Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> سوات وچ کنجریاں دا لہاء

سوات وچ کنجریاں دا لہاء

ایم الیاس خان
September 16th, 2011

سنگیت، شراب اتے کنجریاں دا روایتی ناچ پاکستان دی وادی سوات دے ضلعے بُنڑ دیاں شاماں دا حسن سی۔ پر چار ورھے پہلاں اس علاقے تے طالبان نے قبضہ کر لیا جیہنوں مگروں 2009 وچ پاکستانی فوج نے اک کاروائی پچھوں چھڑوا لیا۔

جدوں طالبان دی گولی سوات دی اک مشہور کنجری دے جثے نوں چیردی ہوئی لنگھ گئی اتے اوہدی لوتھ سوات دے وڈے چوک چوں لبھی تاں اس علاقے دے سارے سنگیت کار اتے ناچے اوتھوں نس تُرے۔

بھاویں ہُڻ ایہہ سارے لوک آپڻے علاقے وچ پرت آئے ہیڻ پر ایہناں دا بے فکری دا سبھاء ہُڻ اک بھلی وسری گل بڻ گیا ہے۔ ہُڻ اوتھے بہت گھٹ گاہک اتے تماش بین ہیڻ ایتھوں تیکر پئی کنجریاں وچ بہت گھٹ رہ گئیاں ہیڻ۔

بنڑ دیاں بھیڑیاں گلیاں وچ گھمدا ہویا بندہ جیہڑا ناچ تھاواں وچ لوکاں دے داخلے دے پربندھ سانبھدا ہے، اوتھے آؤڻ والے اوبھڑاں نوں شک بھریاں نظراں نال دیکھدا ہے۔ کنجریاں دے گھر وچ داخلہ مقامی بندیاں دے حوالے بنا انہوڻا ہے تاں جے ایہہ پک ہو سکے پئی آؤڻ والا بندہ چھڑا موج میلے لئی آیا ہے۔

ہُڻ اوتھے جاڻ مگروں کئی جڻے مایوس ہو جاندے ہیڻ کیونجے ہُڻ اوتھے پیڻ لئی کجھ وی پیش نہیں کیتا جاندا اتے نہ ہی اوہناں ساہمڻے گاڻا گایا جاندا ہے۔ ماحول بڑا گنبھیر ہے جتھے گروہ دی صورت وچ نچیا جاندا ہے اتے کنجریاں سنگیت دیاں کیسٹاں لا کے نچدیاں ہیڻ۔

ایتھے شام دا مڈھ اک دھن لوگری نال بجھدا ہے جیہڑی اک ہلکے سراں دی دھن ہے اتے ایہدا ناں افغانستان دے صوبے لوگر دے ناں تے ہے۔ پشتو گیتاں دا موضوع پیار، وچھوڑا اتے دور دراڈے دا پینڈا ہوندا ہے۔ جیویں جیویں شام ڈھلدی ہے سنگیت اُچا ہوندا جاندا ہے۔

30 ورھیاں دی تسلیم دسدی ہے پئی 'پہلاں ایتھے دھندا بہت ودھیا سی۔ پیسے چنگے لبھ جاندے سی، سارے راضی سن۔ پر ہُڻ حالات وکھرے ہیڻ، ہُڻ تاں اُکا گزارے والی گل ہے۔'

اوہناں نے دسیا پئی پہلاں اوتھے پیسہ اتے شراب عام سن اتے ماحول بہت کھلا ڈلھا سی۔ طالبان دے آؤڻ مگروں سنگیت کاراں اتے کنجریاں لئی کمائی دے وسیلے ہولی ہولی گھٹ گئے۔ سنگیت کاراں، اچیچا کنجراں نے واجیاں توں جان چھڈا لئی پئی کدھرے طالبان اوہناں دے گھر تے چھاپہ مار کے برآمد نہ کر لیڻ۔

تسلیم نے دسیا پئی 'طالبان نے سانوں حکم دتا سی پئی آپڻا دھندا چھڈ دئیے اتے اسیں ساریاں نے ایہہ کم چھڈ کے دوجیاں نوکریاں کر لئیاں۔'

پر پاکستان وچ کئی کنجریاں ایسے دھندے وچ جمیاں پلیاں ہیڻ اس پاروں اوہناں لئی وسیب دے ویہڻ وچ ویہڻ لئی چھڑا کجھ ہی راہ بچدے ہیڻ۔ اوہناں دے کول بگانے جڻیاں لئی سجڻ سورڻ اتے نچڻ دا خاندانی دھندا کرن توں اڈ کوئی ہور چوڻ نہیں ہوندا۔

سوات دیاں دوجیاں کنجریاں اتے سنگیت کاراں وانگوں تسلیم وچ 2008 دے خزاں دے موسم وچ علاقہ چھڈ گئی سی۔ ایہدا کارن اوہدے نال دی کنجری شبانہ دا قتل سی۔ 'جدوں اوہناں نے ساڈی گوانڈھڻ شبانہ نوں قتل کیتا، اوسے دیہاڑے ساریاں نے ایتھوں جاڻ دا فیصلہ کر لیا سی۔ اسیں نس بھجائی وچ ایتھوں نکلے، ہر شے ایتھے ای رہ گئی ایتھوں تیکر پئی جتیاں کپڑے وی۔'

شبانہ 25 ورھیاں دی سی اتے اوہنے طالبان ولوں نچڻ تے لگی روک نوں النگھیا سی۔ جنوری 2009 دی اک ٹھنڈی رات طالبان نے اوہدے گھر تے ہلہ بول دتا۔ اوہناں نے شبانہ دے ٹبر دے سارے 22 جیاں نوں بستریاں نوں باہر گھسیٹیا، جیہناں وچ 14 بال وی سن۔ شبانہ دے بھرا زیارت گل نے دسیا پئی 'اوہناں وچوں اک نے پچھیا شبانہ کوڻ ہے؟ دوجے بندے نے اوہدی ویڻی پھڑی اتے پچھیا پئی ایہہ ہے؟ اوہ بندہ اوہنوں گھسیٹدا ہویا لے گیا اتے آکھیا پئی اوہناں نے اوہدے کولوں کجھ سوال پچھڻے ہیڻ جیہدے مگروں اوہنوں چھڈ دیڻ گے۔

زیارت گل دا آکھڻا سی پئی اوہ مگر جاڻ لگا تاں طالبان نے اوہنوں ہوڑیا اتے جانوں مارن دی تڑی لائی۔ ٹبر سویر تائیں اڈیکدا رہیا فیر زیارت گل اوہنوں لبھڻ ٹر گیا۔

'اوہ مینوں چوک وچ پئی لبھی اوہنوں چھ گولیاں وجیاں سن اتے اوہدی اک بانہہ 3 تھاواں توں ٹٹی ہوئی سی'۔ بھاویں ایہہ لوک پرت آئے ہیڻ پر اوس ویلے دا ڈر اوہناں دے ذہناں وچ ہُڻ وی ہے۔ اوہناں وچوں ای اک 25 ورھیاں دی نیلم وی ہے۔

اوہ آپڻیاں ناچ دیاں ویڈیوز پاروں کافی مشہور ہے اتے پاکستانی فلماں وچ کم کرنا چاہوندی ہے۔ پر ہُڻ اوہدا اکو اک شوق مٹھی آواز وچ گانے سڻنا اتے گھر وچ اکلیاں ای نچڻا ہے۔ انج جاپدا ہے پئی اوہدے سفنے اتے جذبہ گواچ گیا ہے۔

نیلم دسدی ہے 'جدوں توں اسیں مینگورہ چھڈ کے آئے ہاں میں کسے ویڈیو وچ کم نہیں کیتا۔ میرے نال کئی پروڈیوسراں نے رابطہ کیتا پر میں نانہہ کر دتی۔ مینوں ڈر ہے پئی جے میں ناچ دیاں ویڈیوز وچ کم کیتا تاں طالبان پرت آؤڻ گے اتے سزا دیڻ گے'۔

طالبان دے آؤڻ پچھوں کئی کنجریاں ویاہ دتیاں گئیاں اتے اوہناں نے ایہہ دھندا ہی چھڈ دتا۔ ہُڻ اوہو ای گڻتی دیاں کنجریاں بچیاں ہیڻ جیہناں دے ٹبر اوہناں دے سر تے پلدے ہیڻ۔

شبانہ دا ویاہ وی متھیا ہویا سی۔ شبانہ دے بھرا دا کہڻا ہے پئی اوہدا ساک اک سرکاری ملازم نال متھیا گیا سی جیہنے ویاہ لئی رقم اکٹھی کرن لئی چھ مہینے دا ویلا لیا سی۔ پر اوہدے توں پہلاں ہی اوہنوں قتل کر دتا گیا۔

بھاویں سوات وچ بہت گھٹ لوکاں نوں لگدا ہے پئی طالبان پرت آؤڻ گے پر وسیب نوں لگے پھٹ چھیتی بھردے نہیں جاپدے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels