Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> ہمت کرو تے گڈی چلاؤ: سعودی زنانیا ں دی مہم

ہمت کرو تے گڈی چلاؤ: سعودی زنانیا ں دی مہم

وچار ڈیسک
June 11th, 2011

عرب دنیا وچ آؤڻ والی انقلاب دی لہر نے سعودی عرب دیاں زنانیاں وچ اپنے حقاں دی جدوجہد دی اک نویں سدھر پیدا کر دتی ہے۔ ہڻ اوہ وچارڻ لگیاں پئی جے عوامی وکھالے تے سیاسی بدلیاں دی منگ کرڻ والے تیونسی تے مصری وسنیکاں دی مہم حکمراناں نوں اقتدار توں دستبردار ہوڻ تے مجبور کر سکدی ہے تے سعودی عرب وچ زنانیاں نوں گڈی چلاؤڻ دی اجازت کیوں نہیں مل سکدی۔

پچھونہی عرب ریاست سعودی عرب دیاں زنانیاں لئی ایہہ سب توں چنگا ویلا ہے اپنے مڈھلے حق منواؤڻ دا۔ اوہ اپنی اُس پرانی سدھر نوں پورا کرواؤڻ دی کوشش کرنا چاہوندیاں نیں جیہدا سعودی زنانیاں ہڻ تیکر صرف سفنا ویکھدیاں آئیاں نیں۔ یعنی گڈی چلاؤڻ دی اجازت ملڻا۔ اک سال پہلوں سعودی زنانیاں انج کرڻ دا وچار وی نہیں سکدیاں سی۔

سعودی عرب وچ ہزاراں کڑیاں تے زنانیاں فیس بک راہیں بڻن والے اک انج دے جتھے وچ رلیاں نیں جیہڑا زنانیاں نوں گڈی چلاؤڻ دا حق دیڻ دی بھرویں منگ کر رہیا ہے تے ایہدے تے لگی روک نوں چیلنج کرنا چاہوندا ہے۔

اک ہفتہ پہلوں سعودی پربندھیاں نے منال الشریف ناں دی اُس زنانی نوں پھڑ لیا سی جیہنے ملک دے مشرقی صوبے وچ آپوں گڈی چلاؤندیاں ہوئیاں اپنی اک ویڈیو بڻوائی تے اوہنوں یوٹیوب تے نشر کردیاں ہوئیاں سعودی عرب دیاں ساریاں زنانیاں نوں اپیل کیتی پئی اوہ وی جرات وکھاؤندیاں ہوئیاں گڈی چلاؤڻ۔

منال الشریف نوں چھڈ دتا گیا پر اوہناں تے الزام ہے پئی اوہناں سعودی بادشاہی نوں جگ ساہمڻے بھنڈیا ہے تے لوکاں نوں جوش دوایا ہے۔ منال الشریف نے گڈی چلاؤڻا امریکا وچ سکھیا سی۔

انی سو نوے وچ وی سعودی عرب وچ زنانیاں نے گڈی چلاؤڻ دی جرات کیتی سی پر اودوں دی سرکار نے کرڑے کریک ڈاؤن، انج دیاں زنانیاں نوں نوکریوں کڈھڻ تے ڈراؤڻ دھمکاؤڻ دے سارے حربے ورتے سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels