Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> پہلی عرب زنانی نوں نوبل انعام

پہلی عرب زنانی نوں نوبل انعام

وچار ڈیسک
October 8th, 2011

توکل کرمان پہلی عرب زنانی ہے جیہنوں نوبل دا امن انعام دتا گیا ہے۔ یمن دی صحافی اتے زنانی حقاں دے جھنڈا چک توکل کرمان نے 2005ء وچ 'ویمن جرنلسٹ ود آؤٹ چینز' ناں دی ستھ بڻائی اتے مشرق وسطیٰ وچ چلڻ والی اجوکی بیداری دی لہر وچ یمن وچ ہوڻ والے روس وکھالیاں وچ اگے اگے رہی۔

توکل کرمان جیہڑی یمن دی اسلامی جماعت اصلاح دی ممبر ہے، پچھلے پنج ورھیاں توں یمن وچ زنانیاں دے حقاں اتے سیاسی قیدیاں دی رہائی لئی جدوجہد کر رہی ہے۔

ناروے دی نوبل امن کمیٹی نے یمنی صحافی توکل کرمان اتے دو ہور زنانیاں نوں پُرامن جدوجہد راہیں جمہوریت، امن اتے زنانیاں دے حقاں لئی اُپرالے کرن دے بدلے وچ نوبل انعام دتا ہے۔

انعام جتڻ مگروں میڈیا نوں اک انٹرویو دیندیاں توکل کرمان نے دسیا پئی اوہنوں پتہ وی نہیں سی کہ ایس انعام لئی اوہدا ناں وی آیا ہے۔ اوہنوں الجزیرہ اتے بی بی سی عربی چینل توں ایہہ پتہ لگا سی۔

اپریل 2011ء وچ صنعا دے مرکزی چوک وچ بی بی سی نال گل کردیاں توکل کرمان نے آکھیا سی پئی حکومت مخالف وکھالیاں وچ لوکاں دی رلت نے اوہنوں حیران کر دتا۔ 'میں ایہہ سوچ وی نہیں سکدی سی پئی یمنی زنانیاں جیہڑیاں ست وجے نماشیں مگروں گھروں باہر پیر نہیں دھر سکدیاں، اینی گڻتی وچ وکھالاں وچ رلتی ہوڻ لئی آؤڻ گیاں اتے ایہناں کیمپاں وچ رات لنگھاؤڻ گیاں۔ میں ایہو جہیا سفنا وی نہیں دیکھ سکدی سی۔ مینوں یمنی زنانیاں تے ماڻ ہے۔'

توکل کرمان یمن وچ زنانیاں دے ویاہ دی عمر ودھاؤڻ لئی جدوجہد کردی رہی ہے اتے اس پاروں کئی واری جیل وی جا چکی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels