Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> طالبان دا نظریہ سی عورت دی تھاں '' گھر یاں فیر قبر ''

طالبان دا نظریہ سی عورت دی تھاں '' گھر یاں فیر قبر ''

وچار ڈیسک
October 7th, 2011
5 / 5 (1 Votes)

کابل وچ مبصراں تے عوامی نمائندیاں دا وچار ہے جو افغانستان تے امریکہ تے اوہدے اتحادیاں ولوں دھاڑیاں دے دس سال توں مگروں جے کسے وڈی کامیابی یاں اگے ودھن دا دعویٰ کیتا جاسکدا ہے تے اوہ زنانیاں دے شعبے وچ ترقی ہے۔ ایہناں دس سالاں وچ کڑیاں دی تعلیم، صحت تے زنانیاں دے کم کرن دے شعبیاں وچ حقیقتی پیشرفت ہوئی ہے جدوں کہ نویں آئین وچ زنانیاں نوں ساویں حق دتے گئے نیں۔

اج توں دس سال پہلوں طالبان دی حکومت وچ افغانستان وچ عورتاں دی تعلیم تے روک سی اوہناں نوں روزگار دے موقعے نہیں دتے جاندے سی تے بازاراں وچ ساک مرد دے بناء اوہناں دا جاڻا سزا جوگ سی، سگوں اوہناں نوں کئی واری صحت دیاں مڈھلیاں سوکھتاں تے حقاں توں وی دور رکھیا جاندا سی۔

افغانستان دی اک زنانی وکیل حبیبہ کاکڑ نے وسیلیاں نوں دسیا پئی طالبان اج توں دس سال پہلوں زنانیاں نوں ہر طرحاں پریشان رکھدے سی۔ عورتاں نوں بازار جاڻ دی اجازت نہیں سی تے بازار وچ اوہناں نوں بید نال کٹیا جاندا سی۔ طالبان کہندے سی عورت دی تھاں گھر یاں فیر قبر ہے۔ اوہ چاہوندے سی جو زنانی اپڻی ساری حیاتی چاردیواری وچ لنگھاوے۔

افغان پارلیمان دی اک رکن میرمن اربان نے وسیلیاں نوں دسیا پئی دس سال توں مگروں اج افغانستان وچ زنانیاں نوں تعلیم تے کم کرن دی اجازت ہے۔اوہ حکومت وچ وزیر، پارلیمان وچ ممبر تے وکیل استاد تے ڈاکٹراں دی پکھوں کم کرسکدیاں نیں۔ عام زنانیاں دی وچار دے سروے توں پتہ لگدا ہے ہے پئی افغان زنانیاں طالبان نال سیاسی صلح صفائی نوں پچھلے دس سال دی پیش رفت لئی خطرہ محسوس کردیاں نیں۔

ایس بارے میرمن اریان نے کہیا سی '' اسیں جاڻنے آں جو سانوں اوہ حق نہیں مل سکدے جیہڑے لہندی دنیا وچ زنانیاں نوں ملے نیں۔ پر سانوں زنانیاں نوں اوہ سوڑھی نظر والی سیاست وی قبول نہیں ہے۔ سانوں '' گھر یاں قبر '' دا نظریہ اُکا قبول نہیں ۔ اسیں افغانستان دے آئین تے اسلام موجب زنانیاں دے حقاں دی منگ کرنے آں۔''

افغانستان نال سانگا رکھڻ والیاں ایہناں زنانیاں نے اک دوجے دی گل نال ایکا کردیاں ہوئیاں کہیا جو اوہ ہڻ جنگ توں اک گئیاں ہوئیاں نیں تے اوہ وی ملک وچ امن چاہوندیاں نیں۔ پر اوہناں دا کہڻا سی جو طالبان دے نال کسے وی قسم دے مذاکرات یاں امن معاہدے کردے ویلے زنانیاں دے حقاں نوں نظر انداز نہ کیتا جاوے۔ اوہناں زور دیندیاں ہوئیاں کہیا اوہناں نوں مصالحت دی شکل وچ طالبان دا پچھلا ورتارا یاں نظریہ قبول نہیں ہووے گا۔ تے ایہہ افغان زنانیاں نوں اوہ سارے حق ملڻے چاہی دی نیں جیہڑے کئی ترقی پسند مسلمان ملکاں دیاں زنانیاں نوں ملے ہوئے نیں۔

'' ایمنسٹی انٹرنیشنل '' سڻے انسانی حقاں دے کئی اداریاں نے خبردار کیتا ہے پئی زنانیاں دے حوالے نال ایس نازک پیش رفت نوں افغانستان دی وگڑدی ہوئی سیکورٹی دی صورتحال تے طالبان دے فیر ابھرن دا خطرہ ہے۔مبصر ایس گل تے اِک نیں جو کئی شعبیاں وانگوں، زنانیاں دے شعبے وچ وی آزادی تے خوشحالی افغانستان وچ سیکورٹی تے استحکام دی عام صورتحال نال جڑی ہوئی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels