جلے ردعمل دا اظہار ویکھن وچ آیا۔ ایس توں اڈ ہیومن رائیٹس واچ نے اپنی رپورٹ وچ آکھیا کہ سعودی حکومت نے ہن عورتاں دے کم کرن لئی مرد سرپرست توں اجازت دی شرط ختم کردتی پر بہت سارے ادارے عورتاں نوں نوکری دین لئی مرد سرپرست دی جازت دا مطالبہ کررہے نیں۔ رپورٹ وچ آکھیا گیا کہ کجھ ہسپتال وی عورتاں نوں نوکری دین لئی مرد سرپرست دی اجازت دا مطالبہ کررہے نیں۔ سماجی کارکنان دے مطابق جہناں عورتاں دے گھراں وچ کھلے ذہن دے مرد حضرات موجود نیں انہاں عورتاں نوں کوئی مسئلہ نہیں ہوئے گا۔جنہاں سوسائٹیاں وچ جمہوریتاں نہیں ہوندیاں اتھے تبدیلیاں آون دے رستے باہرلے پریشر نال کھلدے نیں پر سعودی عرب وچ کرائے سروے دسدے نیں کہ اج دے نوجوان سعودی پرانے بندوبست توں آپ وی تنگ نیں تے سعودی پادشاہت وی ہٹ دھرمیاں توں پچھے ہٹ دی نظر آرہی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels