Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> عورتاں دا عالمی دیہاڑ:مسئلہ مائنڈسیٹ دا ہے ، اوس نوں کون توڑے گا؟

عورتاں دا عالمی دیہاڑ:مسئلہ مائنڈسیٹ دا ہے ، اوس نوں کون توڑے گا؟

March 8th, 2017

اج عورتاں دے حق وچ بڑے بڑے بیان چل رہے نیں۔ ہر کوئی ایس حوالے نال بیان داغدا ہے پر وچلی گل اوتھے ہی کھلوتی جے۔جو گراونڈ تے ہو رہیا ہے اوس توں پاکستانی زنانیاں جانو نیں۔ پچھلے 50سالاں توں پوری دنیا ایہہ آکھ رہی ہے پئی ترقی اوس ویلے تیز ہوندی ہے جداں کسی تھاں دی زنانیاں اوس وچ رلتی ہون۔چین، جاپان، امریکہ، یورپ دی ترقیاں گواہ نیں پر اساں مننا نہیں۔ اک عالمی رپورٹ وچ 1970 توں 2009 تیک 219 ملکاں دا ڈیٹا سامنے رکھ کے عورتاں حوالے نال تحقیقاں کیتیاں گیاں۔ رپورٹ وچ دسیا گیا پئی نکی عمر وچ کڑیاں دی شادیاں نہ کرن نال زچگی ویلے بچیاں دے مرن دا تناسب بہوں گھٹ جاندا ہے۔ایس نال زنانیاں دی صحت چنگی رہندی جے۔ دنیا بھر وچ کم کرن والیاں دا ڈیٹا وی اکٹھا کیتا گیا تے 2013 دی رپورٹ موجب پوری دنیا وچ کم کرن والیاں دا تناسب 72.2 فیصدی تے زنانیاں وچ نرا 47.1 فیصدی سی۔ جے ایس وچوں امریکہ، یورپ تے چین نوں کڈ دیو تاں ایہہ ڈیٹا بہوں گھٹ تناسب دسدا ہے۔ چین نوں ترقی دا ماڈل بناون والے ایہہ ویکھنا نہیں چاہندے پئی چین وچ 72 فیصدی ماواں جہناں دی عمر 25 توں 34 سال ہے، کم کردیاں نیں۔ ورک فورس وچ وی 64 فیصدی چینی کڑیاں کم کررہی نیں۔ زنانیاں دے کم کاج کرنتے نظر رکھن والیاں ایہہ رویہ ویکھیا جے پئی عورتاں نوں غیر رسمی شعبیاں وچ کم دتا جاندا ہے۔ جنوبی ایشیا ایس کم وچ سب توں بھیڑی صورتحال دا شکار ہے۔ جنوبی ایشیا وچ کم کرن والی 80 فیصدی عورتاں غیر رسمی شعبیاں وچ کم کردیاں نیں۔ اسمبلیاں وچ تے زنانیاں آگیاں نیں پر سول سروسز، فوج، پلس، سیکورٹی اداریاں وچ زنانیاں دی تعداد پاکستان، انڈیا، بنگلہ دیش وچ نہ ہون مطابق ہے۔ دنیا وچ کم کرن والی زنانیاں وچ 50 فیصدی توں وادھو اوہ نیں جہناں نوں نکی موٹی نوکریاں ہی ملدیاں نیں۔
پاکستان وچ زنانیاں بارے ساڈے کوڑ رویے دی سب توں وڈی نشانی ساڈیاں نصابی کتاباں نیں۔ عورتاں لئی نرسنگ، ٹیچر دی نوکریاں مخصوص نیں تے انہاں دی فوٹواں ہی نصابی کتاباں وچ چھاپیاں جاندیاں نیں۔ عورتاں نوں بینک، ائیرلائن، چیئرمین، ڈائریکٹر دے روپ وچ نہیں دکھایا جاندا۔ ایس دے مگر اک سوچیا سمجھیا مائنڈ سیٹ ہے۔فلم، ٹی وی،جرنل ازم تے مصوری وچ تے زنانیاں نوں وکھانا ہورے منع جے۔حتاکہ کھیڈاں بارے نصابی معلومات وچ آوٹ ڈور کھیڈاں نرے منڈے ہی کھیڈدے وکھائے جاندے نیں۔جے بالڑیاں ایہہ سمجھ لتا پئی اوہ وڈیاں نوکریاں وی کرسکدیاں نیں تے کل نوں اوہ وڈی نوکریاں لئی کوششاں وی کرن گیاں۔کل نوں اوہ آوٹ ڈور کھیڈاں وچ جاون گیاں۔ بس ایسے ڈر توں نصابی کتاباں وچ زنانیاں نوں نرا استاد تے نرس یا زیادہ توں زیادہ ڈاکٹر ہی وکھایا جاندا ہے تے چادر چاردیواری وچ کھیڈدے وکھان پچھے کیہہ سوچ ہے اوہ دسن دی اْکا لوڑ نہیں۔ عورتاں حوالے قنون وی بن رہے نیں۔ پچھلے سالاں وچ کم کرن والی عورتاں دے تحفظ لئی قنون بنایا گیا پر ہن بہوں سارے اداریاں دے پردھان اوس قنون نوں اپنے ویریاں خلاف ورت رہے نیں۔ زنانیاں دی تنظیماں وی چپ نیں۔ جو پچھلے دناں پی ٹی وی تے ہویا اوہ اکلی مثال نہیں سگوں تعلیمی اداریاں وچ اجہی بہوں مثالاں نیں۔قنون نوں غلط ورتیا جائے گا تے کل نوں مکانا آسان ہوسی۔ ایہہ سب پچھے اک مائنڈسیٹ کم کررہیا ہے۔ جداں تیک ایہہ مائنڈسیٹ موجود ہے اساں زنانیاں نوں ترقی دے عمل وچ رلتی نہیں کرسکدے۔
For more news regarding women click below
http://www.wichaar.com/news/122/


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels