Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> اڻکھ دے ناں تے چھ سو پچھہتر زنانیاں قتل

اڻکھ دے ناں تے چھ سو پچھہتر زنانیاں قتل

وچار ڈیسک
December 23rd, 2011
4 / 5 (1 Votes)

انسانی حقاں لئی کم کرن والی ستھ ہیومن رائٹس کمیشن آف پاکستان دا کہڻا ہے جو پاکستان وچ ایس سال دے پہلے نو مہینیاں وچ چھ سو پچھتہر زنانیاں نوں اڻکھ دے ناں تے قتل کیتا گیا ہے۔

ستھ دی گڻتی موجب ایہناں چھ سو پچھتہر معاملیاں وچ دو تہائی انج دے نیں جیہناں وچ ویاہیاں وریاں زنانیاں تے غیر مرداں نال جنسی سانگیاں دا الزام لایا گیا سی۔ ستھ دے اک بلارے نے وسیلیاں نوں دسیا پئی کیساں دی ایہہ گڻتی صرف اک گویڑ ہے تے ہو سکدا ہے پئی حقیقت وچ ایہہ گڻتی ایہدے نالوں بہتی ہووے۔

اوہناں دا کہڻا سی جو ملک وچ زنانیاں دے خلاف جرم ہور ودھ رہے نیں تے ایس بارے پوری رپورٹ اگلے سال فروری وچ ساہمڻے لیاندی جاوے گی۔ بلارے نے دسیا پئی قتل ہوڻ والیاں زنانیاں وچوں اکہتر دی عمر اٹھاراں سالاں نالوں گھٹ سی۔

ہیومن رائٹس کمیشن موجب سنہ دو ہزار دس وچ پاکستان وچ اڻکھ دے ناں تے قتل ہوڻ والیاں زنانیاں دی گڻتی ست سو اکانوے سی تے اوہناں وچوں چار سو پنجاہ نوں جنسی سانگیاں وچ رلتی ہوڻ پاروں جدوں کہ اک سو انتی نوں اجازت دے بناء ویاہ کرن پاروں قتل کیتا گیا۔

بلارے دا کہڻا سی جو سنہ دو ہزار دس وچ مرن والیاں زنانیاں وچوں اُنیاں نوں اوہناں دے پتراں نے، انجاہ نوں اوہناں دے پیو تے اک سو انہتر نوں اوہناں دے خاوند نے قتل کیتا۔ہیومن رائٹس واچ دے ڈائریکٹر علی دایان حسن نے خبراں دے ادارے اے ایف پی نوں دسیا پئی ایہہ سرکار تے قانون نافذ کرن والے ادایاں دی ناکامی ہے جیہدے پاروں قبائلی آگو تے ہور بندے قانون نوں اپڻے ہتھ وچ لے رہے نیں۔

اوہناں دا کہڻا سی پئی اڻکھ دے ناں تے کیتے جاڻ والے قتلام نوں روکڻ لئی ضروری ہے جو اجوکے قانون تے پربندھیاں دے نظام وچ بدلی دے نال نال لوکاں نوں ایس مسئلے توں خبردار کیتا جاوے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels