Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> دھی پیدا کرن داجرم: اک سال وچ 56 ماواں دا قتل

دھی پیدا کرن داجرم: اک سال وچ 56 ماواں دا قتل

وچار ڈیسک
April 25th, 2014

وچار : انسانی حقوق دی تنیظیم ہیومن رائٹس کمیشن نے آکھیا اے کہ 2013 دے دوران ملک بھر وچ 56 سوانیاں نوں دھی پیدا ہون دے جرم دی وجہ توں قتل کر دتا گیا۔ تفصیل دے مطابق ہیومن رائٹس کمیشن آف پاکستان ولوں انسانی حقوق بارے سالانہ رپورٹ برائے 2013 جاری کر دتی گئی۔ رپورٹ دے مطابق پچھلے ورھے جیہڑی گمشدگی دے 90 توں ودھ واقعات رپورٹ ہوئے جد کہ جبری لاپتا بندیاں وچوں 129 دیاں مدھیاں ہوئیاں لاشاں برآمد ہوئیاں۔ 11 پرچا کاراں نوں فرائض دی انجام دہی دے دوران قتل کر دتا گیا، کراچی وچ تن ہزار 218 بندے ٹارگٹ کلنگ دا نشانہ بنے، 45 خود کُش حملیاں وچ 694 جد کہ 31 ڈرون حملیاں وچ 199 بندے تے 200 توں ودھ فرقہ وارانہ حملیاں وچ 687 بندے ہلاک ہوئے۔ رپورٹ دے مطابق ملک بھر وچ قتل دے 14 ہزار توں ودھ مقدمے درج کیتے گئے۔ 800 سوانیاں نے خود کشی کیتی جد کہ 56 سوانیاں نوں دھی پیدا کرن پاروں قتل کر دتا گیا۔ پچھلے ورھے 869 سوانیاں نوں غیرت دے ناں تے قتل کیتا گیا جد کہ مہینا پولیس مقابلیاں دی گنتی 357 دی مختلف جرائم دے تحت 227 بندیاں نوں موت دی سزا سنائی گئی پر کسے اُتے وی عمل درآمدنہ ہویا پچھلے ورھے کئی مقدمے عدالتاں وچ زیر التوا ہوئے صرف 20 ہزار مقدمے سپریم کورٹ وچ زیر التوا سن ایہدے علاوہ ملک بھر دیاں جیلاں وچ قید 64 فیصد قیدی بغیر کسی عدالتی فیصلے دے ہی بند رہے۔ تعلیم دے حوالے نال انسانی حقوق دی تنظیم دیرپورٹ وچ آکھیا گیا اے کہ 2013 دے دوران ملک بھر وچ پرائمری سکول جان دی عمر دے ہر 10 وچوں 3 بال سکول جان توں محروم رہے جیہناں دی مجموعی گنتی 55 لکھ بن دی اے۔ ملک وچ دو ہزار 88 فرضی سکول قائم نیں جد اک ہزار 8 زکولاں اُتے ناجائز قبضہ کیتا گیا اے۔ سکولاں دیاں بلڈنگاں تے قبضے وچ ملوث بندیاں دی پشت پناہی با اختیار تے صاحب اقتدار شخصیات کر رہے نیں۔ ایہدے علاوہ 5ہزار 827سکول غیر فعال نیں۔ ہیومین رائٹس دی رپورٹ وچ آکھیا گیا اے کہ ملک بھر وچ اک ہزار 786 بندیاں لئی سرکاری ہسپتالاں وچ صرف اک بسترا موجود اے۔ ملک وچ 40 فیصد موتاں دی وجہ گندے پانی پاروں کھلرن والیاں بیماریاں سن پچھلے ورھے ہلاک ہون والے 8 لکھ بالاں وچوں 35 فیصد دیاں مورتاں دی وجہ ناقص خوراک سی، 2013 وچ ملک بھر وچ بے روزگانی دی شرح وچ بے تہاشا وادھا ہویا جیہدے بعد بے روزگار بندیاں لئی گنتی 37 لکھ 20 ہزار توں ودھ گئی۔ خیبر پختونخواہ وچ پچھلے ورھے 24 ہزار 968 والدین نے پولیو دے قطرے پیان توں انکار کیا جد کہ 47 ہزار 99 بال پولیو ویکسین پین توں محروم رہے تے پچھلے ورھے پولیو ورکرز اُتے حملیاں وچ 20 بندے ہلاک ہوئے، 2013 وچ اک ہزار 205 بالاں نوں جسمانی تشدد دا نشانہ بنایا گیاجیہناں وچ 68 فیصد کُڑیاں سن۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels