Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> اک بھین کالی

اک بھین کالی

زبیر احمد
March 24th, 2013
5 / 5 (2 Votes)


اک بھین کالی
 اوہو کرماں والی
 ستو بھیناں گوریاں
 چاندی دیاں پوڑھیاں
نزہت دا ایہ گاون مینوں بالپن وچ لے گیا ۔سنگیت دا ایہو کمال اے اوہ تہانوں آپنی تھاں اُتے نہیں رہن دنیدا کسے ہور جہان ول لے کھڑدا اے۔ ایہ گاون میں نرہت دی نویں سی ڈی اُتے سُنیا جو اوہ آپنی اک دن دی لہور یاترا وچ مینوں پھڑا گئی۔ میں سی ڈی اک پاسے رکھ دتی پئی ویل ملی تاں سُناں گے۔ جد میں لائی تاں کجھ گیتاں نے تاں مینوں کِیل لیا ۔ جیویں الڑ بلڑ باوے دا تے دُر دُر کُتیا۔ نزہت عباس دی ایس نویں سی ڈی وچ لوریاں تے نظماں نیں ۔ اصلوں ایہ سی ڈی بالاں بارے اے تے نزہت دی اک ورھے دی گھالنا اے جیہڑی اوس دے کم وچ نظر آوندی اے۔ ایہ اک بڑے سوہنے تے سُججے چج نال تیار کیتا کم اے۔
سنگیت خورے بندے تُوں وی پرانا اے۔ جد بندے دے جُون اجیہے پانیاں وچ سی سنگیت اودوں وی سی۔ ایس لئی سبھ تُوں پرانا جنور ہاتھی سنگیت اُتے ہلن لگ پوندا اے۔ سنگیت بندے دے جینز وچ اے تے پروگرامڈ (programmed)اے۔ سنگیت دا سبھ اُتے اثر ہوندا اے کئی بال تے کئی وڈے۔ پر بالاں اُتے سبھ تُوں بوہتا ۔اسیں تاں سنگیت سُن سِر ہلاندے آں پر بال نچن لگ پوندے نیں۔ سنگیت دا اثر بالاں اُتے ایس لئی بوہتا ہوندا اے پئی بال اُنج اوس حیاتی دا حصہ نہیں بنے جیہڑی کھوہ کھس تے لُٹ مار اُتے کھلوتی ہوئی اے۔ سنگیت سانوں نرم کردا اے، ہولا تے آپنی تھاں تُوں ہلاندا اے۔ اساں ساریاں بڑیاں پکیاں تھاواں مَلیاں ہویاں نیں تے آپنی تھاں تُوں ہلن لئی تیار نہیں ایس لئی نچ نہیں سکدے۔
نزہت دے کم دے تن گُن ہن۔ اوس گیت آپنی ماں بولی وچ گائے ہن، بالاں لئی ہن تے تیجے اوس ایہ آکسفرڈ وچ بہہ بنائے ہن۔ جیہڑا کم اسیں ایتھے آپنے پنجاب وچ چھڈی بیٹھے آںاوس پردیس وچ کر وکھایا اے۔ اک ہور گُن ایہ وے پئی ایہناں سارے گیتاں تے لوریاں دا جیہڑے اُردو تے پنجابی وچ نیں بروشر وچ ایہناں دا انگریزی ترجمہ وی دتا اے۔ ایس دے نال سی ڈی دی جانکاری وی گورمُکھی تے ہندی وچ وی دے دتی گئی اے۔ جس نال ایس سی ڈی دی اپڑ کافی لوکاں تیک ہو سکدی اے تے جیہناں نوں پنجابی تے اُردو نہیں آوندی اوہ وی ایس دا آنند مان سکدے ہن۔ سنگیت دی کوئی بولی نہیں ہوندی ۔
اینی سوہنی واج نال تے اینے سوہنے ڈھنگ نال ایہ سی ڈی بناون تے میں نزہت جی نوں ودھائی دیندا اے۔ طرزاں وی بہوں
سوہنیاں نیں تے سنگیت وی سوہنا اے۔



Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels