Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> طالبان دی دھمکی تے فن دی پڑھیار ممبئی وچ

طالبان دی دھمکی تے فن دی پڑھیار ممبئی وچ

وچار ڈیسک
March 3rd, 2013

افغانستان دی اک نوجوان جدید گرافٹی یاں خاکے بناون والی پڑھیار نوں اپنے شہر وچ پینٹنگ کرن تے دھمکیاں دا ساہمنا کرنا پیا پر ہُن اوہنوں بھارت دے شہر ممبئی وچ نویں پناہ مل گئی اے جتھے اوہ مطمئن نظر آندی اے۔
افغانستان دے قندھار شہر توں آئی 23 ورھیاں دی ملینا سلیمان غیر ملکی ضرور اے پر ممبئی دے مشہور جے جے سکول آف فائن آرٹ وچ پڑھائی کردی اے تے اپنے آپ نوں غیر ملکی نہیں سمجھدی۔
ملینا اپنے ملک دے روشن خیال تے جدید نظیریے رکھن والیاں لوکاں دی نمائندگی کردی سی ۔ جد کہ طالبان نال مقابلہ کرنا آسان نہیں اے پر ایہنے کافی حد تک اوہناں دا مقابلہ کیتا پر جد طالبان دی دھمکیاں ودھدیاں گئیاں تے ایہناں دے والد دی لت توڑ دتی گئی تے اوہناں اپنا ملک چھڈ دتا۔
دو مہینے پہلے اپنے ماپیاں نال قندھار توں ممبئی آون والی ملینا ہُن کھلی فضا وچ آزادی نال ساہ لے رہی اے اوہ جدوں دی ممبئی آئی اے کافی خوش اے۔ ملینا سلیمان دا جرم صرف اینا سی کہ اوہ شہر دیاں کندھاں تے پینٹنگ کردی سی تے ایہدے توں اڈ اوہ پتھر دیاں مورتیاں بناون دی وی ماہر اے۔
ظاہر اے طالبان نوں ایہہ سبھ کجھ منظور نہیں سی اوہدا کہنا اے : طالبان نے سانوں انساناں دیاں مورتیاں تے پینٹنگ توں منع کیتا کیونجے ایہناں دے مطابق ایہہ غیر اسلامی اے۔ پہلے اسیں ہار نہیں منی تے اپنے فن دا وکھالا کردے رہے پر فیر اوہناں میرے باپ تے حملہ کیتا تے ایہناں دی لت توڑ دتی تے سانوں اپنا ملک چھڈنا پیا۔'
اٹھ بھین بھراواں وچوں سبھ توں چھوٹی ملینا دا بال پُنے توں ای فن نال دلچسپی سی۔ آرٹ دی پڑھائی کرن لئی اوہ کراچی وی گئی تے بعد وچ اپنے ملک پرت کے ایہدی اہمیت دی مشہوری کرن لگ پئی پر شروع توں اوہنوں مخالفت دا ساہمنا کرنا پیا۔
ملینا مطابق 'میں کندھاں تے چٹاناں تے پینٹنگ کردی تے لوک مینوں مندا بولدے تے روڑے وی ماردے سن۔ اسیں دوجی تھاں تے جاندے تے اوتھے وی ایہو حال سی۔ ایہہ سلسلہ کافی دناں تک چلد ارہیا۔'
شروع دے دناں وچ ملینا دے ماپیاں نوں ایہدے بارے پتا نہیں سی۔ پر اک دن جدوں طالبان ولوںلکھتی طور تے دھمکی آئی تے ایہناں دے پریوار والیاں نے ایہنوں گھر وچ قید کر دتا۔ پر اوہ گرافٹی دا کم دوبارہ شروع کرن لئی بے چین رہی۔ ملینا مطابق میں ڈیڑھ سال تک گھر وچ قید رہی۔ میرے سینے وچ اِک طوفان اُٹھ رہیا سی۔ میں لوکاں نال ملنا چاہندی سی۔ گھر تے انٹر نیٹ وی نہیں سی۔ گھر دی ایس قید وچ مینوں ایہہ سمجھ آئی کہ میری طرحاں ملک وچ ہور وی کئی کُڑیاں ہوون گیاں جیہڑیاں اپنے فن دا وکھالا کرنیاں چاہندیاں نیں پر ایہناں دے گھر والیاں نے ایہناں نوں روک دتا ہوئے گا تے میں اپنے پریوار نال بغاوت کر دتی۔ میں پینٹنگ دی تھاں گرافٹی نوں ایس لئی چُنیا کیونجے ایہہ کم کندھاں اُتے ہوندا اے جیہنوں بہتے توں بہتے لوک ویکھ سکدے نیں۔میں ساریاں نوں دسنا چاہنی آں کہ سانوں ڈرن دی کوئی لوڑ نہیں۔
گرافٹی پینٹنگ دا بیڑا چُکن دا مقصد اپنے پریوار،گُھٹے ہوئے سماج تے طالبان دے خلاف بغاوت وی سی۔ ایہناں دی ایس جرأت لئی صدر حامد کرزئی نے اپنے محل وچ بلا کے تھاپڑی وی دتی۔ پر ایس توں اڈ حکومت نال شکایت اے۔ حکومت مرد تے عورت وچ برابری دیاں صرف گلاں کردے نیں برابر تے عمل نہیں کردے۔
ملینا مسلمان عورتاں تے کلاکاراں لئی آزادی چاہندی اے۔ اوہ کہندی اے کہ آزادی مغربی ممالک والی نہیں پر اسلام دے دائرے وچ رہ کے وی سانوں بہت آزادی مل سکدی اے۔ اوہناں نوں ہرکھ ایس گل اُتے اے کہ قندھار وچ مسلم سماج طالبان دی سوچ نوں تیزی نال اپناون لگ پیا اے۔ اوہناں کہیا اے : 'اسیں ایہہ نہیں کہہ سکدے کہ قندھار وچ سارے طالبان نیں پر اسیں ایہہ کہہ سکنے آں کہ سارے طالبان وانگ ذہن رکھدے نیں۔' ایہناں دے مطابق ایس ویلے میں کشمکش وچ آں۔ اک پاسے خاندانی مجبوریاں نیں تے دوجے پاسے طالبان دی دھمکیاں، میں کتھے جاواں؟ میری بھلک کیہ اے مینوں نہیں پتا۔ پر ایہناں ساریاں گلاں دے باوجود ایہدے مُکھ تے کوئی مایوسی نہیں وکھائی دیندی۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels