Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> طیبہ دا فیصلہ کد ہو سی؟ سپریم کورٹ نے اسلام آباد ہائی کورٹ نوں حکم دے دتا۔

طیبہ دا فیصلہ کد ہو سی؟ سپریم کورٹ نے اسلام آباد ہائی کورٹ نوں حکم دے دتا۔

وچار ڈیسک
March 8th, 2017

چیف جسٹس ثاقب نثار دی پردھانی وچ کم کرن والے ترے رکنی بینچ اسلام آباد ہائی کورٹ نوں حکم دے دتا ہے پئی اوہ ایس مقدمے نوں مڑ ویکھے اتے ایس وچ انسانی حقاں، غلامی اتے انسانی سمگلنگ پاروں گل چھوئے تے ایہہ فیصلہ کرے پئی کہیڑی عدالت ایس نوں سنے گی۔ اسلام آباد ہائی کورٹ ایہہ آکھیا سی پئی کیونجے اسلام آباد ہائی کورٹ ٹرائل کورٹ نہیں تاں مارے ایس مقدمے نوں کسی ٹرائل کورٹ وچ ٹوریا جائے۔ ایس کیس وچ ملزم اک جج تے اوس دا خاندان ہے تاں مارے ایس دی اہمیتاں بہوں زیادہ نیں۔ ہن سپریم کورٹ تے اسلام آباد ہائی کورٹ نوں آکھیا ہے پئی اوہ ایس نوں دھیان نال ویکھے اتے انصاف دے تقاضے پورے کرے۔ سپریم کورٹ ایس مقدمے نوں ادھ و چکار نہیں چھڈے گی اتے توڑ پہنچائے گی۔ اسلام آباد ہائی کورٹ دے فیصلے نوں مقدمے دی وکیل عاصمہ جہانگیر نے سپریم کورٹ نوں مداخلتاں بارے اپیل کیتی سی۔ سپریم کورٹ مقدمے دی نزاکتاں نوں سمجھدے ہوئے آکھیا ہے پئی جے کڑی دا پیو اگے نہ آیا تاں سپریم کورٹ آپ ایس کیس نوں اگے لیجائے گی۔ عدالت ایہہ وی آکھیا پئی بچی نوں ’’ایس او ایس‘‘ وچ رکھیا جائے جداں تیک اسلام آباد ہائی کورٹ فیصلہ نہیں دیندی۔ میڈیا وچ طیبہ تشدد کیس نوں بہوں تھاں دتی گئی سی پر ساڈا میڈیا دو دن کھپ پاکے اگے ودھن وچ مہارتاں رکھدا ہے۔ سول سوسائٹی تے میڈیا کیہ اوس ویلے مڑ متحرک ہون گے جداں کیس کھوہ کھاتے پئے جائے گا۔ ہن سپریم کورٹ دے حکم بعدوں ایس کیس نوں اگے ودھان وچ مدد ملے گی۔ 28دسمبر توں ایہہ کیس سامنے آیا سی اتے 29نوں ایف آئی آر درج ہوگئی سی۔ مارچ دی 8تریخ تیک ایہہ فیصلہ ہی نہیں ہویا پئی ایس مقدمے نوں کس نے سننا ہے۔
عدالت نوں تے انہاں لوکاں نوں وی سدنا چاہیدا سی جنہاں ٹی وی چینلاں تے آکے طیبہ دے ماں پیو ہون دے جھوٹے دعوٰے کیتے سن۔ انہاں نوں کس ایس کم لئی پیسے دتے سن؟ ایس توں عدالت نوں پتہ چل جائے گا پئی کیہڑے طاقتور ایس دے مگر نیں۔ انہاں سب دی فوٹیج تے چینلاں کول ہے۔ چیف جسٹس ہوری آپ آکھ چکے نیں پئی ایس وچ کوئی شک نہیں کہ ایس کیس وچ جرم ہویا ہے۔ پرجے 70دناں وچ ایہہ فیصلہ نہیں ہوسکیا تے فیر اسلام آباد ہائی کورٹ دا ایس وچ کڈا قصور ہے؟ ہورتے ہور، داخلہ وزارت وچ اک درخاست وی کھل دتی گئی ہے جس وچ ایہہ آکھیا گیا ہے پئی طیبہ تے تشدد ہویا ہی نہیں۔ ایہہ مقدمہ طاقتوراں تے ماڑیاں درمیان ہے اتے طاقتور ایس نوں لمبا کھچنا چاہندے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels