Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> غیرت دے ناں تے کڑیاں دا قتل

غیرت دے ناں تے کڑیاں دا قتل

وچار ڈیسک
June 14th, 2011

لیبیا وچ امدادی کارکناں موجب اوہناں کڑیاں تے زنانیاں نوں اوہناں دے ہی گھر والے ' غیرت دے ناں تے ' قتل کر رہے نیں جیہڑیاں جبر زنا دے سٹے وچ حاملہ ہو گئیاں سی۔ عورتاں دے نال جبر زنا سارے جگ وچ اک حساس مسئلہ ہے پر لیبیا وچ ایہدے تے گل کرنا نموشی سمجھیا جاندا ہے۔

اقوام متحدہ دی پناہ گیراں دی ایجنسی دے اہلکار عرفات جمال دا کہڻا ہے جو لیبیا وچ جدوں کسے دا ریپ ہوندا ہے تے اوہنوں سارے پنڈ یاں قصبے دی بے عزتی سمجھیا جاندا ہے۔

لیبیا دے خیراتی اداریاں دا کہڻا ہے جو اوہناں نوں انج دیاں خبراں مل رہیاں نیں جو ملک دے مغربی پچھونہے علاقیاں وچ کرنل قذافی دی حمایتی فوجاں نے کڑیاں نوں اوہناں دے ماں پیو تے بھراواں ساہمڻنے ریپ کیتا۔

حانا الغازی دا کہڻا ہے جو ' اپنی ہی دھی نوں اکھاں ساہمڻے ریپ ہوندیاں ویکھڻا اوہناں لوکاں لئی موت توں بھیڑا ہے۔' اوہناں دسیا پئی ایہہ اوہ علاقے نیں جتھے زنانیاں پردے توں بناء باہر نہیں نکلدیاں۔ حانا العازی لیبیائی رضا کاراں دے اُس جتھے وچ رلتی نیں جیہڑے لوکاں نوں طبی امداد دے رہے نیں۔

ایہہ ستھ انج دیاں کڑیاں تے زنانیاں نوں حمل ڈیگڻ لئی رقم وی دے رہی ہے جیہڑیاں جنگ وچ جبر زنا دا نشانہ بڻن دے مگروں حاملہ ہو گئیاں نیں۔لیبیا دی امدادی ایجنسی دی اہلکار نادرا الحمیسی دا کہڻا ہے جو ' حالی ویلا ساڈے نال نہیں ہے'۔ اوہناں دا کہڻا ہے کئی پیو ایہہ جانڻ دے مگروں اپنیاں دھیاں نوں قتل کر دیڻ گے پئی اوہناں دے نال جبر زنا ہویا ہے۔

اوہناں نے کہیا اوہناں ماپیاں نوں انج لگدا ہے جو اوہ انج کر کے اپنیاں ہی دھیاں نوں بچا رہے نیں۔ حانا العازی دا کہڻا ہے جو ' ایسے لئی اسیں کڑیاں نوں حمل ڈیگڻ لئی رقم دے رہے آں۔ اوہناں دسیا ایس سلسلے وچ پہلوں ہی اک فتویٰ جاری کر دتا گیا ہے جو انج دے حالات وچ حمل ڈیگڻا گناہ نہیں ہے۔

' چیرٹی فار ورلڈ ' دے لیبیا وچ دفتر نے تیونس وچ سرحد تے اماماں نال رابطہ کیتا ہے جتھے ایس گل تے لوکاں نوں سمجھایا جارہیا ہے پئی ریپ دے معاملے وچ عورت دا کوئی قصور نہیں ہوندا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels