Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> 23 جون نوں میں ایسے قید وچ 15سال دی ہو گئی

23 جون نوں میں ایسے قید وچ 15سال دی ہو گئی

وچار ڈیسک
July 18th, 2014

میرا ناں مشیل امانوئل اے میں دسویں جماعت دی پڑھیار ہاں۔
ساڈا گھر بہت ای سوہنی تھاں تے اے۔ اُنج تے میران شاہ خاصا خشک علاقہ اے پر جتھے ساڈا گھر اے اوہ کالونی بہت پیاری اے۔ بہت پیاری تھاں سی، پہلے اوتھے ہریالی سی۔ پر جدوں آرمی والیاں نے آ کے اپنے مورچے بنائے تے اوہناں نے جیہنے وی درخت سن کٹ دتے تے وڈیاں وڈیاں کندھاں اُسار لئیاں۔
پہلے اسیں لوگ بہت خوش رہندے سی، پر ہُن اوتھے ڈر لگا رہندا اے۔ ساڈاباپ جدوں بازار جاندا اے تے ایہی ڈر لگا رہندا اے کہ ہُنے فائرنگ نہ ہو جائے، بازار وچ کوئی ایسا ویسا کم نہ ہو جائے۔ ایس وجہ نال اسیں لوگ بازار وی نہیں جاندے۔ تے جدوں تک کوئی سیئریس بیمار نہ ہوئے تے کسے نوں ہسپتال وی نہیں لے کے جایا جاندا۔ فیر ایس وجہ نال ڈر ای لگا رہندا اے۔
پہلے اسیں بہت زیادہ ڈردنے ساں پر ہُن ایس ڈر دے عادی ہو گئے آں۔ اُتوں گولیاں لنگھدیاں رہندیاں نیں، اسیں لوگ ویڑھے وچ بیٹھے ہونے آں۔
ساڈے بچے ڈرون نوں ویکھ کے ہُن خوش ہوندے نیں : ایہہ تے ہوائی جہاز اے ایہہ تو جسوسی (ڈرون) نہیں ایہہ جہاز اے۔‘ ساڈے بچے وی نہیں ڈردے کیونجے دھماکیاں دی عادی ہو چکے نیں۔‘
ہر پنج دن بعد یا چھ دن بعد اک دھماکہ ضرور ہونا ہوندا اے۔ ایس وجہ نال ساڈے بچے ہُن عادی ہو چکے نیں۔ دھماکہ ہوندا اے اوہ لوگ کہندے نیں اوئے اوتھے دھماکہ ہویا کیونجے دھواں اُٹھ رہیا اے۔
پڑھائی وچ بہت فرق پے گیا اے۔ اٹھویں دے امتحان دتے سن تے سکول بند ہو گئے سن۔ دہشت گردی دی وجہ نال کہیا گیا کہ کُڑیاں نہیں پڑھن گیاں۔صرف منڈیاں دے سکول کالج کھلے ہوئے سن۔ کُڑیاں دا کالج وی بند، سکول وی بند، آنا جانا وی بند۔
میں اگے پڑھنا چاہنی اں تے آس کرنی آں کہ اپریشن دے بعد سکول کالج کھل جاون گے۔ کجھ پتا نہیں۔
ساڈے سکولاں وچ بہتیاں لڑکیاں مسلمان ہین، کرسچن تے دوجے دھرماں دیاں کُڑیاں گھٹ نیں۔ ایس لئی اسیں زیادہ سہیلیاں مسلمان آں جیہڑے ساڈے نال بھیناں وانگ رہندیاں نیں۔
اوہ سانوں احساس ای نہیں ہون دیندیاں کہ اسیں غیر مسلم آں۔
ساڈے سکول وچ پشتو تے عربی تے سب توں ودھ زور دتا جاندا اے۔ تے انگلش دا تے اللہ ای حافظ اے۔ انگلش اینی چنگے ڈھنگ نال نہیں پڑھائی جاندی۔ منڈیاں دا سکول چنگا اے اوتھے ایہہ چنگے طریقے نال اردو، میتھ، سب کجھ ہوندا اے۔ پر سانوں کہندے نیں کہ پشتو تے عربی سکھنی بہت ضروری اے۔ انگلش دا کیہ کرنا اے تساں۔
اوتھے سیر کرن دی جگہ تے ہے ای نہیں۔ کیونجے اسیں لوگ برقع پانے آں۔ اوتھے بغیر برقع توں باہر نہیں جا سکدے۔ جسیراں ای بچی دس یاں بارھاں ورھیاں دی وہندی اے تے برقع پوا دتا جاندا اے۔ کیونجے اوتھے دے کلچر مطابق تے کلچر نہ اپناؤ تے چنگا نہیں لگدا۔ جدوں سارے پاندے نیں تے آپ نوں وی شرم آندی اے اوہناں نے برقع پایا اے تے اسیں نہیں پایا۔
سیر کرن دی تھاں تے ہے ای نہیں۔ نہ پارک، نہ لیڈیز پارک، ہوندا اے نا لیڈیز پارک؟ اتھے کجھ وی نہیں اے۔
میں جدوں پہلی وار برقع پایا سی تے میں اپنے آپ وچ ہسدی سی۔ میرا دل نہیں سی برقع پاون نوں پر ابو کہندے سن کہ جے اسیں نہیں پاواں گے تے لوگ برا مناون گے۔ ایہہ نہیں کہ ضرور پاؤ، پر کہندے نیں کہ ایہہ کرسچن لوگ نیں ایہہ لوگ پردہ نہیں کردے۔
پردہ تے کرسچن لوک وی کردے نیں۔ پر فیر سانوں برقع پاؤنا ای پیا۔کوئی برائی نہیں۔
برقع تے اوتھے روٹی کھاون موجب اے
وڈی ہو کے نرسنگ وچ جانا چاہندی آں پر جیہو جیہی پڑھائی جاری اے میران شاہ دی، ویکھاں گے۔ سکول تے اک ورھے توں بند اے۔ ساڈے حکومت نوں اپیل اے کہ کُڑیاں دا کالج تے سکول ضرور کھولن کیونجے منڈیاں نوں حق اے تے فیر کُڑیاں دا وی اونا ای حق اے۔
ایتھے (بنوں) وچ بہت زیادہ گرمی اے تے گھر دو ر ہونا تے بہت اوکڑ والی گل اے۔ ایتھے رہن دی تھاں چنگی اے پر اپنا گھر اپنا ای ہوندا اے۔
میں 15 ورھیاں دی ہو گئی آں میری سالگرہ ایس قید وچ بس ٹھیک ای سی۔ پر جسراں میں سوچیا سی اُنج نہیں کر سکی۔ کجھ تے پیسیاں دا مسئلہ سی دوجا اپنے گھر توں دور ٹھیک نہیں لگا۔ ورھے گنڈھ منانا۔ ماں پیو نے میری خوشی لئی کیک کٹیا پر چنگا نہیں لگا۔ اپنے گھر توں دور کیک کٹنا بہت مشکل لگدااے، پر کیہ کردی۔ جے میں ایہہ نہ کردی تے میرے ماں پیو دادل دُکھنا سی۔
کیک کٹن توں پہلاں دعا منگی کہ ساڈے علاقے وچ چنگے طریقے نال امن امان ہو جاوے تے اسیں گھراں نوں پرت جائیے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels