Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> پاکستانی زنانیاں کبڈی وی کھیڈ دیاں نیں:میڈیا تے سرکاراں پرموٹ کرن

پاکستانی زنانیاں کبڈی وی کھیڈ دیاں نیں:میڈیا تے سرکاراں پرموٹ کرن

January 9th, 2017

زنانیاں دی کبڈی دی پہل قومی کھیڈاں واپڈاسپورٹس کمپلیکس لہور وچ ہوئیاں۔ پاکستان کبڈی فیڈریشن دے جنرل سیکٹری سرور رانا ہوراں دسیا پئی جے سرکار تے میڈیا ساڈی مدد کرے گا تے زنانیاں دے گھر والے وی انہاں نوں ایس کھیڈ وچ رلتی ہون دی اجازتاں دین گے۔ایس پہلی زنانہ کبڈی چمپئین شپ وچ پنجاب دی ٹیم پہلے اتے گلگت بلتستان دی ٹیم دوجے نمبر تے آئی۔ انہاں کھیڈاں وچ آرمی تے واپڈا دی زنانہ کبڈی ٹیماں وی رلت کیتی۔ اسلام آبادی زنانہ کبڈی ٹیم دی لیڈر 18 سالہ لیل پورن سی۔ اک کھیڈاری دسیا پئی صوبیاں نوں ایس بارے زیادہ توجہ دینا لوڑی دا ہے۔ اک مثال خیبر پی کے دی ٹیم دی ہے جس کول آپدا پورا یونیفارم وی نہیں سی۔ پر خیبر پی کے توں زنانہ کبڈی ٹیم دا آنا آپدی تھاں اک چنگی کوشش ہے۔ رائے مسعود کھرل، اسٹنٹ مینجر کبڈی فیڈریشن دسیا پئی اگلی وار اساں بلوچستان دی ٹیم نوں وی کھڑا کرلواں گے۔ واپڈا دے ایم ڈی دا آکھنا سی جے اساں ایس بارے توجہ دتی تاں عالمی پدر دے مقابلیاں وچ ساڈی زنانیاں دی رلت ہوسکے گی۔ کبڈی ساڈا مان ہے اتے اساں کڈیاں صدیاں توں ایہہ کھیڈ کھیڈدے آئے ہاں۔ عالمی پدر تے بھارت تے ایران دی زنانہ کبڈی ٹیماں آپدے ملکاں دا ناں روشن کرسکدیاں نیں تے پاکستانی زنانیاں وی کسے کولوں گھٹ نہیں۔ پاکستانی زنانہ کبڈی ٹیم ایران وچ تربیتاں لئی وی گئی سی۔
کبڈی دے وڈے شوقیناں وچ اک ناں طیب گیلانی ہوراں دا وی ہے۔ اوہناں حال وچ اک کتاب ’’کبڈی میدان دے ہیرے‘‘ لکھی ہے جس وچ 1933توں 2014 تیک 104کبڈی دے کھڈاریاں بارے گل چھوئی جے۔ انہاں دسیا پئی 1933 وچ برٹش انڈیا دی کبڈی ٹیم دا کپتان سلطان شاہ اڈے والا سی۔ ڈان اخبار ایہہ سٹوری بڑی تفصیلاں نال چھاپی ہے اتے ایس زنانہ کبڈی چیمپئین شپ نوں ویکھن آئی زنانیاں دی گل بات نوں وی سٹوری دا حصہ بنایا جے۔ اک زنانی خزیمہ سعید آکھیا جدوں وی کوئی سانوں ایہہ آکھدا ہے پئی تساں فلاں کم نہیں کرسکدیاں یا ایہہ کم زنانیاں دا نہیں تے سانوں ایہہ چیلنج لگدا ہے اتے اساں اوس لئی ہورتیار ہوندیاں ہن۔ صوبائی سرکاراں نوں آپدے آپدے زنانہ سکولاں، کالجاں وچ زنانہ کبڈی دی ٹیماں بنانیاں چاہیدیاں نیں اتے سکولاں کالجاں وچ زنانہ کبڈیاں دے مقابلے وی کروائے جانے چاہیدے نیں۔ اک وڈا مسئلہ ساڈے نصاب دا وی ہے جس وچ زنانیاں نوں ہمیشہ in-door کھیڈاں ویکھدے دکھایا جاندا ہے جنج کیرم، کیڑی کاٹا وغیرہ۔ ایس نوں تے صوبائی سرکاراں نوں بدلنا چاہیدا ہے۔ اج پاکستان زنانی میڈیا، دفتراں وچ وی ہے تے بینکاں، کالجاں، یونیورسٹیاں وچ وی۔ ایس گل دا ٹیکسٹ بک بورڈاں توں علاوہ سب نوں پتہ ہے۔ جے تہاڈی پہنچ ہوئے تے انہاں تیک خبر پہنچا دیو ذرا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels