Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> ہندوستان وچ جمڻ توں پہلوں ہی لکھاں کڑیاں دا قتل

ہندوستان وچ جمڻ توں پہلوں ہی لکھاں کڑیاں دا قتل

وچار ڈیسک
May 25th, 2011

آبادی دے حساب نال ہندوستان دنیا دے دوجے وڈے ملک وچ کڑیاں نوں جمڻ توں پہلوں ہی مار دیڻ دی ریت اُنج تے پراڻی ہے پر اجکل وی ایس ورتارے وچ بہتی بدلی نہیں ویکھی گئی۔

ایس بارے اک نویں رپورٹ موجب بال دے جمڻ توں پہلوں ہی اوہدی جنس بارے جانکاری لے لئی جاندی ہے تے فیصلہ کر لیا جاندا پئی بال نوں جیوندیاں جاگدیاں دنیا وچ آؤڻ دتا جاوے یاں جمڻ توں پہلوں ہی مار دتا جاوے۔ انج پر کڑیاں نال کیتا جاندا ہے کیوں جو بہت سارے گھراں وچ کڑی نوں حالی وی سماجی بھار سمجھیا جاندا ہے۔ایس بارے اک مشہور طبی رسالے ' دی لانسٹ ' وچ چھپڻ والی اک رپورٹ وچ بھیت کھلیا ہے پئی ہندوستان وچ چھ سال دی عمر دے منڈیاں دی کل گڻتی دے مقابلے وچ کڑیاں دی گڻتی 7.1 ملین گھٹ ہے۔

رپورٹ وچ ہور دسیا گیا ہے پئی ہندوستان دے انج دے گھرانے جیہناں وچ پہلا بال کڑی ہووے، بہتے توں بہتے ماپے دوجے بال دے جمڻ توں پہلوں الٹرا ساؤنڈ راہیں بال دی جنس بارے جانکاری لیڻا چاہوندے نیں جے ماں دے ڈھڈ وچ دوجا بال وی کڑی ہی ہووے تے ماپے حمل ڈیگڻ دا فیصلہ کر لیندے نیں، ایس آس تے پئی تیجا بال خورے منڈا ہووے۔ ماہراں موجب ہندوستان دے امیر گھراں وچ کئی واری منڈے تے کڑیاں دے تناسب وچ عدم توازن ویکھڻ وچ آؤندا ہے۔

سائنسداناں موجب 1980 ء تے 2010 وچ 12 ملین کڑیاں نوں اوہناں دی جنس پاروں حمل ڈیگ کے مار دتا گیا۔ ماہراں نے کہیا ہندوستان وچ جنس دے مڈھ تے بالڑیاں دے حمل ڈیگڻ دے کیس وچ پچھلے کجھ دھاکیاں وچ بہت وادھا ہویا ہے۔ ایہدے کارن وسیب وچ منڈیاں تے کڑیاں دی دُر وچ بہت عدم توازن پیدا ہو گیا ہے۔1991 وچ دکھڻی ایشیا دی ترقی ول ودھدی ریاست ہندوستان وچ منڈیاں دے مقابلے وچ کڑیاں دی گڻتی 4.2 ملین گھٹ سی پر 2001 وچ ہور گھٹ کے 6.0 ملین تیکر اپڑ گئی۔

دی لانسٹ وچ چھپڻ والی رپورٹ توں ایہہ وی پتہ لگیا ہے پئی ماں دی ککھ وچ پوری طرحاں نشوونما پاؤڻ والے بال یاں غیر مولود بال دے اسقاط دا مڈھلا کارن کڑیاں تے منڈیاں نوں برتری دیڻ دا دھاکیاں توں چلدا آرہیا پرانا رجحان ہے۔ ایہدے نال نال تولید دی خوبی یاں بار آوری وچ کمی وی ہندوستانی وسیب وچ کڑیاں دی گھٹ دی ہوئی گڻتی دا کارن بڻ رہی ہے۔ ہندوستان وچ فی عورت بال دے جمڻ دی اوسط دُر 1990 وچ 3.8 سی جیہڑی 2008 وچ ڈگ کے 2.6 ہو گئی۔

ہندوستان وچ ایہناں رجحاناں دے کارن کڑیاں دے مقابلے وچ منڈیاں دی گڻتی 32 ملین ودھ ہے۔ ماہراں دا کہڻا ہے جو ایہہ صورتحال کئی دھاکیاں تیکر برقرار رہوے گی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels