Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> پاکستان: 41 فیصدی کڑیاں مڈھلی تعلیم توں وانجھیاں ہیڻ

پاکستان: 41 فیصدی کڑیاں مڈھلی تعلیم توں وانجھیاں ہیڻ

وچار ڈیسک
July 15th, 2011

عالمی پدھر تے تعلیم دے شعبے وچ کم کر رہی ستھ 'گلوبل کیمپین فار ایجوکیشن' نے آپڻی اک سجری رپورٹ وچ ایشیائی دیساں دے حوالے نال جو انکڑے دتے ہیڻ اوہ کجھ چنگے نہیں۔ رپورٹ موجب پاکستان وچ 41 فیصدی کڑیاں مڈھلی تعلیم توں وانجھیاں ہیڻ جدوں کہ گوانڈھی دیس ہندوستان وچ ایہہ در 30 فیصدی ہے۔

گلوبل کیمپین فار ایجوکیشن دی سانجھی برطانوی ستھ 'اوکسفیم' دے پاکستان وچ عہدے دار سعید الحسن نے دسیا پئی دیس وچ اچیچا کڑیاں دی مڈھلی تعلیم دے حوالے نال حالات کدے وی سکھاویں نہیں رہے۔

اوہناں آکھیا پئی پاکستان وچ منڈیاں وچ پڑھائی دی در 69 فیصد اتے کڑیاں وچ 45 فیصد ہے، جدوں کہ دیس وچ بڻے نیڑے تیڑے ڈیڈھ لکھ پرائمری سکولاں وچوں 45 فیصد منڈیاں لئی اتے 31 فیصد کڑیاں لئی ہیڻ۔

اوکسفیم دے عہدے دار دا آکھڻا سی پئی سرکار سڻے ساریاں سیاسی جماعتاں نوں آپڻا دھیان ایس پاڑ نوں پورن اتے تعلیم دے ودھاء ول لاؤڻ دی لوڑ ہے کیوں جے اجوکے حالاں وچ پاکستان وچ کڑیاں لئی آپڻی مڈھلی پڑھائی پوری کرن دی آس 50 فیصد ہے۔

سعید الحسن نے اٹھارہویں سودھ ہیٹھ تعلیم دے شعبے نوں صوبیاں دے ہتھ دیڻ دے کم نوں چنگا متھیا پر اوہناں نے پاکستان وچ بہتے نکھیڑا کرن والیاں دی رائے نوں من دیاں آکھیا پئی ایس فیصلے تے عمل توں پہلاں صوبیاں دی جوگتا ودھاؤڻی ات لوڑیندی سی۔

''ایہہ پیر اچڻ چیتی پٹ تے لیا گیا پر خورے کوئی باقاعدہ عملی کم ایس حوالے نال نہیں ہویا ایہہ نہیں دیکھیا گیا پئی صوبے ایہہ ذمہ واری نبھاؤڻ جوگے ہیڻ وی کہ نہیں۔ تعلیم دی وزارت نال گل کرو تے اوہ وی اک دباء دا شکار ہے کیوں جے صوبے ایس نویں صورت حال دے جاڻو ہی نہیں ہیڻ۔''

پر سرکار اتے دیس دیاں بہتیاں سیاسی جماعتاں دا آکھڻا ہے پئی اختیار مرکز توں صوبیاں دے ہتھ جاڻ نال علم وچ مڈھلے طور تے اوکڑاں آؤڻ گیاں پر بھلک وچ ایس فیصلے دے چنگے سٹے نکلڻ گے کیوں جے اختیار اتے وسیلے صوبیاں دے ہتھ جاڻ پچھوں صوبے آپڻی کارکردگی دے آپ ذمے وار ہوڻ گے اتے ناکامی دا الزام مرکز دے سر نہیں پایا جا سکے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels