Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> تنزانیہ دیاں پڑھیاراں تے استاداں دا جبر زنا

تنزانیہ دیاں پڑھیاراں تے استاداں دا جبر زنا

وچار ڈیسک
August 9th, 2011

تنزانیہ وچ ہر سال ہزاراں پڑھیاراں نوں تعلیم پوری کیتے بغیر ہی سکول چھڈ دینا پیندا ہے۔ کیوں جو اوہ حاملہ ہو جاندیاں نیں۔ اوہناں دے حاملہ ہوڻ دے کئی کارن نیں، جیہناں وچوں اک استاداں دی ہتھ چالاکی ہے۔

مشرقی افریقہ دے ملک تنزانیہ دے اک اسکول ' اہانا میلو سیکنڈری اسکول ' دے پڑھیار منڈیاں دیاں وردیاں چٹی شرٹ نیلی پتلون تے پڑھیار کڑیاں لئی چٹی شرٹ، ٹائی تے نیلی اسکرٹ ہے۔ ایسے سکول دی اک پڑھیار ایستھر وی ہے، جیہدی عمر اُنی سال ہے تے جیہڑی دسویں وچ پڑھ رہی ہے۔ پر ایستھر لئی سکول آؤڻا اینا سوکھا نہیں ہے۔ اک تے اوہنوں اپڻے گھروں کوئی دس کلو میٹر پینڈا کر کے سکول آؤڻا پیندا ہے تے دوجا ایہہ پئی اوہنے اک سال پہلوں اک کڑی جمی ہے۔ ایستھر نے کہیا '' میں باقاعدگی نال سکول نہیں آؤندی۔ حمل وچ میری صحت چنگی نہیں رہی تے ایس پاروں وی مینوں مسئلیاں دا ساہمڻا رہیا ہے۔''

ایستھر خوش نصیب ہے پئی اوہدے ماپے اوہدا ساتھ دے رہے نیں نہیں تاں کئی دوجیاں کڑیاں وانگوں اوہنوں وی حاملہ ہو جاڻ دے مگروں تعلیم دا سلسلہ مکاؤڻا پیندا۔

ایستھر ایس تے گل نہیں کرنا چاہوندی پئی اوہ کواری ہو کے کیویں حاملہ ہو گئی۔ امداد اطفال دی ستھ پلان انٹرنیشنل دے اک مطالعے توں پتہ لگیا ہے پئی کئی کڑیاں اپڻی مرضی دے بغیر حاملہ ہوجاندیاں نیں تے ایہہ مسئلہ اوہناں علاقیاں وچ ہور وی بہتا ہے جتھے غریبی پائی جاندی ہے۔ شمال مغربی تنزانیہ دا علاقہ گیٹا، جتھے ایستھر رہندی ہے، ملک دے سب توں غریب علاقیاں وچ گڻیا جاندا ہے۔ حالانکہ اوہ سونے دے ذخیریاں نال لدیا ہے۔

ویہویں صدی دے شروع تے ایہہ اک جرمن نو آبادی سی تے اُس زمانے وچ ایتھے سونے دیاں کاناں سی۔ پر ایتھوں دے لوک ایس دولت توں وانجھے نیں کیوں جو سونے دیاں ایہہ تقریبا ساریاں ہی کاناں غیر ملکیاں دے قبضے وچ نیں۔ ' تنزانیہ میڈیا ویمن ایسوسی ایشن ' دی انانیلی نائکہ دا کہڻا ہے جو کڑیاں غریبی پاروں خطریاں وچ گھریاں نیں '' وچارو اک کڑی سویرے بغیر کجھ کھادے پیتے گھروں نکلدی ہے تے خورے پندراں کلو میٹر ییدل ٹر کے اسکول جاندی ہے۔ کئی واری اوہنوں سکول وچ وی کھاڻ نوں کجھ نہیں ملدا۔ انج دی کسے کڑی نوں کجھ ماڑی موٹی شے کھواؤڻ دے پج وی ورغلایا جاسکدا ہے۔''

سکول دی راہ وچ کڑیاں تے دھاڑے ہوندے نیں۔ اوہناں نوں سائیکل یاں موٹر سائیکل تے چڑھن دی دعوت دتی جاندی ہے جیہدا مُل اوہدے کولوں جبر زنا دی شکل وچ لیا جاندا ہے۔
پر انسانی حقاں دی اک ستھ دے سروے توں پتہ لگیا ہے پئی کئی خطرے سکول دے راہ وچ نہیں سگوں آپوں سکول دے وچ ہوندے نیں جتھے مرد استاد پڑھیار کڑیاں نال ہتھ چالاکی تے اوہناں نال جنسی ملاپ کردے نیں۔ نائکہ نے کہیا استاد مثال دے طور تے اوہناں نوں فیل کرن دیاں تڑیاں دیندے نیں جے اوہ جنسی رابطیاں تے راضی نہ ہوئیاں تے اوہناں نوں فیل کر دتا جاوے گا۔ نائکہ نے کہیا استاد نوں بہت طاقت تے اختیار ہوندا ہے تے پڑھیاراں نوں اوہ بہت کجھ کرن تے مجبور کرسکدے نیں۔

نائکہ موجب تنزانیہ دے وسیب وچ کرپشن عام جئی گل ہے تے اوہنوں جریا جاندا ہے۔ مجرماں نوں گھٹ ہی سزا ملدی ہے۔ کئی لوک عوامی رقماں وچ خیانت کردے نیں استاداں نوں عام طور تے وڈیاں رقماں نہیں ملدیاں پر پڑھیار کڑیاں تے اوہناں دا وس چلدا ہے تے ایہہ اوہناں دا کرپشن دا طریقہ ہے۔عام طور تے پڑھیاراں نال جبر زنا کرن والے استاداں نوں کوئی سزا نہیں ملدی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels